ەستەرىڭىزگە سالا كەتسەك, مەملەكەت باسشىسى ق.توقاەۆ «وزدەرىڭىز سياقتى وزىق ويلى, باسەكەگە قابىلەتتى ماماندار ەلىمىزگە وتە قاجەت. جالپى, بۇل – جاس بۋىن وكىلدەرىنىڭ جاۋاپتى قىزمەتكە كەلۋى ءۇشىن جاسالىپ وتىرعان يگى باستاما. وسى رەتتە وزدەرىڭىز سياقتى ءبىلىمدى ءارى تالاپتى ازاماتتارعا ۇلكەن ءۇمىت ارتامىز. سىزدەر جاڭا قازاقستاننىڭ دامۋىنا ايانباي ۇلەس قوساسىزدار دەپ سەنەمىن. ەلىمىزدىڭ الدىندا بيىك ماقساتتار تۇر. ەڭ الدىمەن مەملەكەتىمىزدى ودان ارى وركەندەتىپ, تاۋەلسىزدىگىمىزدى نىعايتۋعا ءتيىسپىز. سونداي-اق, ازاماتتاردىڭ ءال-اۋقاتىن ارتتىرىپ, تۇرمىس ساپاسىن جاقسارتۋىمىز كەرەك» دەگەن ەدى.
ايتقانداي, ماڭىزدى باستاما ارقىلى وي-ءورىسى كەڭ, ءبىلىمى تەرەڭ, ەل ءۇشىن ەڭبەك ەتۋگە قۇلشىنىسى جوعارى جالىندى جاستار رەزەرۆى جاساقتالىپ جاتىر. 2019 جىلى رەسپۋبليكا بويىنشا رەزەرۆكە ىرىكتەلگەن 300 جاستىڭ وتىزى شىعىسقازاقستاندىق ەدى. سولاردىڭ ءبىرى بۇگىندە ەنەرگەتيكا جانە تۇرعىن ءۇي كوممۋنالدىق شارۋاشىلىعى باسقارماسىنىڭ باسشىسى قىزمەتىن اتقارىپ جۇرگەن – المات اقىشوۆ. پرەزيدەنتتىك جاستار رەزەرۆىنە ءوتىپ, جاس تا بولسا باس بولىپ جۇرگەن المات تالعات ۇلىمەن اڭگىمەلەسكەن ەدىك.
– ەگەمەن ەلدە تۋعان سوڭ ءسىزدىڭ ويلاۋىڭىز دا, ارمان-ماقساتىڭىز دا باسقا. ەل ەتەك-جەڭىن ەندى جيىپ جاتقان كەزدە ەس ءبىلدىڭىز, وقىدىڭىز. باسشىلىق قىزمەتكە توپ ەتىپ توبەدەن تۇسپەگەنىڭىزدى دە بىلەمىز.
– ءيا, بابالارىمىز كورگەن قيىندىقتى كورمەسەك تە الماعايىپ زاماننىڭ ءبىر شەتىن كورىپ قالدىق. نەسىن جاسىرامىن؟! كىشكەنتاي كۇنىمىزدە وسكەمەننىڭ شەت جاعىنداعى جاتاقحانانىڭ ءبىر بولمەسىندە تۇردىق. ءۇش بالامىز ءبىر ۇيدە. ورتادا بۋرجۋيكا پەش تۇراتىن. ءۇشىنشى قاباتتامىز, مۇرجاسىن تەرەزەدەن شىعارىپ قويعان. اكە-شەشەمىز بولسا, ءبىزدى اسىراۋ ءۇشىن تاڭنىڭ اتىسى, كەشتىڭ باتىسى تابانىنان تاۋسىلىپ ەڭبەك ەتەدى. كەيىن مارقاكولدىڭ شاناعاتتى دەگەن اۋىلىنان ءۇي بۇزىپ الىپ كەلىپ, قالاعا سالدىق. سوندا عانا, توعىزىنشى سىنىپ وقىپ جۇرگەندە ءوز بولمەم بولدى. اتا-اناما كومەكتەسەيىن دەپ مەتالل تاپسىردىق, بوتەلكە جينادىق. تاپقان تيىندى ۇيگە الىپ كەلەتىنمىن. قىسقاسى, ەڭبەكپەن بىتە قايناسىپ ءوستىم. ستۋدەنت كەزدە وفيتسيانت, شۆەيتسار, كوندۋكتور سياقتى جۇمىستاردى ىستەدىم.
تۋرا ءبىر جىل بۇرىن پرەزيدەنتتىك جاستار كادرلىق رەزەرۆىنە وتكەن سوڭ, 15 قاڭتاردا پرەزيدەنتپەن كەزدەستىك. سودان كەيىن وبلىس اكىمى دانيال احمەتوۆتىڭ قابىلداۋىنا كىردىم. سوندا اكىم ىستەگەن قىزمەتىمنىڭ ءتىزىمىن قاراپ وتىرىپ, كوپ جەردە ىستەپسىڭ عوي دەپ جىلى جىميدى. سويتسەم الگى قاعازدا شۆەيتسار, كوندۋكتور بولىپ ىستەگەنىمنىڭ ءبارى جازىلىپ تۇر ەكەن. ءسويتىپ سول جەردەن اياگوز
اۋدانىنا قىزمەتكە جىبەردى. ءومىرى بولىپ كورمەگەن اۋدانعا اكىمنىڭ ورىنباسارى بولىپ, جۇمىسقا باردىم.
