وسى ورايدا, جاقىندا تاراز قالاسى اكىمدىگىنە قاراستى «مەديا ورتالىق» مەكەمەسى اشىلدى. ەندى قالا تۇرعىندارى ءار مەكەمەنىڭ ەسىگىن ءبىر قاقپاي, تىكەلەي كەلىپ ماسەلەسىن وسى ورتالىققا ايتاتىن بولادى.
اتالعان مەكەمەنىڭ اشىلۋ راسىمىنە قالا اكىمىنىڭ ورىنباسارى الماس سادۋباەۆ قاتىسىپ, بۇل ورتالىقتىڭ قالا اكىمى ايتقازى قارابالاەۆتىڭ باستاماسىمەن اشىلىپ وتىرعانىن جەتكىزدى. سونداي-اق جاڭادان اشىلعان مەديا ورتالىق الەۋمەتتىك جەلىدەگى رەسمي پاراقشالارعا قالا تۇرعىندارىنان كەلىپ تۇسكەن سۇراقتارعا جاۋاپ بەرىپ, وبلىس ورتالىعى تۋرالى مەديا رەسۋرستارداعى اقپاراتتاردىڭ مازمۇنىن ساراپتاپ, رەسپۋبليكالىق بۇقارالىق اقپارات قۇرالدارى مەن ينتەرنەت رەسۋرستاردا قالا تۋرالى شىققان اقپاراتتارعا تۇراقتى مونيتورينگ جۇرگىزەتىنىن اتاپ ءوتتى. سونىمەن قاتار ول ورتالىقتىڭ باستى ماقساتى – تۇرعىندارمەن كەرى بايلانىس ورناتىپ, كەز كەلگەن سۇراقتارىنا جاۋاپ بەرىپ, ولاردىڭ كوتەرگەن ماسەلەلەرىنىڭ شەشىلۋىنە ىقپال ەتۋ ەكەنىن دە جەتكىزدى.
بۇدان كەيىن بولات جاپپار ۇلى, اسقاربەك سەيىلحان, عالىم قاساباي جانە قۋانىش يەمبەرديەۆ سياقتى وڭىردەگى ارداگەر جۋرناليستەر دە ءسوز الىپ, باستاماعا قولداۋ ءبىلدىرىپ, مەديا ورتالىقتىڭ جۇمىسىنا ساتتىلىك تىلەدى. ال جاڭا ورتالىقتىڭ لەنتاسىن ارداگەر جۋرناليست امانگەلدى نۇرپەيىسوۆ پەن اقىن, قازاقستان جازۋشىلار وداعىنىڭ مۇشەسى عايني الىمبەكقىزى قيدى. سالتاناتتى شارادان كەيىن كوپشىلىك اتالعان ورتالىقتىڭ عيماراتىمەن تانىستى. بۇگىندە ورتالىقتىڭ جوندەۋ جۇمىستارى تولىعىمەن اياقتالعان. مۇندا تۇرعىنداردى قابىلدايتىن, تىكەلەي ەفيرگە شىعاتىن جانە اقپارات تاراتىلاتىن ارنايى بولمەلەر بار. بارلىق بولمە قاجەتتى قۇرالدارمەن جابدىقتالعان. «مەديا ورتالىقتا» جۋرناليستەر, SMM جانە بەينەقۇراستىرۋشى مامانداردان قۇرالعان 13 قىزمەتكەر جۇمىس ىستەيدى. سونىمەن قاتار جاڭا نىسان الداعى ۋاقىتتا ەكى مىڭ جىلدان استام تاريحى بار تاراز شاھارىنىڭ ءيميدجىن كوتەرۋ ماقساتىندا دا روليكتەر مەن ينفوگرافيكالار جانە باننەرلەر ازىرلەيتىن بولادى.
جامبىل وبلىسى
