سوندا ايتىلعان ويلاردىڭ ىشىندە ەرەكشە كوڭىلگە قونعانى – پرەزيدەنتتىڭ ازاماتتىق قوعامدى قالىپتاستىرۋعا جانە دامىتۋعا نەگىز بولاتىن باستامالارى تۋرالى ءسوزى. ساياسي رەفورمالارسىز ەكونوميكانى دامىتا المايتىنىمىزعا كوزىمىز جەتتى. دەسەك تە ساياسي رەفورما, مەملەكەت باسشىسى ايتقانداي, ءبىر كۇننىڭ نەمەسە ءبىر جىلدىڭ شارۋاسى ەمەس. بىزگە قوعامنىڭ ءتۇرلى كوزقاراسىن جەتكىزىپ, ءارتۇرلى پروبلەمانى شەشۋگە مۇرىندىق بولاتىن پارتيالار كەرەك. كوپپارتيالى جۇيە وسىعان الىپ كەلەدى. ءبىر پارتيا بيلىكتىكى بولسا, ءبىر پارتيا حالىقتىڭ ءسوزىن سويلەۋى ءتيىس.
شىن مانىندە, ءبىزدىڭ تاۋەلسىزدىك جولىنداعى تاريحىمىز بەرىدەن باستالمايدى, بۇل مىڭجىلدىقتارعا ۇلاسادى. جاسىراتىنى جوق, سول تاريح ۇمىتىلىپ كەتتى. مىنە, وسىنداي ماڭىزدى ماسەلەگە پرەزيدەنت تەرەڭنەن توقتالدى. ءبىز ازاتتىق جولىنداعى تاريحىمىزدى ءبىلىپ, ونى كەڭىنەن ءتۇسىنۋ ارقىلى ەگەمەندىكتىڭ قانشالىقتى قۇندى ەكەنىن جەتە ۇعىنا الامىز. حالىققا, وسكەلەڭ ۇرپاققا ەگەمەندىك جولىنداعى تەرەڭ تاريحىمىزدى ءتۇرلى كينو ونىمدەرىمەن جەتكىزۋ ارقىلى ۇلتتىق رۋحىمىزدى كوتەرەمىز. ۇلتتىق رۋحى بيىك حالىق ماڭگى جاسايدى, تەك دامي بەرەدى.
پرەزيدەنت ءوز ماقالاسىندا ەكولوگياعا قاتىستى دا تولىمدى سوزدەر ايتتى. وسىعان قوعامدىق قىزمەت تۇرعىسىنان قاراسام, مۇندا جاھاندىق وي جاتىر. ويتكەنى قازىرگى الەمدىك تەندەنتسيا – قورشاعان ورتانى قورعاۋ, اينالانى لاستاماۋ, اعاش وتىرعىزۋ. مەملەكەت باسشىسىنىڭ ءدال وسى باعىتقا قوعامدى تاربيەلەۋ, باۋلۋ كەرەكتىگى تۋرالى ويىنا تولىق قوسىلامىن. ءبىز وسى پلانەتانىڭ تۇرعىنى, ونىڭ قورعاۋشىسى, ەرتەڭگە اماناتتاۋشى ەكەنىمىزدى ۇعىنۋىمىز كەرەك. بۇل – تۋعان جەرگە دەگەن سۇيىسپەنشىلىكتەن باستالاتىن كەڭ اۋقىمدى, جاھاندىق دەڭگەيدە ويلاي الاتىن ادامنىڭ ءىسى.
ازاماتحان سايلاۋ ۇلى,
«بايتاق بولاشاق» ەكولوگيالىق قوزعالىسىنىڭ توراعاسى
