ونىڭ ايتۋىنشا, ايماقتاعى 722 سايلاۋ ۋچاسكەسىندە تاڭنان كەشكى سەگىزگە دەيىن 378 206 ادام داۋىس بەرىپ, ءوز تاڭداۋىن جاساعان. ەرلان زاكىريانوۆ بۇل جولعى ساياسي شارادا وبلىس جاستارى اسا بەلسەندىلىك تانىتقانىن اتاپ ءوتتى.
«وبلىس اۋماعىندا فرانتسيا, گەرمانيا, رەسەي جانە تاعى باسقا ەلدەردەن بارلىعى 17 حالىقارالىق بايقاۋشى تىركەلىپ, ءوڭىرىمىزدىڭ اقكول, تسەلينوگراد, شورتاندى جانە ستەپنوگور مەن كوكشەتاۋ قالالارىندا سايلاۋ بارىسىن باقىلادى. ساياسي ناۋقاندا ەشقانداي زاڭ بۇزۋشىلىق فاكتىسى تىركەلگەن جوق. سايلاۋ بارىسىندا جاستاردىڭ بەلسەندىلىگىن اتاپ وتسەك دەيمىن. اسىرەسە 30 جاس پەن 45 جاس ارالىعىنداعى ازاماتتار اسا بەلسەندى بولدى. تاڭنان كەشكە دەيىن اقمولا وبلىسىنىڭ سايلاۋ ۋچاسكەلەرىندە بارلىعى 378 206 ادام داۋىس بەردى», دەدى وبلىستىق بايقاۋشىلار شتابىنىڭ جەتەكشىسى.
جيىن بارىسىندا «قازاقستاننىڭ ازاماتتىق اليانسى» زاڭدى تۇلعالار بىرلەستىگى اقمولا فيليالىنىڭ ءتورايىمى يرينا تەرەنتەۆا دا ءسوز سويلەپ, سايلاۋ بارىسى تۋرالى تارقاتىپ ايتىپ بەردى.
ايتا كەتەتىن تاعى ءبىر جايت, اقمولا وبلىسىندا 722 سايلاۋ ۋچاسكەسى جۇمىس ىستەدى. ونىڭ 697-ءسى اشىق ۋچاسكەلەر. وبلىستىڭ ازاماتتىق اليانسىنان جانە كاسىپوداقتاردان 1005 بايقاۋشى تىركەلىپ, جەرگىلىكتى سايلاۋ ۋچاسكەلەرىندە جۇمىستارىن اتقاردى. بۇدان بولەك سايلاۋعا قاتىسىپ جاتقان بەس پارتيانىڭ اتىنان 1723 وكىل بايقاۋشى رەتىندە تىركەلدى.
