– قازاقستانداعى پارلامەنت ماجىلىسىنە دەپۋتاتتارىنىڭ سايلاۋىنا تاۋەلسىز بايقاۋشى رەتىندە قاتىسۋ – ءبىز ءۇشىن ۇلكەن ابىروي. قازاقستان ءبىزدى ادەتتەگىدەي جىلى قابىلدادى. جەرگىلىكتى حالىقتىڭ دا ۋكرايناعا دەگەن قۇرمەتىن بايقادىق, – دەدى ەۆگەني شەۆچەنكو.
ۋكراينا جوعارى راداسىنىڭ دەپۋتاتى بىرنەشە سايلاۋ ۋچاسكەسىن ارالاپ شىققانىن مالىمدەدى.
– جالپى العاندا قازاقستانداعى دەموكراتيالىق پروتسەستىڭ قۇندىلىقتارى جوعارى. سايلاۋ ۋچاسكەلەرىنە كىرىپ-شىعۋ بويىنشا ەشقانداي شەكتەۋ جوق. ادامداردىڭ دا ەلدىڭ ساياسي ومىرىنە جاۋاپكەرشىلىكپەن قارايتىنى بايقالدى. مۇنى داۋىس بەرۋگە اعىلعان حالىقتىڭ نوپىرىنەن-اق اڭعارۋعا بولادى. ادەتتە سايلاۋدىڭ العاشقى ساعاتتارىندا مۇنداي بەلسەندىلىك وتە سيرەك ورىن الادى, – دەدى ەۆگەني شەۆچەنكو.
ۋكراينالىق بايقاۋشىلار قازاقستانعا بەيسەنبى كۇنى كەلگەن ەكەن. ولار جۇما كۇنگى ۇگىت-ناسيحات جۇمىستارىن باقىلاۋعا تىرىسقان.
– ۇگىت-ناسيحات ناۋقانىنىڭ سوڭعى كۇنىندە قالا كوشەلەرىنەن اناۋ ايتقانداي بەلسەندىلىك بايقالمادى. جەرگىلىكتى تەلەارنالاردى قاراپ ۇلگەرمەدىك. تىنىشتىق كۇنىندە دە ءتيىستى تالاپتاردىڭ ويداعىداي ساقتالعانىنا كۋا بولدىق. ۋكراينادا تىنىشتىق كۇنىنىڭ وزىندە استىرتىن ۇگىت-ناسيحات جۇمىستارى جالعاسىپ جاتادى. قازاقستاندا مۇنداي جاعدايدى كورمەدىك. جالپى, قازاقستاندىقتار – ءتارتىپتى, جاۋاپكەرشىلىكتى جوعارى قوياتىن حالىق. بۇل قاسيەتتەردى كەز كەلگەن ىستەن بايقاۋعا بولادى. بۇل جاقسى, ارينە. قازاقستان حالقىنان الاتىن ۇلگى-ونەگەنىڭ ءبىرى وسى, – دەدى "ۋكراينا-قازاقستان" پارلامەنتارالىق ىنتىماقتاستىق توبىنىڭ جەتەكشىسى.
ۋكراينالىق بايقاۋشىلار سايلاۋ ۋچاسكەلەرىنىڭ بىرىندە رەسەيلىك ارىپتەستەرىمەن كەزدەسىپ قالعانىن ايتتى. ولار دا سايلاۋ بارىسىنىڭ زاڭ بۇزۋشىلىقتارىنسىز ءوتىپ جاتقانىن جەتكىزگەن.
– ءيا, الەۋمەتتىك اراقاشىقتىقتى ساقتاۋ بويىنشا كىشىگىرىم كەمشىلىكتەردى كوردىك. بىراق بۇعان تۇسىنىستىكپەن قاراۋ كەرەك جانە مۇنداي كەمشىلىكتەر سايلاۋدىڭ ءوتۋ بارىسىنا ەشقانداي كەدەرگى كەلتىرىپ وتىرعان جوق. اتاپ وتەرلىگى, مەملەكەت ەسەبىنەن سايلاۋشىلاردىڭ بارىنە بەتپەردە مەن قورعانىش قولعاپتارى ۇسىنىلۋدا. بۇل قازاقستاننىڭ سايلاۋعا تىنعىلىقتى دايىندالعانىن كورسەتەدى, – دەدى ەۆگەني شەۆچەنكو.
