تاۋەلسىزدىك داۋىرىندە انا ءتىلىمىزدى دامىتۋ ءۇشىن بارلىق جاعدايدىڭ جاسالعانىن العا تارتقان مەملەكەت باسشىسى وسى ارالىقتا قازاق تىلىندە ءبىلىم بەرەتىن مەكتەپتەر مەن وقۋ ورىندارىنىڭ, بالاباقشالاردىڭ سانى ەسەلەپ كوبەيگەنىن اتاپ ءوتتى.
«بۇگىندە مەملەكەتتىك ءتىلدى بىلەتىن قازاقتىڭ دا, وزگە ەتنوس وكىلدەرىنىڭ دە ۇلەسى ەداۋىر ارتتى. قازاق ءتىلىن, شىن مانىندە, بۇكىل حالقىمىزدى بىرىكتىرۋشى فاكتورعا اينالدىرۋدىڭ بارلىق قۇقىقتىق تاسىلدەرى جانە كەپىلدىكتەرى قالىپتاستى. ماسەلە – نيەتتە. نيەتتىڭ دۇرىس بولۋى قازاق ءتىلىن مەڭگەرگىسى كەلەتىن ادامدارعا دا, وسى ماقساتقا جەتۋگە جاعداي جاسايتىن ۇكىمەتكە دە بايلانىستى», - دەدى قاسىم-جومارت توقاەۆ.
پرەزيدەنتتىڭ ايتۋىنشا, ءتىل يگەرۋ ءۇشىن بالالار ادەبيەتىنىڭ اتقاراتىن ءرولى زور. سوندىقتان قازاق قالامگەرلەرىنىڭ ۇزدىك شىعارمالارىنا قوسا, بالالارعا ارنالعان شەتەل جازۋشىلارىنىڭ دا تاڭداۋلى تۋىندىلارىن اۋدارىپ, كوپتەپ باسىپ شىعارۋدى جانە تاراتۋدى قولعا العان ءجون. وعان سۇرانىس تا زور.
مەملەكەت باسشىسى قازاق ءتىلىن ءبىلۋ – قازاقستاننىڭ ءاربىر ازاماتىنىڭ پارىزى, ءتىپتى مىندەتى دەپ تە ايتۋعا بولاتىنىن جەتكىزدى.
«وسى ورايدا مەن بارشا قازاقستاندىقتارعا, ونىڭ ىشىندە قازاق ءتىلىن ءالى جەتە مەڭگەرمەگەن وتانداستارىما ۇندەۋ تاستاعىم كەلەدى. جاستار اعىلشىن ءتىلىن نەمەسە باسقا دا تىلدەردى از عانا ۋاقىتتا مەڭگەرە الاتىنىن كورىپ وتىرمىز. تۇتاس بۋىن الماسقان وسى جىلداردا قازاق ءتىلىن ۇيرەنگىسى كەلگەن ادام ونى الدەقاشان ءبىلىپ شىعار ەدى. حالقىمىزدا «ەشتەن كەش جاقسى» دەگەن ءسوز بار. ەڭ باستىسى, ىنتا بولۋى كەرەك», - دەدى پرەزيدەنت.
قاسىم-جومارت كەمەل ۇلى انا ءتىلىمىزدى كەڭىنەن قولدانۋ – باسقا تىلدەرگە, اسىرەسە ورىس تىلىنە شەكتەۋ قويىلادى دەگەن ءسوز ەمەس ەكەنىن دە اتاپ ءوتتى.
پرەزيدەنتتىڭ ايتۋىنشا, بارشا ەتنوس وكىلدەرىنىڭ انا ءتىلىن, سالت-ءداستۇرىن دامىتۋعا مۇمكىندىك جاسالا بەرەدى. سونداي-اق, ماقالادا جاستارعا بىرنەشە ءتىل ءبىلۋ وزدەرىنىڭ كوكجيەگىن كەڭەيتىپ, كوكىرەك كوزىن وياتاتىنىن جەتە تۇسىنگەنى ابزال ەكەنى دە باسا ايتىلعان.
