سونداي-اق جامبىل وبلىستىق سايلاۋ كوميسسياسىندا 5 پارتيانىڭ فيليالدارىنان 206 مانداتقا 523 كانديدات تىركەلگەن. ونىڭ ىشىندە Nur Otan پارتياسىنان 390 كانديدات, «اۋىل» پارتياسىنان 44 كانديدات, «اق جول» پارتياسىنان 44 كانديدات, Adal پارتياسىنان 31 كانديدات جانە «قازاقستاننىڭ حالىق پارتياسىنان» 14 كانديدات بار. وبلىستىق سايلاۋ كوميسسياسىنىڭ مالىمەتىنشە, ەلدەگى ەپيدەميالىق جاعدايعا بايلانىستى بارلىق سايلاۋ ۋچاسكەلەرىندە سانيتارلىق تالاپتار قاتاڭ ساقتالدى. سونىمەن قاتار ۋچاسكەلىك جانە اۋماقتىق كوميسسيالاردىڭ جۇمىسىنا 3,8 مىڭنان استام ادام قاتىستى. سايلاۋ ۋچاسكەلەرىندەگى داۋىس بەرۋ پروتسەسىن 6500-دەن استام بايقاۋشى باقىلادى. ونىڭ قۇرامىندا ساياسي پارتيالار مەن قوعامدىق بىرلەستىكتەردىڭ وكىلدەرى بار. بايقاۋشىلاردىڭ ايتۋىنشا, العاشقى ساعاتتاردان-اق ازاماتتار سايلاۋعا قاتىسۋدا جوعارى بەلسەندىلىك تانىتقان.
م.ح.دۋلاتي اتىنداعى تاراز وڭىرلىك ۋنيۆەرسيتەتىنىڭ ءبىرىنشى پرورەكتورى ەرجان امىربەك ۇلى بۇل سايلاۋ ەلدىڭ ساياسي جۇيەسىنىڭ جاڭارۋىن, سونداي-اق قازاقستاندى دەموكراتيالاندىرۋ مەن جاڭارتۋعا دەگەن ۇمتىلىسىن كورسەتەتىنىن اتاپ ءوتتى. سونىمەن قاتار بايزاق اۋدانى بۋرىل اۋىلىنىڭ تۇرعىنى ءۇمىت باشاتوۆ «بۇل كەز كەلگەن ازامات ءۇشىن بولاشاقتىڭ نەگىزىن قالاۋعا ۇلەس قوساتىن اسا ماڭىزدى وقيعا. مەن قازاقستاننىڭ ودان ءارى دامۋعا جەتەلەيتىن رەفورمالار جولىمەن جۇرەتىنىنە سەنىمدىمىن», دەيدى. ال تالاس اۋدانى قاسقابۇلاق اۋىلىنىڭ تۇرعىنى سۋلحادين مۇستافاەۆ ەلىمىزدىڭ كەز كەلگەن ازاماتى داۋىس بەرۋگە قۇقىلى ەكەنىن, داۋىس بەرۋ ارقىلى تۇرعىندار وركەندەۋ, ۇلتارالىق كەلىسىم جانە تۇراقتىلىقتى نىعايتۋ جولىن تاڭدايتىنىن جەتكىزدى.
جامبىل وبلىسى
