حالىقارالىق نورمالار قاتاڭ ساقتالدى
تەرري مارياني,
ەۋروپالىق پارلامەنت دەپۋتاتى (فرانتسيا):
– قازاقستانداعى سايلاۋلاردىڭ بارىندە حالىقارالىق نورمالار قاتاڭ ساقتالادى. ساياسي دودالار دەموكراتيا تالاپتارىنا ساي وتەدى. 15 جىلداي ەۋروپاداعى قاۋىپسىزدىك جانە ىنتىماقتاستىق ۇيىمىنىڭ مۇشەسى بولدىم. ورتالىق ازيا بويىنشا جۇمىس ىستەدىم. سوندىقتان بۇل وڭىردەگى جاعدايدى وتە جاقسى بىلەمىن جانە قازاقستانعا العاش رەت كەلىپ وتىرعان جوقپىن. ورتالىق ازياداعى ەلدەردە سايلاۋدىڭ قالاي وتەتىنىن دە سالىستىرىپ بەرە الامىن. بۇل رەتتە قازاقستان دامۋ تۇرعىسىنان ورتالىق ازيادا ءبىرىنشى ورىنعا يە.
ەڭ العاش رەت بۇل ەلگە 1995 جىلى كەلدىم. ودان بەرى قازاقستان كوپ وزگەردى. ونىڭ ورتالىق ازيا ەلدەرىنىڭ ىشىنەن ءبىرىنشى بولىپ ەۋروپاداعى قاۋىپسىزدىك جانە ىنتىماقتاستىق ۇيىمىنا توراعالىق ەتۋىنىڭ ءوزى كوپ جايدى اڭعارتادى.
بيىل قازاقستاننىڭ تاۋەلسىزدىك العانىنا – 30 جىل. وسى ۋاقىت ىشىندە بۇل مەملەكەتتىڭ جەتكەن جەتىستىكتەرىنە ءبارىمىز تاڭدانۋمەن كەلەمىز. قازاقستان ەكونوميكا تۇرعىسىنان دا, دەموكراتيا تۇرعىسىنان دا ۇلكەن قادامدار جاسادى. البەتتە, ونىڭ باستاۋىندا قازاقستاننىڭ تۇڭعىش پرەزيدەنتى نۇرسۇلتان نازارباەۆ تۇر. ول – بارشا مەملەكەتتەرگە ۇلگى بولارلىق تۇلعا.
سايلاۋعا كەلەر بولساق, سانيتارلىق تالاپتار قاتاڭ ساقتالدى. سايلاۋشىلاردىڭ قاۋىپسىزدىگىنە ەرەكشە كوڭىل ءبولىندى. قازاقستان پاندەمياعا قاراماستان سايلاۋدى جوعارى دەڭگەيدە وتكىزدى. ءسويتىپ, الەم ەلدەرىنە ۇلگى بولدى. ولاي دەيتىنىم, فرانتسياداعى وڭىرلىك سايلاۋلار پاندەميا سالدارىنان كەيىنگە قالدىرىلدى. ال قازاقستان ساياسي دودانى كەيىنگە شەگەرمەي, شارانى ءوز دەڭگەيىندە اتقارىپ شىقتى.
كۇردەلى كەزەڭدە سايلاۋ وتكىزۋ وڭاي ەمەس
سىدالى زەكي حاكان,
تۇركيا ۇلى ۇلتتىق ءماجىلىسىنىڭ دەپۋتاتى, ەۋروپا كەڭەسى پارلامەنتتىك اسسامبلەياسىنىڭ مۇشەسى:
– ەۋروپا كەڭەسى پارلامەنتتىك اسسامبلەياسىنىڭ مۇشەسى رەتىندە كوپتەگەن ەلدە سايلاۋلاردىڭ بارىسىن باقىلادىم. قازاقستانعا بايقاۋشى رەتىندە ەكىنشى مارتە كەلىپ وتىرمىن. بۇعان دەيىن قازاقستانداعى پرەزيدەنت سايلاۋىنا بايقاۋشى رەتىندە قاتىسقان ەدىم.
