«ورىندار سانىن 30 پايىزدان اسىرماي, كورەرمەندەردى ەكى ورىن سايىن جانە قاتار بويىنشا شاحمات تارتىبىمەن وتىرعىزۋ ارقىلى, كۇشەيتىلگەن سانيتارلىق-ەپيدەميولوگيالىق نورمالاردى ساقتاي وتىرىپ كينوتەاترلاردىڭ جۇمىس جاساۋىنا رۇقسات ەتىلەدى. كينوتەاترلار جۇمىس, دەمالىس جانە مەرەكە كۇندەرى ساعات 10:00-دەن 24:00-گە دەيىن جۇمىس ىستەيدى. اكتسيالار وتكىزىلمەيدى. ەگەر كارانتين جانە شەكتەۋ شارالارىن بۇزۋ فاكتىسى انىقتالسا, كينوتەاترلاردىڭ جۇمىسى توقتاتىلادى», دەدى قالانىڭ باس سانيتارلىق دارىگەرى جاننا پىراليەۆا.
ەلوردا اكىمدىگى ءباسپاسوز قىزمەتىنىڭ مالىمەتىنشە, سونىمەن قاتار مەرەكە قارساڭىندا مەيرامحانالاردىڭ, كافەلەردىڭ, بارلاردىڭ, اسحانالاردىڭ جۇمىس ۋاقىتى ۇلكەن كەزەكتەر تۋىنداۋىنا جول بەرمەۋ ماقساتىندا ساعات 00.00-گە دەيىن ۇزارتىلادى.
بۇل رەتتە عيمارات ىشىندە 30 ورىننان ارتىق بولماۋى, سانيتارلىق-ەپيدەميولوگيالىق, سانيتارلىق-پروفيلاكتيكالىق شارالاردىڭ ساقتالۋى, ۇستەلدەر اراسىندا كەمىندە 2 مەتر الەۋمەتتىك اراقاشىقتىق ساقتالۋى, ءار ۇستەلگە 4-6 ادامنان ارتىق وتىرعىزىلماۋى كەرەك. بۇل قاۋلى تۇرعىن ۇيلەردە ورنالاسقان نىساندارعا قاتىستى ەمەس. ولاردىڭ جۇمىس ۋاقىتى - ساعات 22:00-گە دەيىن.
ويىن-ساۋىق, سپورتتىق جانە باسقا دا بۇقارالىق ءىس-شارالاردى, ونىڭ ىشىندە جاڭاجىلدىق ەرتەڭگىلىكتەردى, كورپوراتيۆتەردى وتكىزۋگە تىيىم سالىندى. كارانتين جانە شەكتەۋ شارالارى بۇزىلعان جاعدايدا نىساندار قىزمەتى توقتاتىلادى. بۇعان دەيىن حابارلاعانىمىزداي, ەلوردادا سۋپەرماركەتتەر مەن گيپەرماركەتتەرگە تاۋلىك بويى جۇمىس ىستەۋگە رۇقسات ەتىلدى.
