فورۋمنىڭ اشىلۋ سالتاناتىندا وبلىستىق ىشكى ساياسات باسقارماسى باسشىسىنىڭ مىندەتىن اتقارۋشى يرينا سميت مەملەكەت باسشىسى قاسىم-جومارت توقاەۆتىڭ قازاقستان حالقىنا جولداۋىندا ايتىلعان ۇلتتىڭ جاڭا بولمىسىن قالىپتاستىرۋداعى جاستاردىڭ ءرولى, وڭىردە مەملەكەتتىك جاستار ساياساتىنىڭ ىسكە اسىرىلۋى, پاندەمياداعى ۆولونتەرلەردىڭ قىزمەتى تۋرالى اتاپ ءوتتى.
وتكەن جىلى «جاسىل ەل» جاستار ەڭبەك جاساقتارىندا 1 206 ادام ەڭبەك ەتكەن. ولاردىڭ 522-ءسى كوپ بالالى جانە تۇرمىسى تومەن وتباسىلاردان بولسا, 113 جاس – وقۋ وقىمايتىن جانە جۇمىس ىستەمەيتىن NEET ساناتىنداعىلار. سونداي-اق «ەڭبەك» باعدارلاماسى ارقىلى 16 مىڭ جاس جۇمىسپەن قامتىلسا, «جۇمىسپەن قامتۋدىڭ 2020 جول كارتاسى» ارقىلى 3 700 جاس مامان ەڭبەككە تارتىلعان. ال «ديپلوممەن – اۋىلعا!» باعدارلاماسى ارقىلى 378 ادام كوتەرمە جاردەماقى, 294 مامان تۇرعىن ءۇي الۋ ءۇشىن بيۋدجەتتىك نەسيەگە يە بولعان.
فورۋمدا ءسوز العان «Birgemiz» ۆولونتەرلەردىڭ رەسپۋبليكالىق فرونت-كەڭەسىنىڭ جەتەكشىسى تاتيانا ميرونيۋك جىل بويى ىسكە اسىرىلعان جوبالار مەن وعان شىعىسقازاقستاندىق جاستاردىڭ بەلسەندى قاتىسۋى تۋرالى بايانداپ بەردى. ونىڭ ايتۋىنشا, وبلىس جاستارى ءار جوبانىڭ قۇنى 300 مىڭ تەڭگە تۇراتىن 53 شاعىن گرانتتى جەڭىپ الىپ, كاسىپتەرىن دوڭگەلەتكەن.
وسكەمەندىك بەلسەندى ۆولونتەر ۆاسيلي حۆاننىڭ ايتۋىنشا, كارانتين كەزىندە جالعىز تۇراتىن, دەنساۋلىعى جانە الەۋمەتتىك جاعدايىنا بايلانىستى كومەككە مۇقتاج ادامدارعا, قارت كىسىلەرگە ەرىكتىلەردىڭ كورسەتكەن كومەكتەرى ۇشان-تەڭىز. ولار بارلىق قاۋىپسىزدىك شارالارىن ساقتاي ءجۇرىپ, ازىق-تۇلىك, ءدارى-دارمەك جەتكىزۋمەن اينالىسقان. قايىرىمى مول بۇل جۇمىسقا ۇزىن سانى 93 ۆولونتەر جۇمىلدىرىلىپتى.
– ءبىز قارتتاردىڭ قاۋىپسىزدىگىن ويلادىق. ءسويتىپ, ولارعا كەرەك-جاراقتارىن اپارىپ بەرىپ جۇردىك. ساقتىق شارالارىن ءتۇسىندىرۋ جۇمىستارىنا, بەتپەردەلەر تاراتۋعا دا بەلسەنە قاتىستىق, – دەيدى ۆاسيلي حۆان.
الەمدى دۇرلىكتىرگەن كوروناۆيرۋس ينفەكتسياسىنىڭ تارالۋى كەزىندە وزىنەن گورى وزگەلەردىڭ ءومىرىن ويلاپ, حالىقتىڭ دەنساۋلىعى ءۇشىن قىزمەت ەتكەن ۇرجارلىق جاس دارىگەر شۇعىلا تۇرسىنبەكوۆا پروۆيزورلىق بولىمدە 14 كۇن ەمدەۋشى دارىگەر رەتىندە قىزمەت اتقارعانىن, ءالى دە ىندەتپەن كۇرەستىڭ جالعاسىپ جاتقانىن ايتتى.
ونلاين فورماتتا جالعاسىن تاپقان فورۋمدا دەكرەتتىك دەمالىستا وتىرعان جاننا وسپانوۆا پاندەميا كەزىندە ونلاين دۇكەندى قالاي ۇيىمداستىرعانى تۋرالى تاجىريبەسىمەن ءبولىستى. جاننانىڭ نەگىزگى جۇمىسى – كۋرچاتوۆ قالاسىنداعى ۇلتتىق يادرولىق ورتالىقتا ينجەنەر. ول اڭگىمەسىندە كۋرچاتوۆتاعى فيتنەس ورتالىعىنىڭ جۇمىسى, پاندەميادا تاپ بولعان قيىنشىلىقتارى تۋرالى دا ءسوز قوزعادى.
فورۋم اياسىندا جوبالىق مەنەدجمەنت, حالىقارالىق دەڭگەيدەگى ۆولونتەرلىك جوبالارعا قاتىسۋ, ليدەرلىك جانە جەكە برەندتى قالىپتاستىرۋ بويىنشا س.ۋشاكوۆانىڭ, ا.بەرلىبايدىڭ, ا.ەرنيازوۆانىڭ جانە ە.ءجۇنىسوۆانىڭ قاتىسۋىمەن جاستارعا ارنالعان ترەنينگتەر ءوتتى.
ودان وزگە «قازاقستاننىڭ 100 جاڭا ەسىمى» جوباسىنىڭ جەڭىمپازى IT مامان, «ەۆكليد» ءبىلىم بەرۋ ورتالىعىنىڭ نەگىزىن سالۋشى, «Thousand IT Group» كومپانياسىنىڭ ديرەكتورى, بىرنەشە الەۋمەتتىك جوبانىڭ باستاۋشىسى ايبولات قۇلاتايمەن جانە «قازاقستان جاستارىنىڭ كونگرەسى» زتب-نىڭ باسشىسى, «دارىن» مەملەكەتتىك جاستار سىيلىعىنىڭ لاۋرەاتى توقتار بولىسوۆپەن موتيۆاتسيالىق كەزدەسۋلەر ۇيىمداستىرىلدى. الداعى ۋاقىتتا مەملەكەتتىك جاستار ساياساتىن ىسكە اسىرۋعا ۇلەس قوسقان جاستار ىشىنەن جەڭىمپازدار انىقتالىپ, وبلىس اكىمىنىڭ سىيلىعىمەن ماراپاتتالادى.
شىعىس قازاقستان وبلىسى