قازاقستان دەموكراتياعا دەگەن ۇمتىلىسىن كۇشەيتىپ كەلەدى. سايلاۋ – دەموكراتيانىڭ كورسەتكىشى. سايلاۋ – ادامدارعا بەرىلگەن مۇمكىندىك. ونى ءتيىمدى پايدالانۋ كەرەك. سايلاۋدان كەيىن پارلامەنتتە وپپوزيتسيا وكىلدەرىنە كوپ ورىن بۇيىرادى دەگەن ويدامىن. وپپوزيتسيا حالىقتىڭ ويىن بىلدىرە الاتىنداي مۇمكىندىككە يە بولۋى كەرەك.
تاۋەلسىز بايقاۋشى رەتىندە نۇر-سۇلتان قالاسىنداعى بىرنەشە سايلاۋ ۋچاسكەسىنە باردىم. سايلاۋ اشىق, ترانسپارەنتتى تۇردە ءوتتى. جالپى, ساياسي دودا قيىن كەزەڭدە – كوروناۆيرۋس پاندەمياسى جاعدايىندا ۇيىمداستىرىلدى. مۇنداي جاعدايدا سايلاۋ سەكىلدى اۋقىمدى ساياسي شارانى وتكىزۋ وڭاي ەمەس. بىراق قازاقستان بۇل مىندەتتى ويداعىداي ورىندادى. سايلاۋدىڭ جوعارى دەڭگەيدە ۇيىمداستىرىلعانىنا كوز جەتكىزدىك. سانيتارلىق تالاپتار قاتاڭ ساقتالدى.
حالىقتىڭ جاۋاپكەرشىلىگىنىڭ دە جوعارى ەكەنىن بايقادىق. مۇمكىندىگى شەكتەۋلى ادامدار ءۇشىن دە ارنايى داۋىس بەرۋ ورىندارى جاسالعان. قىسقاسى, بارلىعى ەسكەرىلگەن. تىڭعىلىقتى دايىندىق جۇرگىزىلگەن. جەرگىلىكتى, شەتەلدىك بايقاۋشىلارمەن دە تىلدەستىك. ولار دا سايلاۋدىڭ بارىسىنا وڭ باعا بەردى. سوندىقتان سايلاۋ دەموكراتيالىق جاعدايدا ءوتتى دەپ ايتۋعا تولىق نەگىز بار.
قازاقستان بۇل سايلاۋ ارقىلى دەموكراتياعا قاراي ۇلكەن قادام جاسادى. بۇل جاعداي دەموكراتيا جولىنا ەندى تۇسكەن وزگە مەملەكەتتەرگە ۇلگى بولارى داۋسىز.
تىڭعىلىقتى دايىندالعان
ەۆگەني شەۆچەنكو,
ۋكراينا جوعارى راداسىنىڭ دەپۋتاتى,
«ۋكراينا-قازاقستان» پارلامەنتارالىق ىنتىماقتاستىق توبىنىڭ جەتەكشىسى:
– قازاقستانداعى پارلامەنت ءماجىلىسى دەپۋتاتتارىنىڭ سايلاۋىنا تاۋەلسىز بايقاۋشى رەتىندە قاتىسۋ – ءبىز ءۇشىن ۇلكەن ابىروي. قازاقستان ءبىزدى ادەتتەگىدەي جىلى قابىلدادى. جەرگىلىكتى حالىقتىڭ دا ۋكرايناعا دەگەن قۇرمەتىن بايقادىق.
بىرنەشە سايلاۋ ۋچاسكەسىن ارالاپ شىقتىق. جالپى العاندا قازاقستانداعى دەموكراتيالىق پروتسەستىڭ قۇندىلىقتارى جوعارى. سايلاۋ ۋچاسكەلەرىنە كىرىپ-شىعۋ بويىنشا ەشقانداي شەكتەۋ جوق. ادامداردىڭ دا ەلدىڭ ساياسي ومىرىنە جاۋاپكەرشىلىكپەن قارايتىنى بايقالدى. مۇنى داۋىس بەرۋگە اعىلعان حالىقتىڭ نوپىرىنەن-اق اڭعاردىق. ادەتتە سايلاۋدىڭ العاشقى ساعاتتارىندا مۇنداي بەلسەندىلىك وتە سيرەك ورىن الادى.
