دۇلەي قارلى بوراندار اقش-تىڭ وڭتۇستىكتەگى شتاتتارى اۋماعىن شات-شالەكەي ەتۋىن جالعاستىرىپ جاتىر. كۇشتى جەلدىڭ اسەرى مەن سىمداردىڭ قاتىپ قالۋىنان ءۇزىلىپ كەتىپ جاتقان ەلەكتر قۋاتى جەلىلەرى ىستەن شىعۋلارىنا بايلانىستى نەگىزىنەن تەحاس شتاتىنىڭ 130 مىڭع جۋىق تۇتىنۋشىسى جارىقسىز قالىپ وتىر. بۇل تۋرالى يتار-تاسس حابارلادى.
اۋا رايىنىڭ قيىن جاعدايىنان مىڭنان استام اۆيارەيستەر توقتاتىلىپ تاستالدى. اۆياتسيا بيلىگىندەگىلەردىڭ مالىمەتىنشە, 3,5 مىڭ ادام داللاس اۋەجايىندا (تەحاس شتاتى) تۇنەپ شىعۋعا ءماجبۇر بولعان. بيلىك وكىلدەرى ادامداردان بارىنشا سابىرلىلىق تانىتۋدى, مۇمكىندىگى بولعانىنشا جەكە كولىكتەرىمەن جولعا شىقپاۋدى, سونداي-اق اسا ءبىر قاجەتتىلىك بولماسا, كوشەگە دە شىعا بەرمەۋدى ءوتىنىپ جاتىر.
اۋا رايىنىڭ قولايسىز جاعدايى كوپتەگەن جول-كولىك وقيعالارىنىڭ ورىن الۋلارىنا دا سەبەپكەر بولۋدا. قازىر كەيبىر جولدارداعى مۇزدىڭ قالىڭدىعى 8 سانتيمەترگە دەيىن جەتكەن. داللاستاعى تەمپەراتۋرا قازىر نولدەن 4 گرادۋس تومەن بولىپ تۇر. ادەتتە جىلدىڭ بۇل مەزگىلىندە مۇنداعى اۋا رايى 15 گرادۋستىق جىلىلىقتى كورسەتەدى ەكەن.
جەرگىلىكتى بيلىك جەكسەنبىدە 25 مىڭ ادامنىڭ قاتىسۋىمەن وتەتىن بولىپ بەلگىلەنگەن مارافوندى توقتاتىپ قويدى.
اقش ۇلتتىق اۋا رايى قىزمەتىنىڭ مالىمەتىنشە, قازىرگى تاڭدا اسا قۋاتتى سالقىن اۋا تولقىنى بىرتىندەپ شىعىس جاعالاۋعا قاراي جاقىنداپ كەلەدى. جاقىن ارادا سولتۇستىك اۋدانداردا كۇشتى قار مەن مۇزدى جاڭبىر جاۋى, وڭتۇستىكتە نوسەر جاۋىننىڭ ورىن الۋى كۇتىپ تۇر.
ساكەن مايلىباي.
دەرەككوز: يتار-تاسس.
