بۇدان بۇرىن حابارلانعانداي, 2020 جىلعى 17 قاراشادا جۇمىسسىزداردى تىركەۋ راسىمدەرىن وڭايلاتۋ جانە جۇمىسپەن قامتۋدى قولداۋ بويىنشا مەملەكەتتىك قىزمەتتەردى الۋدى جەڭىلدەتۋ ءۇشىن ەڭبەكمينى رەسپۋبليكالىق ماڭىزى بار قالالار مەن وبلىس ورتالىقتارىنىڭ تۇرعىندارى ءۇشىن ەلەكتروندىق ەڭبەك بيرجاسى ارقىلى حجقو قىزمەتتەرىن قاشىقتىقتان كورسەتۋ بويىنشا پيلوتتىق جوبانى ىسكە قوستى.
ەەب-داعى «جەكە كابينەتتە» قازاقستاندىقتار جۇمىس ىزدەپ جۇرگەن ادام نەمەسە جۇمىسسىز رەتىندە ەسەپكە تۇرىپ, تىركەۋدىڭ بارلىق كەزەڭدەرىن قاداعالاي الادى. جۇمىسسىز مارتەبەسىن العاننان كەيىن ازاماتتار ونلاين رەجيمىندە ەەب-دا جۇمىسىنان ايىرىلۋ بويىنشا الەۋمەتتىك تولەمگە ءوتىنىم جىبەرە الادى جانە مەملەكەت سۋبسيديالايتىن جۇمىس ورىندارىنا – جاستار پراكتيكاسىنا, الەۋمەتتىك جۇمىس ورىندارىنا, قوعامدىق جۇمىستارعا بوس جۇمىس ورىندارىن ءوز بەتىنشە تاڭداي الادى. جوعارىدا كورسەتىلگەن قىزمەتتەردى ونلاين رەجيمدە الۋ ءۇشىن ەلەكتروندىق تسيفرلىق قولتاڭبانى پايدالانا وتىرىپ, ەەب-دا تىركەۋدەن ءوتۋ قاجەت.
قىزمەتتەردى قاشىقتىقتان الۋ مۇمكىندىگىن 1400-دەن استام ادام پايدالانىپ ۇلگەردى. 1015 ازامات جۇمىسسىز مارتەبەسىن الدى. 260-تان استام جۇمىسسىز ادام جۇمىسىنان ايىرىلعان جاعدايدا الەۋمەتتىك تولەمدەر الۋعا وتىنىمدەر جىبەردى, ولاردىڭ 80%-ىن مەملەكەتتىك الەۋمەتتىك ساقتاندىرۋ قورى ماقۇلدادى.
«جۇمىس ىزدەپ, جۇمىسپەن قامتۋ ورتالىعىنا بارعىسى كەلەتىن ازاماتتارعا ۇيدەن شىعۋدىڭ قاجەتى جوق. مۇنىڭ ءبارىن بىرنەشە مينۋت ىشىندە Enbek.kz پورتالىندا جاساۋعا بولادى ول ءۇشىن تەك ينتەرنەتى بار كومپيۋتەر مەن ەلەكتروندىق تسيفرلىق قولتاڭبا بولۋى كەرەك. قىزمەت تولىقتاي اۆتوماتتاندىرىلعان. بۇل دەگەنىمىز, ەگەر ءۇش جۇمىس كۇنى ىشىندە پورتال جۇمىس ىزدەۋشى ادامعا لايىقتى جۇمىس تابا الماسا, وندا ەلەكتروندىق ەڭبەك بيرجاسى جۇمىسسىز رەتىندە تىركەۋدى اۆتوماتتى تۇردە جۇزەگە اسىرادى. وسىلايشا, ادام فاكتورى تولىعىمەن جويىلادى», – دەدى ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەربول وسپانوۆ.
ينتەرنەت نەمەسە كومپيۋتەر بولماعان جاعدايدا, بارلىق جۇمىسپەن قامتۋ ورتالىقتارىندا قۇرىلعان وزىنە-ءوزى قىزمەت كورسەتۋ ايماقتارىندا ەەب ارقىلى قىزمەتتەردى الۋعا بولادى. حجقو قىزمەتكەرلەرى ونلاين ۇسىنىلاتىن قىزمەتتەر بويىنشا قاجەتتى كەڭەستەر بەرەدى. بۇل ازاماتتارعا جۇمىسپەن قامتۋ ورتالىعىنىڭ مامانىنا قابىلداۋعا كەزەك كۇتپەۋگە جانە COVID-19 پاندەمياسى جاعدايىندا ادامداردىڭ بايلانىسىن ازايتۋعا مۇمكىندىك بەرەدى.
«2021 جىلعى 5 قاڭتاردان باستاپ ەەب ارقىلى ونلاين قىزمەت كورسەتۋ مەحانيزمى وبلىستىق ماڭىزى بار تاعى 23 قالادا حالىققا قولجەتىمدى بولادى. ال جىلدىڭ ەكىنشى جارتىسىندا قازاقستاننىڭ بارلىق تۇرعىنى جاڭا سەرۆيستەردى پايدالانا الادى. سونداي-اق, ازاماتتار ءۇشىن ەلەكتروندىق ەڭبەك بيرجاسىندا جۇمىسپەن قامتۋ سالاسىنداعى قىزمەتتەر تىزبەسى ۇنەمى كەڭەيتىلەتىن بولادى», – دەپ تولىقتىردى ەربول وسپانوۆ.
ەەب ارقىلى حجقو قىزمەتتەرى ەندى نۇر-سۇلتان, الماتى, شىمكەنت قالالارىنىڭ, بارلىق وبلىس ورتالىقتارىنىڭ, سونداي-اق ستەپنوگورسك, تەكەلى, قاپشاعاي, كۋرچاتوۆ, ريددەر, سەمەي, قاراجال, ساتباەۆ, پريوزەرسك, جەزقازعان, تەمىرتاۋ, بالقاش, شاحتينسك, ساران, ارقالىق, ليساكوۆ, رۋدنىي, بايقوڭىر, جاڭاوزەن, اقسۋ, ەكىباستۇز, ارىس, كەنتاۋ قالالارىنىڭ تۇرعىندارى ءۇشىن قولجەتىمدى.
ونلاين قىزمەت كورسەتۋ تۋرالى تولىق اقپاراتتى www.enbek.kz سايتىندا جانە حالىقتى جۇمىسپەن قامتۋ ورتالىعىندا الۋعا بولادى.
