سۋرەتتە: ەكسكۋرسيا جەتەكشىسى قۋانىش تىنىبەك جۇمىس ۇستىندە (وڭ جاقتا)
قۋانىش تىنىبەك قاراعاندىداعى ورتالىق قازاقستان اكادەمياسىن 2011 جىلى تامامداعاننان كەيىن ءساتىن سالىپ, تەمىرتاۋداعى تۇڭعىش پرەزيدەنتتىڭ تاريحي-مادەني ورتالىعىنا جۇمىسقا تۇردى. راسىن ايتقاندا, بۇل جەرگە تىرناق ىلىكتىرۋدىڭ ءوزى دە وڭاي بولماپتى. تالاپتى دا تاباندى جاس بىرنەشە كەزەڭنەن تۇراتىن سىناقتان ءوتىپ, سول كەزدە جاڭادان اشىلعان مەكەمەگە العاشقىلاردىڭ ءبىرى بولىپ جۇمىسقا تۇرعان.
باسىندا مۋزەي قاراۋشىسى, كەيىن ەكسكۋرسيا جەتەكشىسى قىزمەتىنە بەكىتىلدى. بۇگىندە وسى قىزمەتتى ۇرشىقشا ءۇيىرىپ اكەتكەن. بۇل جەرگە كەلەتىن سانداعان دەلەگاتسيانى قارسى الىپ, مينيستر, دەپۋتاتتاردان باستاپ مەكتەپتەگى وقۋشىعا دەيىنگى قاۋىمنىڭ بارلىعىن مول ماعلۇماتپەن سۋسىنداتىپ, رۋحاني تۇرعىدا ريزا قىلىپ شىعارىپ سالۋ – ايتقانعا عانا وڭاي شارۋا. بۇعان تەرەڭ ءبىلىم, شەشەن ءتىل, قاجىر-قايرات كەرەك.
ورتالىقتا قۋانىش قىر-سىرىن, تاريحىن بىلمەيتىن ەكسپونات جوق دەسە دە بولادى. «بۇل ورتالىقتىڭ اۋراسى عاجاپ! مۇنداعى مەملەكەتىمىزدىڭ نەگىزىن قالاعان تۇڭعىش پرەزيدەنتكە, تەمىرتاۋ ماگنيتكاسىنا قاتىستى ءاربىر ەكسپوناتتىڭ ايتار سىرى مول, تەرەڭدە جاتقان تاريحى سان-قيلى. ماعان, مىسالى, ەلباسىنىڭ التىن جالاتىلعان جىپپەن ورنەكتەلگەن اتاتەك شەجىرەسى كەرەمەت اسەر ەتەدى. بۇل تۋىندىعا قاراپ تۇرىپ, تاريحي تۇلعانىڭ تەكتى تۇقىمنان تامىر تارتقانىنا كوز جەتكىزەسىز. سونان سوڭ ورتالىققا 2018 جىلى اكەلىنگەن «مەرسەدەس-بەنتس» اۆتوكولىگى دە وتە قۇندى جانە كەلۋشىلەر اسا قىزىعۋشىلىق تانىتاتىن ەكسپوناتتىڭ بىرىنەن سانالادى. بۇل اۆتوكولىك تۇڭعىش پرەزيدەنتكە تالاي جىل سەنىمدى قىزمەت ەتكەن», دەيدى ول جۇمىسى جايلى ايتقاندا شابىتتانا ءتۇسىپ.
قۋانىش ەڭبەك ەتەتىن تاريحي-مادەني ورتالىق تەمىرتاۋداعى قوعامدىق-بۇقارالىق-ساياسي ءىس-شارالاردى ۇيىمداستىراتىن, مەملەكەت باسشىسىنىڭ جولداۋلارى مەن ەلىمىزدىڭ باستى ساياسي باعدارلامالارىنىڭ جۇزەگە اسىرىلۋىن قامتاماسىز ەتۋشى ىرگەلى مەكەمەنىڭ ءبىرى. ورتالىقتا تەك قانا تۇڭعىش پرەزيدەنتكە قاتىستى تاقىرىپ قانا قامتىلعان دەپ ويلاعان ادام قاتتى قاتەلەسەدى. بۇل جەردە ەلىمىزدىڭ, قاراعاندى وبلىسىنىڭ, تەمىرتاۋ قالاسىنىڭ تاريحىنا قاتىستى وتە باي جانە مازمۇندى ماعلۇمات قورى جيناقتالعان.
«ورتالىققا كەلۋشىلەر سانى پاندەمياعا دەيىن جىلىنا 25 مىڭ ادامنان اسىپ تۇسەتىن. قازىر كارانتيندىك شەكتەۋلەرگە بايلانىستى كەلۋشىلەر قاتارىنىڭ سيرەگەنى راس. دەگەنمەن ءبىز زامان تالابىنا ساي ونلاين رەجىمدە جۇمىس ىستەۋدى مەڭگەردىك. جاڭا پىشىمگە اۋىسىپ, الەۋمەتتىك جەلىلەردىڭ الەۋەتىن پايدالانا باستادىق. ونلاين-ەكسكۋرسيالار ۇيىمداستىرىپ, سايتقا بەينەبايان, ءتۇرلى روليك جاساپ سالامىز», دەيدى ءاربىر ءىسى تىندىرىمدى قۋانىش تىنىبەك.
