احقو قارجىلىق قىزمەتتەر كورسەتۋدى رەتتەۋ جونىندەگى كوميتەتىنىڭ حابارلاۋىنشا, 2020 جىلدىڭ قىركۇيەگىندە تىركەۋ پروتسەسى تولىقتاي ونلاين رەجىمگە كوشكەن. تيىسىنشە, تىركەۋ مەرزىمى 7 كۇننەن 1 كۇنگە دەيىن قىسقاردى.
سونىمەن قاتار ينۆەستيتسيالاردى ساتۋ جانە ساتىپ الۋ بويىنشا ءارتۇرلى پلاتفورمالارعا قاتىستى 5 جاڭا قارجىلىق قىزمەت ەنگىزىلگەن. ەسكە سالا كەتەيىك, احقو-دا ۇسىنۋعا بولاتىن قارجىلىق قىزمەتتەردىڭ جالپى سانى – 35. بۇدان بولەك, كەپتيۆتى ساقتاندىرۋدىڭ 3 جاڭا فورماسى ىسكە قوسىلعان.
كوروناۆيرۋس پاندەمياسىنا بايلانىستى احقو-دا رەتتەۋشىلىك باعىتىنداعى قولداۋ شارالارى ەنگىزىلدى. بۇل قارجى ورتالىعى الاڭىندا جۇمىس ىستەيتىن بيزنەس قاۋىمداستىققا قيىن كەزەڭدەردە ءوزىنىڭ نەگىزگى باسىمدىقتارىنا نازار اۋدارۋعا مۇمكىندىك بەردى. سونداي-اق نەگىزگى كاپيتالعا قويىلاتىن تالاپتار مەن ينۆەستيتسيالىق كومپانيالاردىڭ وتىمدىلىك تالاپتارى وڭتايلاندى.
FinTech Lab-تا 8 جاڭا فيرما تىركەلگەن. بۇگىندە بارلىعى 30 فيرما بار. ولار كراۋدفاندينگ, اقشا قىزمەتتەرى, تسيفرلى اكتيۆتەر جانە ت.ب. قىزمەتتەر ۇسىنادى. قارجىلىق قىزمەتتەر كورسەتۋدى رەتتەۋ جونىندەگى كوميتەت احقو مەن قازاقستانننىڭ تسيفرلى اكتيۆتەرى سالاسىنداعى زاڭنامالىق اكتىلەردىڭ تالاپتارىن ۇيلەستىرۋگە ىقپال ەتتى.
حالىقارالىق قاتىناستار باعىتىندا دا اۋقىمدى شارۋا تىندىرىلدى. اتاپ ايتقاندا, كوپجاقتى ەكى كەلىسىمگە قول قويىلعان. ياعني IOSCO كەڭەيتىلگەن ءوزارا تۇسىنىستىك تۋرالى مەموراندۋم جانە ساقتاندىرۋ قاداعالاۋشىلارىنىڭ حالىقارالىق قاۋىمداستىعىنىڭ (IAIS) كوپجاقتى ءوزارا تۇسىنىستىك تۋرالى مەموراندۋمى بەكىتىلدى. ەكى كەلىسىم دە نارىقتاردىڭ دۇرىس جۇمىس ىستەۋى مەن قارجىلىق تۇراقتىلىقتى قامتاماسىز ەتۋ ءۇشىن دۇنيەجۇزىلىك قاداعالاۋ سالاسىنداعى ىنتىماقتاستىق اياسىن كەڭەيتەدى.
احقو سوتى مەن حالىقارالىق تورەلىك ورتالىعى قىزمەتىن 2018 جىلعى 1 قاڭتاردا باستاعان ەدى. وسى كۇنگە دەيىن جالپى 296 ءىستى ويداعىداي شەشكەن. ونىڭ ىشىندە 291 ءىس 2020 جىلدى قاراستىرىلعان.
