ارينە, بۇل جىلدار بىزگە جەڭىل تيمەدى. الەۋمەتتىك, ەكونوميكالىق, اۋىلشارۋاشىلىق, قۇرىلىس جانە باسقا دا بار سالانىڭ كىرپىشىن قايتا, جاڭا باعىتتا قالادىق. سونىڭ ىشىندە وتاندىق مەديتسيناعا دا ءبىرشاما وزگەرىس ەنگىزدىك. 29 جىل ىشىندە مەملەكەتىمىزدىڭ قالىپتاسىپ, الەمنىڭ بەتكە ۇستار دامىعان ەلدەرىنىڭ قاتارىنان كورىنگەنى – مەن ءۇشىن ماقتانىش.
وسىدان بىرنەشە كۇن بۇرىن ۇلتتىق عىلىمي مەديتسينالىق ورتالىقتىڭ ءبىر توپ عالىمدارى كوپ جىلدىق ەڭبەگى ءۇشىن جوعارى دارەجەلى ماراپاتقا لايىق بولىپ تانىلدى. «يننوۆاتسيالىق جاسۋشالىق تەحنولوگيالاردى ازىرلەۋ جانە كلينيكالىق مەديتسيناعا ەنگىزۋ» اتتى جۇمىسىمىز ءال-فارابي اتىنداعى عىلىم مەن تەحنيكا سالاسىنداعى مەملەكەتتىك سىيلىققا يە بولدى. بۇل جاسۋشالىق تەحنولوگيانىڭ پايدا بولىپ, دامۋى, ونىڭ قولدانۋى, ەمىنىڭ ادىستەرى مەن ناتيجەلەرى كورسەتىلگەن ۇلكەن ەڭبەكتى قامتيدى.
بۇگىنگى تاڭدا قازاقستاندىقتار ەۋروپا مەن ازيانىڭ مەديتسيناسى دەڭگەيىندە ەم الا الاتىنىن ايتا الامىز. وسىدان ءۇش ونجىلدىق بۇرىن ەمحانالاردا اۋرۋدى ەمدەۋ, ونىڭ الدىن الۋ جانە دياگنوستيكالاۋدا قولدانىلماعان تىڭ قۇرىلعىلار پايدا بولدى. ءبىزدىڭ ماماندار شەتەلدىڭ ۇزدىك كلينيكالارىندا بىلىكتىلىگىن ارتتىرىپ, وقىپ, تاجىريبە الماسۋعا بارىپ ءجۇر. وسىنىڭ ارقاسىندا وتانداستارىمىز جۇرەككە, ميعا, جاڭا تۋعان نارەستەگە جاسالاتىن كۇردەلى وتالاردى تەڭىز اسپاي, ءوز ەلىمىزدە جاساي الاتىن جاعدايعا جەتتىك.
بيىل الەم مەديتسيناسى ءۇشىن اۋىر جىل بولدى. Cوvid-19 كۇتپەگەن جەردەن پايدا بولىپ, ءوز ءىزىن قالدىردى. دەگەنمەن ءبىز وعان توسقاۋىل بولا الدىق. از ۋاقىتتىڭ ىشىندە ورتالىقتىڭ دارىگەرلەرى مەن مەدبيكەلەرى كۇندەلىكتى جۇمىستارىنان اۋىپ, شۇعىل رەجىمگە قوسىلدى. ءۇش اي بويى ولار اۋرۋحاناعا تۇسكەن ءاربىر ناۋقاسقا جوعارى دەڭگەيدە مەديتسينالىق كومەك كورسەتە ءبىلدى. ۇيلەرىنە بارماي, اتا-اناسىن, جۇبايلارى مەن جارلارىن, بالالارىن كورمەي تىنىمسىز ەڭبەك ەتتى. ۇجىمنىڭ توپتىق جۇمىسى ارقاسىندا جۇزدەگەن ءومىر قۇتقارىلىپ, ناۋقاستار امان-ەسەن ۇيلەرىنە ورالدى.
پاندەمياعا قارسى كۇرەستە مەملەكەتتىڭ زور قولداۋىن سەزىندىك. ءار باستامامىزدى قولداپ, جەتىسپەگەن مەديتسينالىق قۇرىلعىلاردى تەز ارادا ساتىپ الۋ, جەتكىزۋ سىندى ماسەلەلەردە قول ۇشىن سوزدى دەسەك بولادى.
اباي بايگەنجين,
ۇلتتىق عىلىمي مەديتسينالىق ورتالىقتىڭ باسقارما توراعاسى,
ءال-فارابي اتىنداعى مەملەكەتتىك سىيلىقتىڭ يەگەرى