– «بيلىك پەن حالىق اراسىنداعى ءوزارا سەنىمدى كۇشەيتۋ – ماڭىزدى مىندەت» بۇل پرەزيدەنتىمىز قاسىم-جومارت توقاەۆتىڭ ءسوزى. ءسىز شە, مەملەكەتتىك قىزمەتتە ءجۇرىپ, حالىق ءۇمىتىن اقتاي الىپ ءجۇرسىز بە؟
– قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىندا وقىپ جۇرگەندە, ۇستازدارىمىز «حالىققا جاقىن بولۋ كەرەك» دەگەندى ۇنەمى ميىمىزعا قۇيىپ وتىردى. وقۋدى بىتىرگەن سوڭ ۇلان اۋدانى اكىمدىگىنە اپپارات جەتەكشىسى بولىپ كەلدىم. سوندا اقىلداسا وتىرىپ, اكىمدىك ىشىندە كولدەنەڭ تۇرعان توسقاۋىل تەمىردى العىزىپ تاستادىق. ياعني اكىمدىككە كەلگەن تۇرعىندار كەدەرگىسىز ىشكە ەنەدى. بۇل پسيحولوگيالىق تۇرعىدا حالىقتى بيلىككە جاقىنداتۋ ەدى. سونىمەن قاتار ءبىرىنشى قاباتقا اكىمنىڭ ازاماتتاردى قابىلداۋ بولمەسىن جاسادىق. سۇراقپەن كەلگەن تۇرعىنداردى اكىم كۇتتىرىپ قويمايدى, كەرىسىنشە, ءوزى دە ءبىر قادام جاساپ, الدارىنان شىعادى. تاعى ءبىر ايتا كەتەرلىگى, حالىقپەن بىرلەسىپ, اياگوزدەگى جىلۋ قازاندىعىنىڭ ماسەلەسىن شەشتىك.
– مەملەكەتتىك قىزمەتكەرلەرگە دەگەن حالىقتىڭ كوزقاراسى وزگەرگەن. پاراقورلىق, جەمقورلىق تا جوق ەمەس. بۇل جونىندە جاس كادر رەتىندە نە ايتار ەدىڭىز؟
– ەرتەڭ بىرەۋ اكەمە كەلىپ, ء«اي سەنىڭ ۇلىڭ جارادى» دەسە, ەڭ ۇلكەن ماراپات مەن ءۇشىن سول. سوندىقتان دا ءوزىم ادال قىزمەت ەتۋگە تىرىسامىن. ورايى كەلگەندە ايتا كەتەيىن, كوررۋپتسيانىڭ ءۇش دەڭگەيى بار ەكەن. ءبىرىنشىسى – زاڭنان قورقۋ, ەكىنشىسى – قوعامنىڭ كوزقاراسىنان قورقۋ, ءۇشىنشىسى – ادامنىڭ وزىنەن قورقۋى. مىسالى, دامىعان مەملەكەتتەر ۇشىنشىسىنە جەتىپ قويىپتى. ول جاقتا كوپشىلىك قىزمەتكەرلەر ار-ابىرويىن جوعارى قويادى. ال ءبىز شە, ءبىز تەك زاڭنان قورقامىز. دەگەنمەن, زامان وزگەرىپ كەلەدى. ءوزىم اقش, جاپونيا, گەرمانيا سىندى مەملەكەتتەردە بولدىم. سالىستىرىپ قاراسام, ول جاقتا مەملەكەتتىك قىزمەتكەرلەردىڭ جالاقىسى جوعارى ەكەن. مەنىڭ ويىمشا, جەمقورلىقتى جويۋدىڭ بىردەن-ءبىر جولى – جالاقىنى كوتەرۋ. ايتپەسە ۇشقىر ويلى, ءبىلىمدى, مىنەزدى, نامىستى جاستار بار. ولار ەل ءۇشىن ەڭبەك ەتكىسى-اق كەلەدى. بىراق وتباسىلارىن اسىراۋ ءۇشىن جوعارى جالاقىلى جۇمىستارعا كەتىپ قالىپ جاتادى.
– كىمدەردى يدەال تۇتاسىز؟
– الاشوردا كوسەمى ءاليحان بوكەيحانداردى ايتامىن, «ۇلتقا قىزمەت ەتۋ بىلىمنەن ەمەس, مىنەزدەن» دەپ ۇلت مۇددەسى ءۇشىن ومىرلەرىن باسكە تىكتى. شىن, ءبىلىمىڭ بولا تۇرا, مىنەزىڭ بولماسا ءبىلىمىڭدى قايتىپ پايدالانباقسىڭ؟! سونداي-اق شەكارانى شەگەلەپ, جاڭا استانا سالىپ بەرگەن ەلباسىمىزدىڭ ەڭبەگىنە باس يەمىن. بۇگىنگى پرەزيدەنتىمىز قاسىم-جومارت كەمەل ۇلى قانداي سابىرلى, بايىپتى ازامات. كوپ جاعدايدى اشىق ايتۋعا تىرىسادى. وبلىسىمىزدىڭ اكىمى دانيال كەنجەتاي ۇلىنىڭ تاجىريبەسىنەن كوپ ۇلگى الۋعا بولادى. ءىستىڭ ادامى. اربىرەۋىمىز ادال قىزمەت ەتىپ, ارتىمىزدا اتىمىزدى قالدىرساق, حاتىمىزدى قالدىرساق دەيمىن.
P.S. ءيا, «جاس كەلسە, ىسكە» دەمەي مە؟! پرەزيدەنتتىك جاستار كادرلىق رەزەرۆىنە وتكەن سوڭ ەلدىڭ ەرتەڭى ءۇشىن تەڭىزگە تامعان تامشىداي بولسىن ۇلەس قوسقان ءجون شىعار. مەملەكەت ارتقان سەنىمدى جاستارىمىز اقتاپ جاتسا, بولاشاعىمىز جارقىن بولارى انىق.
شىعىس قازاقستان وبلىسى
