• 07 جەلتوقسان, 2013

«ەۋرازيا بارىسى»: باس جۇلدە – قازاقستان قۇراماسىندا

373 رەت

كورسەتىلدى

3 مين

وقۋ ءۇشىن

Egemen Qazaqstan

07-12-13-taraz-2

بۇگىن, 7 جەلتوقسان كۇنى تارازدا«ەۋرازيا بارىسى» ءتۋرنيرى مارەگە جەتتى. ونىڭ باس بايگەسىن قازاقستان قۇراماسى جەڭىپ ءالدىى. بۇل تۋرالى www.egemen.kz ءتىلشىسى حابارلادى. تۋرنيرگە قازاقستان, موڭعوليا, تۇركيا, يران, تاجىكستان, پولشا, رەسەي جانە قىتاي ەلىنىڭ قۇرامالارى قاتىستى. ەكىنشى اينالىمدا قازاقستان مەن تاجىكستاندى, موڭعوليا رەسەيدى 5:0 ەتىپ ۇتتى. بۇدان ءارى جۇباتۋ كەزدەسۋلەرى باستالىپ كەتتى. ول باۋىرلاس تاجىك جانە پارسى پالۋاندارى اراسىنداعى شايقاسپەن ارنا تارتتى. كەزدەسۋ تاجىكتەردىڭ يراندىقتاردى 4:1 ەتىپ جەڭۋىمەن ءبىتتى. رەسەي پالۋاندارى تۇركيانى ءدال وسىنداي ەسەپپەن ۇتتى. سودان سوڭ قىتاي جانە پولشا كوماندالارى 7-8 ورىندار ءۇشىن تالاستى. وندا پولياكتار 3:2 ەسەبىمەن باسىم ءتۇستى. بۇدان كەيىن 5-6 ورىندار ءۇشىن يران جانە تۇركيا تالاسىپ, پارسىلار 4:1ەتىپ ۇتىپ شىقتى. ال 3-4 ورىندار ءۇشىن تالاس رەسەي جانە تاجىكستان قۇرامالارى اراسىندا ءوتتى. ورىستار بۇل كەزدەسۋگە جاراقات الىپ قالعان ءبىر سپورتشىسىنسىز شىقتى. ول الدىن الا ءبىر ۇپايدى بەرىپ قويدى دەگەن ءسوز. مىنە, وسى ولقىلىقتى رەسەيلىك فيليپپوۆ ءبىرىنشى شايقاستا تازا جەڭىسكە جەتىپ, تولتىرىپ بەردى. بۇدان ءارى تارتىس قىزا ءتۇستى. سەبەبى, تاعى ءبىر تاجىك جەڭىسكە جەتتى دە, كومانداسىن العا شىعاردى. سول كەزدە كىلەمگە شىققان رەسەيلىك ارتەم كوۆالەۆسكي قارسىلاسىن بىردەن تازا جەڭدى دە, جالپى ەسەپتى 2:2-گە جەتكىزدى. ءبارىن سوڭعى بەلدەسۋ شەشتى. وندا رەسەيلىك دميتري ميحالەۆ اسا تارتىسپەن وتكەن جەكپە-جەكتە تاجىك اتلەتىن تىزە بۇكتىردى. بۇل رەسەي قۇراماسىنا ءۇشىنشى ورىن الىپ بەردى. فينالدا موڭعوليا جانە قازاقستان قۇرامالارى كەزدەستى. ادەتتەگىدەي كەزدەسۋدى 60 كيلوعا دەيىنگىلەر باستادى. ول اسا تارتىستى ءوتتى. دەگەنمەن, ءبىر مۇمكىندىگىن تاپقان ابزال ارىستانبەكوۆ تازا جەڭىسكە جەتتى. سودان كەيىن 70 كيلوداعى ەرلان ەستەننىڭ كەزەگى كەلدى. ول دا ءوزى ءۇشىن ۇپاي بەرۋمەن باستالعان بەلدەسۋدى اقىرىندا تازا جەڭىسپەن اياقتادى. ءۇشىنشى جۇپتا ەرسىن مۇحامەدجانوۆ كىلەمگە بەت الدى. شايقاس ەكى جاقتىڭ ءبىر-ءبىرىن بايقاۋىمەن ءوربىدى. مۇنداعى تەكەتىرەس ايقاستىڭ سوڭىنا دەيىن سوزىلدى. ول تەڭ بولىپ اياقتالدى. سوسىن تازا بەلدەسۋ ءتارتىبى بەرىلدى. وندا ەرسىن 3 سەكۋندتا موڭعولدى تازا جەڭىپ كەتتى. ءسويتىپ, باس جۇلدەنىڭ تاعدىرى شەشىلدى. ونى قازاقستان قۇراماسى وزىندە قالدىردى. بىراق ەكى ەل پالۋاندارى اراسىنداعى شايقاس جالعاسا بەردى. ءتورتىنشى جۇپتا مۇحيت تۇرسىنوۆ پەن موڭعوليالىق قازاق سەرىك بەردىمۇرات ۇستاستى. ەكەۋى ۇزاق ىرعاستى. ءبىر-ءبىرىن الۋلارى قيىنعا ءتۇستى. ەكى بارىس ءبىر-ءبىرىن الا المادى. سوسىن مۇحيت جولىن سەرىككە بەردى. ال سوڭعى سىناققا 196 كيلولىق موڭعول ءبىزدىڭ بەيبىت ىستىباەۆ قارسى شىقتى. ەكەۋىنىڭ اقىرىن اڭدىسۋىنىڭ ءبىر ساتىندە بەيبىت تاماشا ءادىس قولدانىپ, ەكى تسەنترەنرلىك قارسىلاسىن تازا جەڭدى. وسىمەن ەسەپ – 4:1. قازاقستان جەڭىس تويىن تويلادى. ءسويتىپ, تۋرنيرگە قاتىسۋشى كوماندالار قورىتىندى كەستەدە بىلايشا ورنالاستى: 1.قازاقستان; 2. موڭعوليا; 3. رەسەي; 4. تاجىكستان; 5. يران; 6. تۇركيا; 7. پولشا; 8. قىتاي. داستان كەنجالين. دەرەككوز: Egemen.kz.