بۇگىن تاڭەرتەڭ ساعات 5.40-تا پاترۋلدىك پوليتسيا پولكىنىڭ قىزمەتكەرلەرى تورۋىلداۋ بارىسىندا وزەن كوشەسىندەگى جەكە سەكتوردان ءتۇتىن شىعىپ جاتقانىن بايقاعان. ول ءۇيدىڭ شاتىرىنان شىعىپ جاتقان.
پاترۋلدىك پوليتسيا پولكىنىڭ ينسپەكتورلارى اعا لەيتەنانتتار ەرلان قاتاەۆ پەن اسان بالتاباەۆ دەرەۋ بارىپ, ەسىكتى بۇزىپ, ىشكە كىرگەن. ءورت پەشتەن شىققان. ءتۇتىن بولمەلەرگە تارالىپ ۇلگەرگەن ەكەن. قاراڭعىدا ولار ۇيىقتاپ جاتقان قىزدى تاۋىپ العان, ال كەلەسى بولمەدە ەكى ەر بالا ۇيىقتاپ جاتقان.
پوليتسيا بالالاردى وياتقان. بولمەدەن شىققان شۋدى ەستىپ, اناسى جۇگىرىپ كەلگەن. ءۇيدىڭ ورتەنىپ جاتقانىنان ول بەيحابار ەكەن. پوليتسيا قىزمەتكەرلەرى ايەل مەن ءۇش بالانى كوشەگە شىعارىپ, قىزمەتتىك كولىكتەرىنە جايعاستىرعان. ال وزدەرى ءورتتى وشىرۋگە كەتكەن. ءتارتىپ ساقشىلارى ءوز كۇشتەرىمەن, قولدا بار قۇرالدارمەن ءورتتى سوندىرگەن. كەيىن ەرلان كاتاەۆ بولعان وقيعا تۋرالى:
«بارلىعى وتە جىلدام بولىپ كەتتى. ءبىز ءۇشىن ەڭ باستىسى - ايەل مەن ونىڭ بالالارىن قۇتقارۋ. ەشكىم زارداپ شەككەن جوق», دەدى.
ەۆاكۋاتسيا اياقتالعاننان كەيىن وقيعا ورنىنا جەدەل قىزمەتتەر كەلدى. ۇيلەسىمدى جانە كاسىبي ءىس-ارەكەتتىڭ ارقاسىندا پوليتسەيلەر ايەل مەن ونىڭ 15, 9 جانە 13 جاسار ءۇش بالاسىنىڭ ءومىرىن ساقتاپ قالدى. وتاعاسى پوليتسيا قىزمەتكەرلەرىنە شىن جۇرەكتەن العىسىن جەتكىزدى.
