«بيىل دارىگەرلەر ءۇشىن قيىن جىل بولدى. دارىگەرلەردىڭ كومەگىمەن قالامىزدىڭ 15 مىڭنان اسا تۇرعىنى COVID-19 اۋرۋىنان جازىلىپ شىقتى. ەلباسىنىڭ «بىرگەمىز» اتتى ۇندەۋى مەن مەملەكەت باسشىسىنىڭ قاداعالاۋىنىڭ ناتيجەسىندە ىندەتپەن كۇرەستىڭ العاشقى تولقىنىن ەڭسەرىپ, دايىندىقتى كۇشەيتتىك. قازىرگى تاڭدا ەلوردادا 176 ادام ەم الۋدا. سالىستىرمالى تۇردە ايتار بولساق, جاز ايلارىندا ءبىر كۇندە 3 911 ادام ەم الىپ جاتتى», دەدى قالا باسشىسى.
اكىمنىڭ ايتۋىنشا, قازىر قالاداعى جاعداي تۇراقتاندى. بىراق ءارى قاراي دا بۇل جۇمىستى كۇشەيتىلگەن تۇردە قاداعالاپ وتىرۋ قاجەت.
«جىل باسىندا پتر تەستىلەۋ بويىنشا ءبىر عانا زەرتحانامىز بولسا, قازىر ونىڭ سانى 17-گە دەيىن ارتتى. تەستىلەۋ ۋاقىتى بويىنشا جاز ايلارىندا جۇكتەمە كۇشەيگەندە 5 كۇنگە دەيىن كۇتۋگە تۋرا كەلەتىن. قازىر زەرتحانالاردىڭ قۋاتى ارتىپ, تەست ناتيجەسى 4 ساعاتتا بەرىلىپ جاتىر. ستاتسيونارلاردا يزوتەرميالىق كىشى-زەرتحانالار ورناتتىق, ولار ستاتسيوناردا ەمدەلىپ جاتقان ناۋقاستاردىڭ تەستىلەۋ ناتيجەسىن ەكى ساعاتتا كورسەتە الادى», دەدى ا.كولگىنوۆ.
سونىمەن بىرگە ۆەدومستۆوارالىق كوميسسيا شەشىمىمەن ەلگە كەلەتىن بارلىق رەيس جولاۋشىلارىنان پتر انىقتامالارى تالاپ ەتىلەدى.
ء«تيىستى انىقتاماسى جوق جولاۋشىلاردى كارانتين ستاتسيونارىنا جەتكىزەمىز جانە تەكسەرۋدەن كەيىن عانا قالاعا كىرگىزەمىز. 6 قازاننان بەرى 4 800 جولاۋشى كارانتين ستاتسيونارىنا باردى, ونىڭ 28-ىنەن COVID-19 ۆيرۋسى انىقتالدى جانە ەمدەۋگە جىبەرىلدى», دەدى ول.
ا.كولگىنوۆ الداعى مەرەكەلەردى وتباسىمەن وتكىزۋگە كەڭەس بەردى. سونداي-اق كارانتين تالاپتارىن ساقتاعان قالا تۇرعىندارى مەن دارىگەرلەرگە العىس ايتتى.
«قالاداعى ەپيدەميالىق جاعداي مەن سانيتارلىق نورمالارعا بەيجاي قارامايتىن تۇرعىندارىمىزعا العىس ايتقىم كەلەدى. ەندى ءبىزدىڭ تۇرعىندار كارانتيندە قالاي ءجۇرۋ كەرەكتىگىن بىلەدى. دارىگەرلەرىمىز دە بيىل ناۋقاستاردى ەمدەۋگە بەلسەنە اتسالىسىپ, اۋقىمدى تاجىريبە جيناقتادى. قازىر دە جۇقپالى دەرتپەن كۇرەسىپ جۇرگەن ماماندارعا العىس ايتامىن», دەدى قالا باسشىسى.