ءبىز قازاقستانعا بەيسەنبى كۇنى, ياعني 7 قاڭتاردا كەلدىك. جۇما كۇنگى ۇگىت-ناسيحات جۇمىستارىن باقىلاۋعا تىرىستىق. ۇگىت-ناسيحات ناۋقانىنىڭ سوڭعى كۇنى بولعان سوڭ با, نۇر-سۇلتان قالاسىنىڭ كوشەلەرىنەن اناۋ ايتقانداي بەلسەندىلىك بايقالمادى. جەرگىلىكتى تەلەارنالاردى قاراپ ۇلگەرمەدىك. تىنىشتىق كۇنىندە دە ءتيىستى تالاپتاردىڭ ويداعىداي ساقتالعانىنا كۋا بولدىق. ۋكراينادا تىنىشتىق كۇنىنىڭ وزىندە استىرتىن ۇگىت-ناسيحات جۇمىستارى جالعاسىپ جاتادى. قازاقستاندا مۇنداي جاعدايدى كورمەدىك. جالپى, قازاقستاندىقتار – ءتارتىپتى, جاۋاپكەرشىلىكتى جوعارى قوياتىن حالىق. بۇل قاسيەتتەردى كەز كەلگەن ىستەن بايقاۋعا بولادى. بۇل جاقسى, ارينە. قازاقستان حالقىنان الاتىن ۇلگى-ونەگەنىڭ ءبىرى وسى.
سايلاۋ ۋچاسكەلەرىنىڭ بىرىندە رەسەيلىك بايقاۋشىلارمەن كەزدەسىپ قالدىق. ولار دا سايلاۋ بارىسىنىڭ زاڭ بۇزۋشىلىقتارىنسىز ءوتىپ جاتقانىن ايتتى.
ءيا, الەۋمەتتىك اراقاشىقتىقتى ساقتاۋ بويىنشا كىشىگىرىم كەمشىلىكتەردى كوردىك. بىراق بۇعان تۇسىنىستىكپەن قاراۋ كەرەك جانە مۇنداي كەمشىلىكتەر سايلاۋدىڭ ءوتۋ بارىسىنا ەشقانداي كەدەرگى كەلتىرگەن جوق. اتاپ وتەرلىگى, مەملەكەت ەسەبىنەن سايلاۋشىلاردىڭ بارىنە بەتپەردە مەن قورعانىش قولعاپتارى ۇسىنىلدى. بۇل قازاقستاننىڭ سايلاۋعا تىڭعىلىقتى دايىندالعانىن كورسەتەدى.
جاستار بەلسەندىلىك تانىتتى
توماش لەنتس,
پولشا سەيمى دەپۋتاتى, «ازاماتتىق پلاتفورما» پارتياسىنىڭ وكىلى:
– ساياسي دوداعا قازاقستان سىرتقى ىستەر مينيسترلىگىنىڭ شاقىرۋىمەن كەلدىم. نۇر-سۇلتان قالاسىنداعى بىرنەشە سايلاۋ ۋچاسكەسىنە باردىم. سايلاۋ ۋچاسكەلەرى اشىلعان العاشقى ساعاتتاردا-اق حالىقتىڭ بەلسەندىلىگى ەرەكشە بايقالدى. اسىرەسە, جاستاردىڭ بەلسەندىلىگى ءسۇيسىنتتى. ويتكەنى «جاستار ساياساتقا قىزىقپايدى» دەگەن اڭگىمە بار. قازاقستان جاستارى وسى تۇجىرىمدى تەرىسكە شىعارعانداي. ولاردىڭ ساياسي بەلسەندىلىگى تىم جوعارى. دەمەك, ولار ەلدىڭ بولاشاعىنا ۇلكەن جاۋاپكەرشىلىكپەن قارايدى.
بيىلعى پارلامەنت سايلاۋىنىڭ قازاقستاندىقتار ءۇشىن ماڭىزى جوعارى. ويتكەنى سايلاۋعا 5 ساياسي پارتيا قاتىستى. بىلۋىمشە, تىزىمدە دە جاڭا ەسىمدەر كوپ.
تاعى ءبىر اڭعارعانىم – قازاقستاندىقتاردىڭ سايلاۋعا ۇلكەن جاۋاپكەرشىلىكپەن قاراۋى. بيىلعى سايلاۋدا قازاقستاندىق باقىلاۋشىلاردىڭ سانى وتە كوپ. ءار ۋچاسكەدە ءار پارتيانىڭ وكىلى ساياسي دودانى باقىلاپ وتىردى. بۇل حالىقتىڭ ساياسي بەلسەندىلىگىن كورسەتەدى. ارينە, COVID-19 پاندەمياسىنا بايلانىستى شەتەلدەن كەلگەن بايقاۋشىلاردىڭ سانى ازداۋ بولدى. دەسە دە, جەرگىلىكتى باقىلاۋشىلاردىڭ ءوزى جاعدايدى مۇقيات نازاردا ۇستادى.
