وسى قابىلەتى ارقىلى ول رەسپۋبليكالىق, وبلىستىق بايقاۋلاردىڭ دا بىرنەشە رەت جۇلدەگەرى اتانىپتى. جاس بولسا دا ەرەكشە قابىلەتكە يە ارۋ قىز ءوزىنىڭ ونەرى ارقىلى كوپتى تاڭداندىرىپ كەلەدى.
سۋرەتشى قىزدىڭ ءومىردىڭ وزىندەي شىنايى تۋىندىلارى ادام جانىنىڭ قۇپياسىنا ءۇڭىلىپ, جۇرەگىن كەرەمەت ءبىر سەزىمگە بولەيدى. ال توقىعان كەستەسى مەن مونشاقتارمەن ادىپتەپ جاساعان ءتۇرلى اشەكەي بۇيىمدارى كورگەن كوزدى قىزىقتىرادى. مۇمكىندىگى شەكتەۋلى بولسا دا بار مۇمكىندىگىن قازاق ونەرىن دامىتۋعا ارناپ كەلە جاتقان اياجاننىڭ جوسپارلارى كوپ. اسىرەسە ونىڭ ومىرگە, ونەرگە دەگەن قۇشتارلىعى ەشكىمگە ۇقسامايدى. قايسار قىز جاراتىلىسىنىڭ ونەرگە قۇشتار ەكەنىن, سوندىقتان دا تاعدىرىنا ەشۋاقىتتا نالىماعانىن ايتادى. «سەبەبى مەنىڭ ەكى قولىم مەن اياعىم دامىماسا دا, ەستۋ, كورۋ قابىلەتتەرىم ەرەكشە. سۋرەت سالۋ مەن كەستە توقۋدان بولەك, جانىما جاقىن اقىن-جازۋشىلاردىڭ شىعارمالارىن وقىعاندى جاقسى كورەمىن. نەگە ەكەنى بەلگىسىز, سۋرەتتى تۇندە سالعان ۇنايدى. كومپيۋتەردى جاقسى مەڭگەرگەنمىن», دەيدى. سونداي-اق اياجان جانىنا جاقىن جانداردىڭ قامقورلىعى مەن دەمەۋىنە دە ءدان ريزا ەكەندىگىن جەتكىزدى. «مەن ءۇشىن اتقان تاڭ مەن باتقان كۇندى, انامنىڭ اق ءجۇزىن كورە الاتىنىم, ساف اۋامەن تىنىستاي وتىرىپ, ويىمدى جەتكىزۋ ۇلكەن باقىت. ەڭ باستىسى – ەلىمىز الەمدى جايلاعان مىنا ىندەتتەن امان شىقسا ەكەن دەپ تىلەيمىن. ادامدار دەنساۋلىقتىڭ قادىرىن ءبىلىپ, اقشامەن دە ساتىپ الا المايتىن دۇنيەلەردىڭ بار ەكەنىن تەرەڭ تۇسىنسە دەيمىن», دەيدى اياجان.
جامبىل وبلىسى