سونىمەن بىرگە ول الداعى مەرەكە كۇندەرى حالىق كوپ جينالاتىن ورىندارعا بارماۋعا كەڭەس بەردى.
«الدا كوپتەگەن مەرەكەلەر كەلە جاتىر. مۇندا حالىق كوپ جينالاتىن ورىندارعا بارماۋعا كەڭەس بەرەر ەدىم. جاڭا جىلدىڭ وتباسىلىق مەرەكە ەكەنى بارشاعا ايان. سوندىقتان جاڭا جىلدى اۋرۋحانا توسەگىندە قارسى العاننان گورى ۇيدە وتباسىنىڭ ورتاسىندا كۇتكەن جاقسى عوي. بۇل كۇندەرى اسا مۇقيات بولىڭىزدىر!», دەدى ا.كولگىنوۆ.
پاندەميا كەزەڭىندە نۇر-سۇلتان قالاسىنىڭ اكىمدىگى 43 ملرد تەڭگەنى وڭتايلاندىرىپ, قاجەتتى سالالارعا باعىتتادى. بۇل تۋرالى قالا اكىمى كەڭىنەن ايتىپ بەردى.
«پاندەميانىڭ جاعىمسىز سالدارىنان, اسىرەسە ودان شاعىن جانە ورتا بيزنەس زارداپ شەكتى. جەرگىلىكتى بيۋدجەتكە دە جىل باسىندا بولجانعان تۇسىمدەر تولىق تۇسپەۋى مۇمكىن. مەملەكەت شوب سۋبەكتىلەرىن قولداۋ ءۇشىن جەڭىلدىكتەر جاسادى. سوندىقتان جىل سوڭىنا قاراي شامامەن 47 ملرد تەڭگە ءبىزدىڭ بيۋدجەتكە تۇسپەۋى ىقتيمال. كورپوراتيۆتى تابىس سالىعى بويىنشا دا جىل باسىندا تولەنۋى ءتيىس 10 ملرد تەڭگەدەن اسا قاراجات تۇسپەۋى مۇمكىن. وسىعان بايلانىستى مەملەكەت باسشىسىنىڭ تاپسىرماسىمەن نۇر-سۇلتان اكىمدىگىنىڭ جەرگىلىكتى بيۋدجەتىن 43 ملرد تەڭگەگە وڭتايلاندىردىق», دەدى قالا باسشىسى.
ۇنەمدەلگەن قاراجات ەڭ الدىمەن COVID-19 ىندەتىمەن كۇرەسكە, دەنساۋلىق ساقتاۋ جۇيەسىن دامىتۋعا, ءدارى-دارمەك پەن مەديتسينالىق جابدىقتار ساتىپ الۋعا جۇمسالعان.
ء«بىلىم بەرۋ جۇيەسىن دامىتۋعا دا كوڭىل بولدىك. سەبەبى قاشىقتان وقىتۋ فورماتى ءۇشىن از قامتىلعان وتباسى بالالارىنا نوۋتبۋكتەر مەن روۋتەرلەر قاجەت بولدى. ءارى قاراي الەۋمەتتىك كومەك كورسەتۋگە, ەكونوميكانىڭ ناقتى سەكتورىن قولداۋعا, ينفراقۇرىلىمدى دامىتىپ, تۇراقتاندىرۋ قورىن تولتىرۋعا ءمان بەردىك. جالپى العاندا ەلوردانىڭ الەۋمەتتىك-ەكونوميكالىق كورسەتكىشتەرى وڭ ناتيجە كورسەتىپ وتىر. پاندەمياعا قاراماستان, جۇرگىزىلگەن مەملەكەتتىك شارالاردىڭ ناتيجەسىندە نەگىزگى كاپيتالعا 1 ترلن تەڭگە ينۆەستيتسيا تۇسەدى دەپ بولجاپ وتىرمىز. سالىستىرار بولساق, 2019 جىلى 900 ملرد تەڭگەدەن اسا قاراجات تۇسكەن ەدى», دەدى ا.كولگىنوۆ.
