قانزيا ساقاۋوۆا 104 جاستا. جاستايىنان كولحوز, سوۆحوزدىڭ جۇمىسىنا ارالاسىپ, ەلگە قىزمەت ەتىپ كەلگەن قاريا, ەلگە پايداسى تيگەنىن قالايدى. ال بىرەر كۇن بۇرىن 100 جاسقا شىققان اقىلگەك قۇلباراقوۆا «مەنىڭ تاڭداۋىم – بەيبىتشىلىك», دەيدى.
قوس عاسىردىڭ كۋاسى بولعان كەيۋانالاردان داۋىس ۇيلەرىنە بارىپ الىندى.
* * *
پارلامەنت ءماجىلىسى پەن ءماسليحات دەپۋتاتتارىنىڭ سايلاۋىنا جەتىسۋ جۇرتى دا بەلسەندى داۋىس بەرۋدە. جالپى, الماتى وبلىسى بويىنشا 1 400 038 تۇرعىن داۋىس بەرۋگە قۇقىلى بولسا, ولاردىڭ 30 پايىزدان استامى تۇسكە دەيىن داۋىس بەرگەن. سايلاۋ كۇنى 109 جاستاعى التىنحان اجە دە ءوز تاڭداۋىن جاسادى.
جەتىسۋداعى قارت سايلاۋشى سارقان اۋدانىندا تۇرادى ەكەن. قاريانىڭ ۇيدەن داۋىس بەرۋىنە جاعداي جاساپ, كوشپەلى جاشىك اكەلگەن سايلاۋ كوميسسياسىنىڭ وكىلدەرىنە باتاسىن بەرگەن ءوڭىردىڭ قارت تۇرعىنى التىنحان بەلدەۋباي:
– وسىنداي بەيبىت كۇندى حالقىمىز كوپ اڭسادى. ەندى وسى تاۋەلسىزدىكتى باعالاۋىمىز كەرەك. مەنىڭ جاسىم جۇزدەن اسىپ كەتسە دە, ەشقاشان سايلاۋدان تىس قالعان ەمەسپىن, سايلاۋعا ءار ازاماتتىڭ بارۋى مىندەتتى. سايلاۋدا ەلىمىزدىڭ بولاشاعى شەشىلەتىن كۇن, وعان بەيجاي قاراماعان ءجون. ەلىمىز امان جۇرتىمىز تىنىش, ءار وتباسىنا بەرەكە-بىرلىك تىلەيمىن, – دەدى.
* * *
قىزىلوردا وبلىسى سىرداريا اۋدانىندا تۇراتىن 99 جاستاعى سوعىس ارداگەرى ياحيا تاسىروۆ سايلاۋ ۋچاسكەسىنە ءوزى بارىپ, تاڭداۋىن جاسادى. ماڭىزدى ناۋقاندا قارت جاۋىنگەر اۋدان ورتالىعىنداعى №155 سايلاۋ ۋچاسكەسىندە العاشقى بولىپ داۋىس بەردى. ارداگەر بۇعان دەيىنگى سايلاۋ ناۋقاندارىندا دا ءوز بەلسەندىلىگىمەن كوزگە ءتۇسىپ جۇرگەن بولاتىن.
«سايلاۋ – مەملەكەتتىڭ ءاربىر ازاماتىنىڭ ءوز بولاشاعى ءۇشىن تاڭداۋ ءبىلدىرۋ قۇقىعى. مەن بارلىق سايلاۋدا وسىنداي بەلسەندىلىك تانىتىپ كەلەمىن. العاشقىلاردىڭ ءبىرى رەتىندە تاڭداۋ جاسايمىن. بۇگىن دە سول ادەتىمنەن جاڭىلعان جوقپىن», دەدى ياحيا تاسىروۆ.
مايدانگەر قاريا ساياسي ناۋقاننىڭ ءساتتى وتۋىنە اق باتاسىن بەردى. «سىرداريا اۋدانىنىڭ قۇرمەتتى ازاماتى» ياحيا تاسىروۆ 1922 جىلى سىرداريا اۋدانى ا.توقماعانبەتوۆ اۋىلىندا دۇنيەگە كەلگەن. ستالينگراد, بەلارۋس, كۋرسك قالالارىن, پولشانى ازات ەتۋگە قاتىسقان. مايدانگەر 120 جاۋىنگەردەن قۇرالعان اۆتوماتشىلار روتاسىندا بولعان.
سۇراپىل سوعىس كەزىندە وڭ اياعىنا وق تيگەن. ەلگە كەلگەننەن كەيىن ورتا مەكتەپتە اسكەري دايارلىق پانىنەن ساباق بەردى. ودان كەيىنگى جىلداردا ەڭبەگى تەرەڭوزەك, جالاعاش اۋداندىق ماي زاۋىتتارىندا جالعاستى. بەرىدە وتىن دايىنداۋ مەكەمەسىندە جۇمىس ىستەپ, 1981 جىلى زەينەتكەرلىككە شىققان.
دايىنداعاندار
قالماحانبەت مۇقامەتقالي,
دينار كەرىم,
«Egemen Qazaqstan»