قۋانىشتى بەساسپاپ مامان دەسە دە بولادى. ول الگى بەينەبايان مەن روليكتەردىڭ ستسەناريىن ءوزى جازىپ, مونتاجداپ, باسىنان اياعىنا دەيىن ءوزى جاساپ شىعارادى. وسى شارۋالاردىڭ ءبارىن ول ءوز ىسىنە دەگەن ۇلكەن سۇيىسپەنشىلىكپەن اتقارادى. سودان دا بولار, ول بىتىرگەن جۇمىستار ساپالى شىعىپ, جوعارىداعى باسشىلىق تاراپىنان ىلعي دا ءتاۋىر باعا الىپ جاتادى.
كەيدە اتالعان ورتالىققا قاتىستى مىناداي قىزىقتى جايتتار دا كەزدەسىپ جاتادى ەكەن. قۋانىش «تۇڭعىش پرەزيدەنتتىڭ تاريحي-مادەني ورتالىعىنا» دەگەن جازۋى بار بەيدجيكپەن باسقا ءبىر مەكەمەلەرگە, دۇكەندەرگە بارا قالسا, جۇرتتىڭ ءبارى بىردەن نازار اۋدارىپ, قۇددى ءبىر بۇلار پرەزيدەنت اكىمشىلىگىنەن كەلگەندەي ايرىقشا قۇرمەتپەن قارايتىن كورىنەدى. ال رەسمي ءىس-شارالاردا ۇيىمداستىرۋشىلار دا ورتالىقتىڭ قىزمەتكەرلەرىنە ءىلتيپات تانىتىپ, قوشەمەتپەن تورگە وزدىرىپ جاتادى. مۇنىڭ ءبارىن قۋانىش وتانداستارىمىزدىڭ تۇڭعىش پرەزيدەنتكە دەگەن قۇرمەتى دەپ سانايدى جانە ءوزىنىڭ وسى ءبىر الەمدىك ماسشتابتاعى تاريحي تۇلعا اتىنداعى ورتالىقتا ەڭبەك ەتىپ جۇرگەنىن ورىندى ماقتان ەتەدى.
قۋانىشتىڭ ءوزى دە, جان جارى شولپان ساناقباي دا قوعامدا بولىپ جاتاتىن جاڭالىقتارعا سەرگەك قاراپ, ءۇن قوسىپ وتىراتىن بەلسەندى جاستار. قولى قالت ەتكەن كەزدە قالالىق, وبلىستىق جانە رەسپۋبليكالىق باسىلىمدارعا ماقالا جازىپ تۇرادى. كوبىنە ءوزى تۇرىپ جاتقان مەتاللۋرگتەر شاھارىنداعى مەملەكەتتىك تىلگە, ۇلتتىق قۇندىلىقتارعا قاتىستى شەتىن ماسەلەلەردى قوزعاپ, كوتەرەدى. مىسالى ول تەمىرتاۋ قالاسىندا ءبىر دە ءبىر قازاقتىلدى ءباسپاسوزدىڭ جوقتىعىنا نازار اۋدارىپ, دابىل قاقتى. سونىمەن قاتار قۋانىش قازاعى ازداۋ قالادا ۇلتتىق سالت-ءداستۇردى, ادەپ-عۇرىپتى ناسيحاتتاۋ ىسىندە دە العى شەپتە جۇرەتىن العاداي جاستىڭ ءبىرى. جىل سايىن تەمىرتاۋ قالاسىندا تاريحي-مادەني ورتالىق اتىنان قالالىق سپورت بولىمىمەن بىرىگىپ, اسىق اتۋدان جارىس ۇيىمداستىرۋعا دا بەلسەندى تۇردە اتسالىسىپ كەلەدى.
سونىمەن قاتار ول اۆتور رەتىندە ورتالىق قىزمەتكەرلەرىمەن بىرلەسە وتىرىپ, «سارىارقا تورىندەگى كەزدەسۋلەر» اتتى جيناقتى شىعارۋعا سۇبەلى ۇلەس قوستى. تۇڭعىش پرەزيدەنتكە قاتىستى ماقالالار توپتاستىرىلعان اتالعان ەڭبەكتىڭ تۇساۋىن ەلباسىنىڭ سەرىكتەستەرى مەن قاراعاندى وبلىسىنىڭ سول كەزدەگى اكىمى ەرلان قوشانوۆ كەسكەن ەدى.
تاياۋدا تالاپتى جاس ءوز ەڭبەگىنىڭ جەمىسىن كوردى. قۋانىش تىنىبەك مادەنيەت جانە سپورت مينيسترلىگى ۇيىمداستىرعان «رۋحاني قازىنا-2020» رەسپۋبليكالىق كونكۋرسىندا «مۋزەي ءىسى سالاسىنداعى «جىل سەرپىنى» اتالىمى بويىنشا جەڭىمپاز بولىپ, سىي-قۇرمەتكە بولەندى.
«تاۋەلسىزدىك قۇرداستارىنىڭ يىعىنا ارتىلعان جۇك جەڭىل ەمەس. كەلەسى جىلى وتىز جاسقا تولامىز. ەل بولىپ «رۋحاني جاڭعىرۋ» باعدارلاماسىن جۇزەگە اسىرىپ جاتقان كەزدە ءار زامانداسىم بۇل ءىس-شاراعا ءوز ۇلەسىن قوسۋى كەرەك. ول ءۇشىن مىندەتتى تۇردە تاۋ قوپارىپ, تاس جارۋدىڭ قاجەتى جوق. اركىم ءوز سالاسىندا ۇزدىك بولىپ, ءوز قىزمەتىن جاقسى مەڭگەرسە, سونى ءىس جۇزىندە جۇزەگە اسىرا بىلسە, سول جەتكىلىكتى», دەيدى تاۋەلسىزدىكتىڭ تۇيدەي قۇرداسى قۋانىش تىنىبەك.
قاراعاندى وبلىسى,
تەمىرتاۋ قالاسى
