بۇل ءموبيلدى قۇرىلعىلار الماتى قالاسىنىڭ پوليتسەيلەرى جەكە ۇيلەردىڭ بىرىندە وتكىزگەن ۇرلانعان تاۋارلاردى تۇراقتى ساتىپ الۋشىلاردى ۇستاۋ بويىنشا ارنايى وپەراتسيا كەزىندە تاركىلەندى. ەسكە سالا كەتەيىك, ارنايى وپەراتسيا بارىسىندا قىلمىستىق جولمەن تابىلعان 464 ءموبيلدى قۇرىلعى تاركىلەنگەن ەدى.
– كريمينالدىق پوليتسيا قىزمەتكەرلەرى ارنايى جاساق ساربازدارىنىڭ كومەگىمەن اعايىندى ەكى ازاماتتى ۇستادى, ولار ۇرلانعان ۇيالى تەلەفوندار مەن باسقا دا قوندىرعىلاردى ساتىپ الىپ جۇرگەن. مۇنداي قوندىرعىلاردىڭ ءىرى پارتياسى قىرعىزستان مەن وزبەكستانعا جونەلتىلۋگە دايىن بولعان. كۇدىكتىلەردىڭ تۇرعىلىقتى جەرىندە وتكىزىلگەن سانكتسيالانعان ءتىنتۋ كەزىندە 464 سمارتفون, 1 نوۋتبۋك جانە 4 قول ساعات تابىلىپ, تاركىلەندى. سوتقا دەيىنگى تەرگەۋ قر قك-ءنىڭ 196-بابىنىڭ 2-بولىگى (كورiنەۋ قىلمىستىق جولمەن تابىلعان مۇلiكتi يەمدەنۋ نەمەسە وتكىزۋ) بويىنشا جۇرگىزىلۋدە. قازىرگى ۋاقىتتا وسى ۇيالى تەلەفونداردىڭ يەلەرىن انىقتاۋ بويىنشا شارالار قابىلدانۋدا, – دەدى پوليتسيا دەپارتامەنتى باستىعىنىڭ ورىنباسارى بەرىك ابىلبەكوۆ.
تەرگەۋشىلەر يەسى انىقتالعان سمارتفونداردى قايتارۋدى باستادى. كەشە پوليتسيا دەپارتامەنتىنە ۇيالى قۇرىلعىلارىن الۋ ءۇشىن شامامەن 30 ادام كەلدى.
– كەشكى ساعات 7 مەن 8 اراسىندا “التىن وردا” بازارىنىڭ جانىندا بەلگىسىز ەر ادام جول كورسەتۋىمدى ءوتىنىپ, قاراڭعىلىقتى پايدالانىپ, ماعان جاقىندادى. سول كەزدە ول مەنىڭ كۇرتەشەمنىڭ وڭ قالتاسىنان تەلەفونىمدى ۇرلاپ كەتتى. مەن پوليتسيا قىزمەتكەرلەرىنە ۇلكەن ريزاشىلىعىمدى بىلدىرەمىن. ولاردىڭ جۇمىستارى ءاردايىم وسىنداي جەمىستى بولسىن, – دەدى تەلەفونى قيتارىلعان زەينەتكەر.
– ال مەنىڭ ۇيالى تەلەفونىمدى كولىكتەن ۇرلاپ كەتتى. ونى تاپقانى ءۇشىن پوليتسياعا راحمەت, – دەدى تاعى ءبىر تۇرعىن.
– تەلەفونىمدى تاۋىپ بەرگەن پوليتسيا قىزمەتكەرلەرىنە ريزامىن. ولار تەز ارەكەت ەتتى. مەن قۋانىشتىمىن, – دەپ قورىتىندىلادى ۇرىلاردىڭ قۇربانى بولعان جەرگىلىكتى تۇرعىن.
