" ۇلىتاۋ كوكبورىسى" دەپ اتالعان بۇل ءمۇسىننىڭ تۇعىرىمەن قوسقانداعى بيىكتىگى 9,70 مەتر. ال ەسكەرتكىشتىڭ جەكە تۇرعانداعى بويى التى مەتردى قۇرايدى ەكەن. ءمۇسىننىڭ تۇعىرىمەن قوسا ەسەپتەگەندەگى سالماعى بەس توننا شاماسىندا. ىشكى قۇرىلىمى تەمىردەن سوعىلىپ, سىرتى ارقانىڭ اقشۇناق ايازى مەن اپتاپ ىستىعىنا توتەپ بەرەتىن پلاستيك ماتەريالدان قۇيىلىپتى.
ءمۇسىن يدەياسىنىڭ اۆتورى جانە سومداۋشىسى ەۋرازيا ديزاينەرلەر وداعىنىڭ مۇشەسى امانتاي مەڭدىعاليەۆ ەكەن. ءمۇسىنشى وسىدان ءبىر جىل بۇرىن اتالعان ەسكەرتكىشتىڭ ەسكيزىن جاساپ, مادەنيەت جانە سپورت مينيسترلىگىنەن اۆتورلىق قۇقىق كۋالىگىن الىپتى.
"الايدا بەلگىلى سەبەپتەرگە بايلانىستى يدەيانى جۇزەگە اسىرۋدىڭ ورايى كەلمەدى. تەك, ۇلىتاۋ اۋدانىنىڭ اكىمى بەرىك ابدىعالي ۇلىنىڭ قولداۋى ارقاسىندا عانا ماسەلە شەشىمىن تاپتى. ەسكەرتكىشتى جاساپ شىعارۋعا ءوزىمنىڭ ۇلىم, ءمۇسىنشى ارماتتىڭ كوپ كومەگى ءتيدى", – دەيدى ا.مەڭدىعاليەۆ.
اۆتوردىڭ ايتۋىنشا, الەمدە قاسقىرعا ورناتىلعان ءدال وسىنداي ولشەمدەگى ءمۇسىن جوق ەكەن. سوندىقتان قازىرگى ۋاقىتتا ۇلىتاۋ اۋدانىنىڭ اكىمدىگى " ۇلىتاۋ كوكبورىسى" ەسكەرتكىشىن گيننەستىڭ رەكوردتار كىتابىنا ەنگىزۋگە قاتىستى ۇسىنىس قاعاز-قۇجاتتارىن رەتتەۋدى قولعا الىپتى.