جوعارى دەڭگەيدە ۇيىمداستىردى
ۆويتەح فيليپ,
چەح رەسپۋبليكاسى پارلامەنتى دەپۋتاتتار پالاتاسى توراعاسىنىڭ ورىنباسارى:
– حالىقارالىق بايقاۋشى رەتىندە قازاقستانعا العاش رەت كەلىپ وتىرعان جوقپىن. سوندىقتان قازاقستاننىڭ مۇنداي ساياسي دودالاردى جوعارى دەڭگەيدە ۇيىمداستىراتىنىن جاقسى بىلەمىن. بىرنەشە سايلاۋ ۋچاسكەسىن ارالاپ, وسىعان تاعى ءبىر مارتە كوز جەتكىزدىم. ارالاپ شىققان سايلاۋ ۋچاسكەلەرىندە ەشقانداي زاڭ بۇزۋشىلىقتار تىركەلگەن جوق. سايلاۋشىلاردىڭ دا بەلسەندىلىگى جوعارى. تاڭەرتەڭنەن بەرى تاڭداۋ جاساۋعا اعىلعان جۇرتتى كورىپ سۇيسىندىك. سونداي-اق ساياسي پارتيالاردىڭ بەلسەندىلىگىن دە اتاپ وتۋگە ءتيىسپىن. پارتيالاردىڭ مۇددەسىن قورعايتىن جەرگىلىكتى بايقاۋشىلار سايلاۋدىڭ ءوتۋ بارىسىن مۇقيات باقىلادى.
دەموكراتيا جولىنداعى ماڭىزدى قادام
تۋگرۋل چاماش,
تۇركيا رەسپۋبليكاسى قورشاعان ورتا جانە ۋربانيزاتسيا مينيسترلىگىنىڭ كەڭەسشىسى, تاۋەلسىز ساراپشى:
– قازاقستانداعى سايلاۋدى باقىلاۋ مۇمكىندىگىنىڭ تۋعانىنا ريزامىن. ويتكەنى بۇل ەلدەگى جاعدايدىڭ ءبارىن ءجىتى نازاردا ۇستايمىز. بيىل قازاقستاننىڭ تاۋەلسىزدىك العانىنا – 30 جىل. وسى ۋاقىت ارالىعىندا قازاقستان ءوزىن قۋاتتى مەملەكەت رەتىندە تانىتتى. ەلدىڭ دامۋىنا باعىتتالعان رەفورمامالاردى ءساتتى جالعاستىرىپ كەلەدى. بۇل رەتتە, قازاقستان تۇراقتىلىق پەن دامۋ تۇرعىسىنان كوپ ەلگە ۇلگى بولىپ وتىر. قازاقستان دەموكراتيا جولىندا ماڭىزدى قادامدار جاساۋدا. سونىڭ ءبىر دالەلى – ءبىز باقىلاعان سايلاۋ. باۋىرلاس مەملەكەت وسى سايلاۋ ارقىلى الداعى جىلدارداعى دامۋ باعدارىن ايقىنداپ الماق. ايتپاقشى, جۋىردا رەسپۋبليكالىق «Egemen Qazaqstan» گازەتىندە جاريالانعان پرەزيدەنت قاسىم-جومارت توقاەۆتىڭ «تاۋەلسىزدىك بارىنەن قىمبات» ماقالاسىن وقىدىم. پرەزيدەنتتىڭ ماقالاسىنان قازاقستاننىڭ قانداي جولدان وتكەنىن اڭعارۋعا بولادى جانە بۇل ەل بارلىق سالادا تابىستى دامىپ كەلەدى. ءبىز قازاقستاننىڭ ءار جەتىستىگىنە قۋانامىز.
وزگە ەلدەرگە ۇلگى بولدى
فۋلفيو مارتۋشەللو,
ەۋروپالىق پارلامەنتتىڭ دەپۋتاتى (يتاليا):
– باتىس ەلدەرى ءۇشىن قازاقستان ستراتەگيالىق مەملەكەت. سوندىقتان بۇل ەلدەگى قوعامدىق-ساياسي پروتسەستەردىڭ ءبارى ەۋروپا ءۇشىن ايتارلىقتاي ماڭىزعا يە. پارلامەنت ءماجىلىسى دەپۋتاتتارىنىڭ سايلاۋىنا دا كارى قۇرلىق ەلدەرى كوز تىگۋمەن بولدى.
