كۇن تارتىبىندەگى ماسەلە بويىنشا وسك توراعاسىنىڭ ورىنباسارى كونستانتين پەتروۆ بايانداما جاسادى. ول سايلاۋ زاڭناماسىنا سايكەس, سايلاۋشى ءوزىنىڭ بولاتىن جەرىن اۋىستىرعان كەزدە بيىلعى 26 جەلتوقساننان باستاپ 2021 جىلعى 9 قاڭتار ساعات 18-00-گە دەيىن داۋىس بەرۋ قۇقىعىن بەرەتىن ەسەپتەن شىعارۋ كۋالىگىن الۋعا قۇقىلى ەكەنىن حابارلادى. ەسەپتەن شىعارۋ كۋالىگىن ءتيىستى سايلاۋ كوميسسياسى ءوتىنىش پەن جەكە كۋالىكتى ۇسىنۋ نەگىزىندە بەرەدى. بۇل كۋالىكتى كورسەتكەن كەزدە ۋچاسكەلىك سايلاۋ كوميسسياسى داۋىس بەرەتىن كۇنى سايلاۋشىنى ونىڭ بولاتىن جەرى بويىنشا سايلاۋ ۋچاسكەسىندەگى تىزىمگە ەنگىزەدى. جوعالعان كۋالىكتەر قالپىنا كەلتىرىلمەيدى, سونداي-اق كوشىرمەسى بەرىلمەيدى. ءبىر مەزگىلدە بىرنەشە سايلاۋ وتكىزگەن كەزدە ورتالىق سايلاۋ كوميسسياسى سايلاۋدىڭ ءاربىر ءتۇرى بويىنشا ەسەپتەن شىعارۋ كۋالىگىنىڭ ءارتۇرلى ءتۇسىن بەلگىلەيدى, ءاربىر ەسەپتەن شىعارۋ كۋالىگىندە سايلاۋ ناۋقانىنىڭ اتاۋى كورسەتىلەدى.
كوميسسيا توراعاسى بەرىك يماشەۆ سايلاۋشىلاردى بەلسەندىلىك تانىتىپ, داۋىس بەرۋ قۇقىعىن قولدانۋعا شاقىردى.
ورتالىق سايلاۋ كوميسسياسىنىڭ مۇشەسى اناستاسيا ششەگورتسوۆا ءوز بايانداماسىندا سايلاۋ الدىنداعى جاريا پىكىرسايىستاردى وتكىزۋ ماسەلەسىنە توقتالدى. ءماجىلىس دەپۋتاتتىعىنا كانديداتتارىنىڭ ءتىزىمىن ۇسىنعان ساياسي پارتيالار وسك ۇيىمداستىراتىن تەلە پىكىرسايىستارعا قاتىسۋعا قۇقىلى. سايلاۋ الدىنداعى پىكىرسايىستاردى وتكىزۋ قاعيدالارى مەن شارتتارى ورتالىق سايلاۋ كوميسسياسىنىڭ 2018 جىلعى 28 تامىزداعى قاۋلىسىمەن بەكىتىلگەن. قۇجاتتىڭ 4-تارماعىنا سايكەس وسك پىكىرسايىستاردى وتكىزۋ تۋرالى شەشىم قابىلدانعان كەزدەن باستاپ كۇنتىزبەلىك بەس كۇن ىشىندە تەلەارنانى انىقتاپ, پارتيالاردىڭ پىكىرسايىس وتكىزۋ كۇنى, ۋاقىتى مەن ورنى تۋرالى جازباشا حاباردار ەتەدى. ورتالىق سايلاۋ كوميسسياسى پىكىرتالاستى 2020 جىلدىڭ 30 جەلتوقسانىندا وتكىزۋ تۋرالى قاۋلى قابىلدادى.
اقپارات جانە قوعامدىق دامۋ مينيسترلىگى تەلەۆيزيالىق سايلاۋالدى پىكىرسايىستى «حابار» تەلەارناسىندا وتكىزۋدى ۇسىنعان. تەلەارنا ءوز كەزەگىندە پىكىرسايىستى وتكىزۋ رەگلامەنتىن ازىرلەپ, كەلىسۋ ءۇشىن ورتالىق سايلاۋ كوميسسياسىنا جىبەردى. اتاپ ايتقاندا, وندا قاتىسۋشىلارعا قويىلاتىن جالپى تالاپتار, ءسوز سويلەۋ كەزەگى, وتكىزۋ ءتىلى مەن ۇزاقتىعى كورسەتىلگەن. رەگلامەنت جوباسى «سايلاۋ تۋرالى» كونستيتۋتسيالىق زاڭنىڭ تالاپتارىنا, سونداي-اق سايلاۋ الدىنداعى پىكىرسايىستاردى وتكىزۋ قاعيدالارى مەن شارتتارىنا سايكەس كەلەدى. وسىعان بايلانىستى, وسك تەلەۆيزيالىق پىكىرسايىستى «حابار» ارناسىندا وتكىزۋ تۋرالى قاۋلى قابىلداپ, ءىس-شارانى وتكىزۋ رەگلامەنتىن بەكىتتى.
سونداي-اق ساياسي پارتيالار بەكىتكەن پىكىرسايىس قاتىسۋشىلارىنىڭ قۇرامى انىقتالدى. ولار: ADAL پارتياسىنان – پارتيا ساياسي كەڭەسىنىڭ مۇشەسى ەلدار جۇماعازيەۆ, «اق جول» قازاقستاننىڭ دەموكراتيالىق پارتياسىنان – پارتيا توراعاسى ازات پەرۋاشەۆ, «اۋىل» حالىقتىق-دەموكراتيالىق پاتريوتتىق پارتياسىنان – پارتيا توراعاسى ءالي بەكتاەۆ, قازاقستان حالىق پارتياسىنان – پارتيا توراعاسى ايقىن قوڭىروۆ جانە Nur Otan پارتياسىنان – پارتيا توراعاسىنىڭ ءبىرىنشى ورىنباسارى باۋىرجان بايبەك.
وتىرىسقا ساياسي پارتيالاردىڭ, اقپارات جانە قوعامدىق دامۋ مينيسترلىگىنىڭ, «حابار» اگەنتتىگىنىڭ, ەقىۇ/دياقب ميسسياسىنىڭ وكىلدەرى جانە اۋماقتىق سايلاۋ كوميسسيالارى قاتىستى.
