كەزىندە ستالين كولحوزى بولعان شاعىن عانا اۋىلدان 7 بىردەي ەڭبەك ەرى شىققان. ەڭبەكپەن ەسەيگەن اۋىل تۇرعىندارى قازىرگى كەزدە دە نەگىزىنەن مال شارۋاشىلىعىمەن اينالىسىپ, كۇن كورەدى. سونىمەن قاتار بۇل اۋىلعا مەملەكەتتىڭ قولداۋى دا از ەمەس. «اۋىل – ەل بەسىگى», «تۋعان جەرگە تۋىڭدى تىك!» باعدارلامالارى اياسىندا بىرقاتار نىسان بوي كوتەرىپ, ەل يگىلىگىنە بەرىلگەن. بۇگىندە اۋىلدا جاڭا سالىنعان مادەنيەت, سپورت نىساندارى جۇمىس ىستەيدى. جارىق, گاز تارتىلعان. اۋىلدا 2 ورتا مەكتەپ بار بولسا, ەندى 300 ورىندىق ءۇشىنشى مەكتەپتىڭ دە قۇرىلىسى جۇرگىزىلۋدە. اۋدان اكىمى نۇرجان نۇرجىگىتوۆتىڭ ايتۋىنشا, بۋرىل اۋىلىندا جاقسى باستامالار كوپ. ماسەلەن, مەملەكەتتىڭ قولداۋىمەن بولىنگەن 589 ميلليون تەڭگەگە اۋىلداعى 10 كوشە جوندەلگەن. وكرۋگكە قاراستى بۋرىل جانە قۇمجوتا اۋىلدارىندا 2 كوشەگە جاياۋ جۇرگىنشىلەر جولى سالىنعان. ءبىر ايتا كەتەرلىگى, اۋىل كوشەلەرى 30 جىل بويى جوندەۋ كورمەگەن. سونىمەن قاتار بۇرىن مادەنيەت ءۇيى بولماعان اۋىلدا 157 ميلليون تەڭگەگە 180 ورىندىق مادەنيەت نىسانى سالىنعان. بۇگىندە جەرگىلىكتى جۇرتشىلىق مۇنىڭ يگىلىگىن كورىپ وتىر. اۋىل جاستارىن سالاماتتى ءومىر سالتىن ۇستانۋعا تاربيەلەۋ ماقساتىندا اۋىلدان جالپى قۇنى 323 ميلليون تەڭگە بولاتىن سپورت كەشەنى بوي كوتەرگەن. سونداي-اق دەمەۋشىلەر ەسەبىنەن جازعى سپورت الاڭى مەن كىشى فۋتبول الاڭشاسى دا اشىلعان.
اۋىلدى كوركەيتۋ – كەلەلى ءىس. بۇگىندە ءبىر ءۇيدىڭ بالاسىنداي تاتۋ-ءتاتتى عۇمىر كەشىپ جاتقان بۋرىل تۇرعىندارى اۋىلدىڭ ءار جەتىستىگىنە قۋانادى. اۋىلدىق وكرۋگتىڭ اكىمى ەرىك الىقۇلوۆتىڭ ايتۋىنشا, اۋىلدا مال ۇرلىعى, كىسى توناۋ سياقتى تەرىس ارەكەتتەر ورىن الماعان. قايتا تۇرعىنداردىڭ سۇرانىسىنا وراي, بۋرىل مەن قۇمجوتا ەلدى مەكەندەرىندەگى كوشەلەر جوندەلىپ, ەل ونىڭ يگىلىگىن كورۋدە. ماسەلەن, اۋىلدارداعى بارلىعى 64 شاقىرىم جول 820 ميلليون تەڭگەگە قايتا جاراقتاندىرىلعان. «اۋىلدان سەڭكىباي, بەلقوجا, وتەمىس كانالدارى وتەدى. بيىل بەلقوجا كانالى 16 ميلليون 800 مىڭ تەڭگەگە ورتا جوندەۋدەن ءوتتى. جالپى, اۋىلدىق وكرۋگتە 14 جاڭا تۇرعىنجاي ءيىنى بار بولاتىن بولسا, بايزاق داتقا, نۇر, اراي يىندەرىنە 94 ميلليون 600 مىڭ تەڭگە ءبولىنىپ, تۇنگى جارىقتاندىرۋ جۇمىستارى جۇرگىزىلدى», دەيدى ەرىك الىقۇلوۆ.
قازىرگى كەزدە اۋىل ورتالىعىنان «جەڭىس» ساياباعى سالىنۋدا. سونىمەن قاتار «تاۋەلسىزدىك مونۋمەنتى» نىسانىن قايتا جاراقتاندىرۋ ماقساتىندا 7 ميلليون 49 مىڭ تەڭگە بولىنگەن. بۇگىندە اۋىلدان تۇرعىنداردىڭ قاۋىپسىزدىگىن قامتاماسىز ەتۋ ماقساتىندا پوليتسيا پۋنكتى اشىلىپ, مۇندا 7 ادام جۇمىسپەن قامتىلعان. ەندى اۋىل ىشىندە اۆتوبۋستار جۇرگىزۋ ماسەلەسى جوسپاردا بار ەكەن.
جامبىل وبلىسى