ساياسي شارا كۇنى بىرنەشە سايلاۋ ۋچاسكەسىنە باردىم. مەنىڭ ەسەبىمشە, ونداعى سايلاۋشىلاردىڭ دەنى تۇسكە دەيىن داۋىس بەرىپ ۇلگەردى. حالىق سايلاۋعا ەرىكتى تۇردە قاتىستى. بۇل ولاردىڭ بولاشاق الدىنداعى جاۋاپكەرشىلىكتى جەتە سەزىنگەنى ەكەنى انىق. سونداي-اق سايلاۋشىلاردىڭ كوپتەپ كەلۋى حالىقتىڭ پاندەميادان كەيىن قالىپتى ومىرگە تۇسە باستاعاندىعىن كورسەتەدى.
قازاقستانداعى سايلاۋ كۇردەلى كەزەڭدە وتكەنى بەلگىلى. سوعان قاراماستان قاۋىپسىزدىك شارالارى قاتاڭ ساقتالدى. ەسىكتەن كىرگەننەن ادامنىڭ قىزۋىن ولشەيدى, الەۋمەتتىك اراقاشىقتىق ساقتالادى, قولدى دەزينفەكتسيالاۋعا بولادى. سايلاۋ ۋچاسكەلەرىندەگى قىزمەتكەرلەر مەن سايلاۋشىلار اراسىنداعى اراقاشىقتىق تا نورماعا ساي. سوندىقتان ساياسي شارا جوعارى دەڭگەيدە ۇيىمداستىرىلدى دەپ ايتۋعا تولىق نەگىز بار. ەۋروپا ەلدەرى قازىرگىدەي الماعايىپ كەزەڭدە سايلاۋ وتكىزۋ كەرەك پە, كەرەك ەمەس پە دەپ باس قاتىرىپ وتىرعاندا, قازاقستاننىڭ مۇنداي باتىل قادامعا بارۋى وزگە مەملەكەتتەرگە ۇلگى بولعانى داۋسىز.
اڭعارعانىم, كانديداتتاردىڭ ىشىندە جاستار مەن ايەلدەر باسىم ەكەن. مەنىڭشە, بۇل دا جاقسىلىقتىڭ نىشانى. ولاردىڭ ەلدىڭ قوعامدىق-ساياسي ومىرىنە ارالاسۋى – تىڭنان قوسىلعان كۇش.
قازاقستان حالقىنىڭ سايلاۋداعى بەلسەندىلىگى جوعارى. ءسوزىم دالەلدى بولۋى ءۇشىن بىرنەشە مىسال كەلتىرەيىن. مەن سايلاۋ ۋچاسكەلەرىنە بارعاندا ەڭ الدىمەن سايلاۋشىلارمەن تىلدەسەمىن. سوسىن بارىپ ۇيىمداستىرۋشىلارعا جاقىندايمىن. ماسەلەن, نۇر-سۇلتان قالاسىنىڭ تۇرعىنى, ورتا جاستاعى ايەل ادام سايلاۋ ۋچاسكەسى اشىلماي تۇرىپ, داۋىس بەرۋگە كەلگەن. تاعى ءبىر قازاقستان ازاماتى سايلاۋعا قاتىسۋ ءۇشىن ىستانبۇلدان ۇشىپ كەلىپتى. ءاربىر ادام وسىنداي جاۋاپكەرشىلىك تانىتۋى كەرەك. قازاقستانداعى سايلاۋعا بايقاۋشى رەتىندە قاتىسقانىمدى ماقتان تۇتامىن.
جاقسى اسەر قالدىردى
ميحايل كورب,
ەستونيا پارلامەنتىنىڭ دەپۋتاتى, ەستونيا ورتالىق پارتياسىنىڭ باس حاتشىسى:
– ەستونيادا سايلاۋشىلار ەكى ءتۇرلى ادىسپەن داۋىس بەرەدى. ياعني سايلاۋ ۋچاسكەلەرىنە كەلۋ ارقىلى تاڭداۋ جاساۋعا بولادى جانە ەلەكتروندى تۇردە داۋىس بەرۋ مۇمكىندىگى بار. اركىم جاعدايىنا قاراي ەكى ءادىستىڭ ءبىرىن تاڭدايدى. قازاقستاندا داۋىس بەرۋ ءۇشىن سايلاۋ ۋچاسكەلەرىنە بارۋ كەرەك. كۇننىڭ سالقىندىعىنا قاراماستان نۇر-سۇلتان قالاسىنىڭ تۇرعىندارى سايلاۋ ۋچاسكەلەرى اشىلعان ساتتەن باستاپ بىرىنەن سوڭ ءبىرى كەلە باستادى. ءوز باسىم مۇنداي بەلسەندىلىكتى كۇتكەن جوق ەدىم.