– احقو سوتىنا 12 ءىس بەرىلدى جانە 9 شەشىم شىعارىلدى. حالىقارالىق تورەلىك ورتالىعىندا تورەلىك تالقىلاۋ مەن مەدياتسيانى تالاپ ەتەتىن 282 ءىس شەشىلدى. تورەلىك ىستەردىڭ سانى ەداۋىر وسكەن. بىراق ىستەردىڭ كوپشىلىگى مەدياتسيا ارقىلى شەشىمىن تاپتى. حالىقارالىق تورەلىك ورتالىعىندا داۋلاردى مەدياتسيا جولىمەن ءساتتى رەتتەۋ ناتيجەسىندە ىستەر بويىنشا ودان ءارى تورەلىك ەتۋ نەمەسە سوت تالقىلاۋى قاجەتتىلىگى ازايعان. ىستەرگە 11 ەلدىڭ تاراپتارى قاتىستى. ونىڭ ىشىندە قازاقستان, رەسەي, قىتاي, وزبەكستان جانە ۇلىبريتانيا سەكىلدى مەملەكەتتەر بار. نەگىزىنەن داۋلار بورىشتىق مىندەتتەمەلەرگە, وزگە دە قارجى ماسەلەلەرىنە, قىزمەتتەر كورسەتۋگە, ەڭبەك قاتىناستارىنا جانە م ۇلىككە (ونىڭ ىشىندە جەر مەنشىگىنە) بايلانىستى ماسەلەلەرگە قاتىستى بولدى, – دەپ حابارلادى احقو سوتى مەن حالىقارالىق تورەلىك ورتالىعى.
پاندەمياعا بايلانىستى احقو سوتى مەن حالىقارالىق تورەلىك ورتالىعى جۇمىستى تولىقتاي ونلاين رەجىمگە كوشىرگەن. بارلىق داۋلار ەلەكتروندى تۇردە شەشىلدى. ونىڭ ءبارى eJustice ەلەكتروندىق سوت ءىسىن جۇرگىزۋ جۇيەسىن قولدانا وتىرىپ جۇزەگە اسىرىلدى. بارلىق داۋلاردى رەتتەۋ جانە شەشۋ, سوتقا دەيىنگى جانە سوت تىڭداۋلارىن وتكىزۋ ءۇشىن زاماناۋي بەينەتەحنولوگيالار قولدانىلعان.
احقو سوتىندا تاراپتاردىڭ مۇددەلەرىن سوتتا قورعاۋ ءۇشىن 222 زاڭگەر تىركەلگەن. ولاردىڭ اراسىندا اقش, ۇلىبريتانيا, ەۋروپا, ورتالىق ازيا, افريكا, ازيا, اۋستراليا جانە جاڭا زەلانديادان تىركەلگەن 23 ەلدىڭ (25 يۋريسديكتسيا) زاڭگەرلەرى بار.
– 2020 جىل احقو سوتى مەن حالىقارالىق تورەلىك ورتالىعى ءۇشىن ايتۋلى جىل بولدى. جاھاندىق COVID-19 پاندەمياسىنا بايلانىستى تۋىنداعان قيىندىقتارعا قاراماستان, داۋلاردى شەشۋ قىزمەتتەرى بۇكىل الەمدەگى بيزنەس پەن ىسكەر ادامدار ءۇشىن ءوزىنىڭ تارتىمدىلىعىن دالەلدەدى. جاڭا سەرىكتەستىك قارىم-قاتىناستاردى قۇرۋ جانە وقىتۋدىڭ اۋقىمدى باعدارلامالارىن جۇرگىزۋ ناتيجەسىندە ءبىز سوت ىستەرىنىڭ سانىن ەداۋىر ۇلعايتۋعا, سوت جانە تورەلىك شەشىمدەردى تابىستى ورىنداۋعا قول جەتكىزدىك. سونداي-اق قازاقستان مەن ورتالىق ازيانىڭ زاڭ جانە ىسكەرلىك قوعامداستىعىن دامىتۋعا ەلەۋلى ۇلەس قوستىق. ءبىزدىڭ قىزمەتىمىزدىڭ وسى كەزەڭىندە باسقا حالىقارالىق قارجى ورتالىقتارىنداعى داۋلاردى رەتتەۋ جونىندەگى ۇقساس ورتالىقتارمەن سالىستىرعاندا, ناتيجەمىز كۇتكەنىمىزدەن اسىپ ءتۇستى, – دەيدى احقو سوتىنىڭ جانە حالىقارالىق تورەلىك ورتالىعىنىڭ تىركەۋشىسى جانە اپپارات باسشىسى كريستوفەر كەمپبەلل-حولت.
