1983 جىلدارى بوي كوتەرگەن سۋ مۇناراسىنىڭ ابدەن توزىعى جەتسە كەرەك, ايازدى كۇندەرى قاتىپ قالاتىن كورىنەدى. ول قاتسا, اۋىلداعى ساناۋلى كۇدىقتاردىڭ دا سۋى توقتايدى. زاردابىن سول باياعى, قوڭىر تىرلىك كەشىپ وتىرعان حالىق تارتادى. بۇعان باس-كوز بولىپ جۇرگەن «كوممۋنالدىق شارۋاشىلىقتىڭ» جۇمىسشىسى نۇرلانبەك تۇرسىنعوجين 4 قاڭتاردا سۋى قاتقان مۇنارانىڭ تەتىگىن ەرىتپەك بولىپ, بيىگىنە كوتەرىلىپتى. سوندا عوي, 15 مەتردەي مۇنارا تۇبىنەن وپىرىلىپ, قۇلاپ تۇسكەن. ال اۋىلدىقتاردى اۋىز سۋعا جارىتام دەپ جۇرگەن نۇرلانبەك اۋرۋحاناعا جەتپەي كوز جۇمعان. ارتىندا بالا-شاعاسى قالدى. بۇل اۋىلداعى اعايىننىڭ ايتقانى. ال اۋىلدىق وكرۋگتىڭ اكىمى نە دەيدى؟
- تۇرعىندار سۋدى مۇنارادان الىپ جۇرگەن. اۋىلدا بەس كولونكا بار, ولار دا ىستەپ تۇر. قىستا قۇلايدى دەپ ويلاعان جوقپىز. 2020 جىلى جوندەۋ تۋرالى سمەتالىق قۇجاتىن جاساپ, اۋداندىق تۇرعىن ءۇي كوممۋنالدىق شارۋاشىلىعىنا جازعامىز. ولار اقشا بولەمىز دەگەن. سۋ اعىپ تۇراتىن. ايازدى كۇندەرى ءىشى قاتىپتى, - دەيدى جامبىل اۋىلدىق وكرۋگىنىڭ اكىمى الىبەك امانوۆ.
وكىنىشتى, ەندى قارجى ءبولىپ مۇنارانى جوندەگەنمەن مەرت بولعان ازاماتتى قايتارمايدى. جاۋاپتى باسشىلار مۇنارانىڭ توزىعى جەتكەنىن بىلە تۇرا قاۋىپتىڭ الدىن الۋ كەرەك ەدى؟! ونىڭ ۇستىنە مەملەكەت نازارىنداعى شەكارالىق اۋدان. جامبىل اۋىلدىق وكرۋگىنىڭ اكىمى ءا. امانوۆتىڭ ايتۋىنشا ارنايى كوميسسيا كەلىپ وقيعانىڭ ءمان-جايىن انىقتايدى.
شىعىس قازاقستان وبلىسى
كاتونقاراعاي اۋدانى