جالپى العاندا, قازاقستانداعى سايلاۋ جاقسى اسەر قالدىردى. ءبىز بىرنەشە سايلاۋ ۋچاسكەسىنە باردىق. جالپى, كارتينانى كوز الدىمىزعا ەلەستەتۋ ءۇشىن وسىنىڭ ءوزى جەتكىلىكتى بولدى. سايلاۋ تەحنيكالىق تۇرعىدان ءمىنسىز ۇيىمداستىرىلعان. ارينە, پاندەميا جاعدايىندا مۇنداي اۋقىمدى شارانى وتكىزۋ قيىن. سوعان قاراماستان قازاقستاننىڭ جاۋاپتى مىندەتتى ويداعىداي اتقارعانىنا كۋا بولدىق. ماسەلەن, كىرەبەرىستە دەنە قىزۋىنىڭ ولشەنۋى, اراقاشىقتىقتىڭ ساقتالۋى, بايقاۋشىلارعا جاقسى جاعدايدىڭ جاسالعانى, ءبارى-ءبارى ءتانتى ەتتى. بايقاۋشىلارمەن دە تىلدەستىك. ولاردىڭ تاراپىنان سىن-ەسكەرتپەلەر ايتىلعان جوق.
سايلاۋ ۋچاسكەلەرى تىڭعىلىقتى دايىندالعان. ءمان بەرۋگە تۇرمايدى-اۋ دەلىنگەن جاعدايلاردىڭ ءبارى ەسكەرىلگەن. سايلاۋ كوميسسياسىنىڭ وكىلدەرى جىلى قارسى الدى, سۇراقتارىمىزعا دا تولىق جاۋاپ بەردى. سوندىقتان قازاقستانداعى سايلاۋعا جوعارى باعا بەردىم.
ەشقانداي زاڭ بۇزۋشىلىق بولعان جوق
بەرمەت دۇيشەنبيەۆا,
تمد ميسسياسىنىڭ بايقاۋشىسى, قىرعىز رەسپۋبليكاسىنىڭ وكىلى:
– ءبىز الماتىدا تاڭعى ساعات 7-دەن باستاپ, ۋچاسكەلەرى اشىلعان ساتتەن بەرى ءجۇرمىز. سايلاۋ بارىسىندا 6 ۋچاسكەدە بولدىق, بريفينگتەن كەيىن ۋچاسكەلەردى تاعى دا ارالايمىز. باقىلاۋ پروتسەدۋراسى كەزىندە ەشقانداي زاڭ بۇزۋشىلىقتاردى كورمەدىك. جالپى, داۋىس بەرۋ تياناقتى وتۋدە, سايلاۋشىلاردىڭ بەلسەندىلىگى بايقالادى. ءوزىمىز مونيتورينگ جۇرگىزگەن بارلىق ۋچاسكەلەردە سايلاۋ پروتسەسىنىڭ ينكليۋزيۆتىلىگى ساقتالدى, ياعني بارلىق جەردە مۇگەدەكتەرگە ارنالعان پاندۋستار, شاقىرۋ نۇكتەلەرى بار. سونىمەن قاتار جەرگىلىكتى, قوعامدىق بايقاۋشىلاردىڭ, ساياسي پارتيالار بايقاۋشىلارىنىڭ وكىلدەرىن دە كەزدەستىردىك. جالپى, داۋىس بەرۋ وتە سابىرلى وتۋدە.
سايلاۋ ۋچاسكەلەرى كوميسسيالارى مۇشەلەرىنىڭ جانە سايلاۋشىلاردىڭ بارلىق سانيتارلىق نورمالارى قاتاڭ ساقتالعانىن كوزىمىز كوردى.
دايىنداعاندار
فارحات قايرات ۇلى,
اباي ايماعامبەت,
«Egemen Qazaqstan»
