«توتاليتارلىق كەزەڭدە ۇلتتىق قۇندىلىقتارىمىزدان, تىلىمىزدەن, ءدىلىمىز بەن دىنىمىزدەن ايىرىلىپ قالا جازدادىق. ونىڭ ءبارى تاۋەلسىزدىكتىڭ ارقاسىندا حالقىمىزعا قايتا ورالدى. بىراق, ۇلت پەن ەل رەتىندە ساقتالىپ قالۋ ءۇشىن بۇگىنگى جانە بولاشاق ۇرپاق جاڭا سىن-قاتەرلەرگە دايىن بولۋى كەرەك», - دەپ جازدى قاسىم-جومارت توقاەۆ.
وسى ورايدا پرەزيدەنت پاندەميا سالدارىنان بۇكىل الەم بۇرىن بولماعان جاڭا سىناقتارمەن بەتپە-بەت كەلگەنىن ءسوز ەتتى.
«ەكونوميكالىق, الەۋمەتتىك, ەكولوگيالىق, بيولوگيالىق جانە باسقا دا قاتەرلەرگە قوسا, جەر جۇزىنە جاعىمسىز يدەولوگيالىق ۆيرۋستار دا جايىلىپ كەلەدى. جاھاندانۋ كەزىندە ەل جات جۇرتتىڭ ىقپالىنا بەيسانالى تۇردە ىلەسىپ كەتكەنىن اڭعارمايدى. باسقاشا ايتقاندا, ماجبۇرلىكتەن ەمەس, ساناسىنىڭ ۋلانۋى ارقىلى ءوز ەركىمەن تورعا تۇسەدى. سوندىقتان, جاڭا زاماننىڭ جاقسى-جامانىن ەكشەپ, ارتىقشىلىقتارىن بويعا سىڭىرۋمەن قاتار, تامىرىمىزدى بەرىك ساقتاۋىمىز قاجەت. ۇلتتىق بولمىسىمىزدان, ءتول مادەنيەتىمىز بەن سالت-داستۇرىمىزدەن اجىراپ قالماۋ – بارلىق وركەنيەتتەر ميداي ارالاسقان الاساپىراندا جۇتىلىپ كەتپەۋدىڭ بىردەن ءبىر كەپىلى», - دەلىنگەن مەملەكەت باسشىسىنىڭ ماقالاسىندا.
