مۋزەي قىزمەتكەرلەرىنىڭ ايتۋىنشا, قۇندى سۋرەت ابايدىڭ 125 جىلدىق مەرەيتويى قارساڭىندا حاكىمنىڭ ەسكەرتكىشى الدىندا تۇسىرىلگەن ەكەن. قورداعى سۋرەتتى مۋزەي ۇجىمى 12 قاڭتار, دىنمۇحامەد قوناەۆتىڭ تۋعان كۇنىنە وراي قوعام نازارىنا الەۋمەتتىك جەلى ارقىلى ۇسىنعان.
الايدا سۋرەتتىڭ اۆتورى كورسەتىلمەگەن ەدى. ءداۋ دە بولسا, فوتونى تۇسىرگەن مارقاكول ءوڭىرىنىڭ تۋماسى, ارداگەر ءفوتوتىلشى قاليعۇمار قابدەش ۇلى ما دەپ, اقساقالعا حابارلاسقانبىز. ويتكەنى ول د.قوناەۆتى قىزمەتتىك ءىسساپارلارىندا, جيىنداردا سان رەت سۋرەتكە تۇسىرگەن.
– ماسكەۋگە, پارتيانىڭ XXVI سەزىنە باردىق. اتشاپتىرىم زالدا فوتو تۇسىرۋگە ىڭعايلى ورىن قاراستىرىپ تۇرعان ەدىم. دىنمۇحامەد احمەت ۇلى كەلە جاتىر. تاياپ كەلىپ اماندىق-ساۋلىعىمدى سۇراستى دا «قازىرگى تۇسىرگەن سۋرەتىڭ بۇگىن – سۋرەت, ەرتەڭ – تاريح» دەپ ارقامنان قاقتى. تاعى بىردە الماتىعا ءار ەلدىڭ I حاتشىلارى جينالدى. برەجنەۆ پەن قوناەۆ 28-پانفيلوۆشىلار ساياباعىنا گۇل شوقتارىن قوياتىن بولدى. اپپاراتتارىمىزدى سايلاپ, كۇتىپ تۇرمىز. كوپ ۇزاماي كەلدى. دىنمۇحامەد احمەت ۇلى قاراپايىم عوي. بىرازىمەن اڭگىمەلەسىپ ۇلگەردى. الدىڭعى قاتاردا وبكومنىڭ حاتشىلارى, كەيىنگى قاتاردا بوشاي كىتاپباەۆ تۇرعان. سوندا ديمەكەڭ كىتاپباەۆپەن ارنايى امانداسىپ, سويلەستى. ال قوناەۆتى تۇسىرگەن سۋرەتتەرىمنىڭ كوبى مەملەكەتتىك مۇراعاتتا جاتىر. بۇل كورسەتىپ وتىرعان فوتو ابايدا تۇسىرىلگەن ەكەن. مەنىكى ەمەس, – دەپ اعىنان اقتارىلدى اقساقال.
شىعىس قازاقستان وبلىسى
