ەلباسى بيىلعى ساياسي دودا ەرەكشە قارقىن العانىن, سونداي-اق بۇل باعىتتا پارلامەنت پەن جەرگىلىكتى زاڭ شىعارۋ ورگانداردىڭ جۇمىسىن جەتىلدىرۋگە باسىمدىق بەرۋ كەرەكتىگىن ايتتى.
ء«بىز ءوزىمىزدىڭ بولاشاعىمىز بەن قازاقستاندىقتاردىڭ ءومىرى وركەندەپ, جاقسارۋى ءۇشىن داۋىس بەرەمىز. بيىلعى سايلاۋعا دايىندىق ەرەكشە قولعا الىنىپ, الدىن الا داۋىس بەرۋ, ياعني پرايمەريز ارقىلى ءوتىپ, ونى ءماسليحاتتار مەن ماجىلىسكە جاڭا ادامداردى, اسىرەسە جاستار مەن ايەلدەردى, بەلسەندى ازاماتتارىمىزدى تارتۋ ءۇشىن جۇرگىزىلدى», دەدى قازاقستاننىڭ تۇڭعىش پرەزيدەنتى.
سونداي-اق ەلباسى قازاقستاندىقتاردى وسى مۇمكىندىكتى جىبەرمەي ءوز تاڭداۋىن جاساۋعا شاقىردى.
«وسىنداي تۇراقتى ساياسي جاعدايدا الەمگە اۋىزبىرلىگىمىزدى كورسەتىپ, كەلەشەگىمىز ءۇشىن داۋىس بەرۋ – تۇپكىلىكتى ماقساتىمىز. داۋىس بەرۋگە ۇلگەرمەگەندەر بولسا, وزدەرىنىڭ كونستيتۋتسيالىق قۇقىقتارىن ورىنداۋعا شاقىرامىن. پرەزيدەنت رەتىندە التى رەت سايلاۋدان ءوتتىم. ءتۇرلى كەزەڭدەر بولعانىن جاقسى بىلەسىزدەر. بىرنەشە داعدارىستان وتتىك. 1998 جىلعى وڭتۇستىك-شىعىس داعدارىسى جانە 2007-2009 جىلدار ارالىعىنداعى اۋقىمدى قارجى داعدارىسى. قازىر بۇكىل الەمگە تاراعان پاندەميا جاعدايىندا تۇرمىز. الايدا ۇيىمشىلدىق پەن دەر كەزىندە قابىلدانعان مەملەكەتتىك شارالار ارقىلى «جاسىل» ايماق دەڭگەيىنە تۇستىك. دەمەك, باسقا مەملەكەتتەرگە قاراعاندا قاۋىپتى سەيىلتە الدىق», دەدى نۇرسۇلتان نازارباەۆ.
ەلباسىنىڭ ايتۋىنشا, قازىر ەڭ باستىسى پاندەميانى ەڭسەرىپ, پاندەميادان تۇرالاعان ەكونوميكانى قالپىنا كەلتىرۋ ءۇشىن كوزدەلگەن جوسپارلاردى ورىنداۋعا كىرىسۋ قاجەت.
