جاقىندا عانا قايتا قۇرىلعان «قارادالا» جانە ء«حانتاڭىرى» حالىق تەاترلارى العاشقى ونەر جارىسىنان ولجالى بولىپ جاتىر. ۇيعىر اۋدانىنداعى ونەر ۇجىمى بايقاۋن گران-پري يەلەنسە, رايىمبەك اۋدانىنداعى ونەرلى جاستاردىڭ قاتىسۋىمەن اشىلعان شىعارماشىلىق توپ ءبىرىنشى ورىن الدى. قوس ۇجىم گەرمانيانىڭ ماينداعى فرانكفۋرت قالاسىندا وتكەن «جىلدىڭ بەسىنشى ماۋسىمى» اتتى ونلاين فەستيۆالگە ابايدىڭ «ەسكەندىر» پوەماسى نەگىزىندە جاسالعان سپەكتاكل مەن اقيىق اقىن مۇقاعالي ماقاتاەۆتىڭ «اققۋلار ۇيىقتاعاندا» پوەتيكالىق-سازدى دراماسىن ۇسىنعان ەكەن. «قارادالا» مەن ء«حانتاڭىرىنىڭ» ونەرى حالىقارالىق دارەجەدەگى ونەر شەبەرلەرىنىڭ كوڭىلىنەن شىعىپ, بىردەن قوس جۇلدەلى ورىندى جەڭىپ الدى.
جالپى, بيىلعى ونلاين بايقاۋعا الەمنىڭ بىرنەشە ەلىنەن كاسىبي دراما تەاترلارى قاتىسىپتى. ونىڭ ىشىندە قىرىمنىڭ مۋزىكالىق تەاترى, كيپردىڭ «Dell Art» تەاترى, ەۋروپانىڭ بىرنەشە پلاستيكالىق تەاترى جانە ەكى ادەبي تەاتر, ءبىر حور تەاترى جانە باسقا دا تەاتر-ستۋديالار مەن بالالار تەاترلارىنىڭ ونەرى سىنعا تۇسكەن. سۇيىنەرلىگى, گەرمانيا, رەسەي, بەلورۋس ەلدەرىنىڭ تەاتر سىنشىلارى قازىلىق ەتكەن فەستيۆالدە جەتىسۋدىڭ جاڭادان اشىلعان حالىق تەاترلارىنىڭ قويىلىمى توپ جاردى.
حالىق تەاترلارىنىڭ حالىقارالىق بايقاۋعا قاتىسۋىنا بەلگىلى ونەر قايراتكەرى, اكتەر, رەجيسسەر اسقان نايمانتاەۆ ۇيىتقى بولعان ەكەن. جالپى, جەتىسۋلىقتار اسقان نايمانتاەۆتىڭ ەڭبەگىن بيىل تۇساۋى كەسىلگەن رايىمبەك اۋدانى مەن ۇيعىر اۋدانىنداعى اۋەسقوي ونەر ۇجىمدارىنىڭ ۇيىمداستارۋشى رەتىندە جوعارى باعالايدى. ونلاين فەستيۆالگە دە وسى ەكى تەاتردىڭ قاتىسۋىنا ءوز باتاسىن بەرىپتى. تاۋەلسىز جارىس بولعاسىن قاتىسۋشىلار قوماقتى جارنا تولەۋگە مىندەتتى بولعان. ال قاجەتتى قاراجاتتى ء«حانتاڭىرى» تەاترىن قاناتىنىڭ استىنا العان رايىمبەك اۋداندىق مادەنيەت ءۇيىنىڭ ديرەكتورى ەركىن راحىمجان مەن «قارادالا» تەاترىنىڭ نوقتا يەسى, ۇيعىر اۋداندىق مادەگنيەت ءۇيىنىڭ ديرەكتورى سالتانات ەرمۇحامبەتوۆا دەمەۋشىلەرگە جۇگىنىپ ءجۇرىپ تاپقان ەكەن.
«بۇل بايقاۋدى ۇيىمداسترۋشىلاردىڭ سايتىندا بۇرىننان تىركەلگەن ەدىم. فەستيۆال كوپجانرلى بايتسقاۋرەتىندە قىزىقتىرىپ جۇرگەن-ءدى. ءارى بايقاۋعا كاسىبي عانا ەمەس اۋەسقوي, ستۋدەنتتىك ءتىپتى بالالار تەاترلارى دا قاتىسا الادى ەكەن. شارتىن تۇگەل ورىنداپ, ەكى تەاتردى تىركەدىك. ءبىزدىڭ سپەكتاكلدەر ەۋروپالىقتارعا تىڭ تاقىرىپ بولعاندىقتان, سۇراق كوپ بولدى. ابايدىڭ «ەسكەندىر» پوەماسىن ە. ۆينوكۋروۆ دەگەن ادام ورىسشاعا اۋدارعان ەكەن, سونى تاۋىپ الىپ, قازىلارعا جىبەرگەمىن. ەۋروپالىقتارعا ەسكەندىر تۋرالى اڭىز قىزىقتى ەكەن, ءبىزدىڭ قويىلىمدى تىڭ جاڭالىق دەپ قابىلدادى», - دەيدى اسقار نايمانتاەۆ.
ايتۋىنشا, مۇقاعاليدىڭ «اققۋلار ۇيىقتاعاندا» شىعارماسىن ءوز سوزىممەن قىسقاشا مازمۇنداپ جازىپ جىبەرگەن.
«قويىلىم ۇناپتى. جوعارى باعا الدى. ايتپاقشى, مەن ءوتىنىش انكەتاسىنا ەكى تەاتردى دا «حالىق تەاترى» دەمەي, «تەاتر» دەپ جىبەرگەن ەدىم. ەندى ونى تولىق جازۋعا انكەتا پاراعىنداعى ورىن تار بولدى... ەسەسىنە, قازىلار القاسى «ەكى بىردەي مۋزىكا ءارى دراما تەاترىن اشىپسىڭدار, بۇل تاماشا جەتىستىك» دەپ تىلەكتەستىك ءبىلدىرىپتى», دەدى ول.
وسىلايشا, گەرمانيانىڭ ماينداعى فرانكفۋرت قالاسىندا وتكەن «جىلدىڭ بەسىنشى ماۋسىمى» اتتى ونلاين فەستيۆالىنىڭ باس جۇلدەسى مەن ءبىرىنشى ورنى اۋىلداعى ونەرلى اعايىنعا بۇيىردى.
