وسى ورايدا, جوعارىداعى جوبانى ىسكە اسىرۋ مىندەتى جۇكتەلگەن عىلىم جانە ءبىلىم مينيسترلىگى مەن م.و.اۋەزوۆ اتىنداعى ادەبيەت جانە ونەر ينستيتۋتى ءبىرشاما ىستەر تىندىرىپتى. اتاپ وتەر بولساق, مەملەكەتتىك تاپسىرىس نەگىزىندە ەڭ اۋەلى «فولكلورلىق ەكسپەديتسيالار مەن قولجازبا قورلارىنىڭ ماتەريالدارىن جۇيەلەۋ جانە زەردەلەۋ, سونىمەن قاتار دالا فولكلورىنىڭ انتولوگياسىن قالىپتاستىرۋ» اتتى جوبا قولعا الىنىپ, بۇل ىسكە ۇكىمەت تاراپىنان 276 829 ملن تەڭگە قارجى قاراستىرىلىپتى.
ناتيجەسى دە جامان ەمەس. ايتالىق, جوبا قابىلدانعان العاشقى جىلدىڭ (2019) وزىندە-اق انتولوگيانىڭ بەس تومدىعى جارىق كورىپ, ولاردىڭ اۋديو جانە تسيفرلى نۇسقالارىن دايىنداۋ بويىنشا جان-جاقتى جۇمىس اتقارىلعان كورىنەدى.
ءاربىر تومى 10 000 دانا تارالىممەن باسىلعان «دالا فولكلورى انتولوگياسىنىڭ»
47 650 مىڭ داناسى ەڭ اۋەلى, رەسپۋبليكا كىتاپحانالارى مەن ەلىمىزدىڭ جوعارى وقۋ ورىندارىنا تاراتىلسا, قالعان 2 350 داناسى وتاندىق ءھام شەتەلدىك عالىمدار مەن ونەرتانۋشىلارعا ۇلەستىرىلىپتى.
سونىمەن قاتار ەلىمىزدەگى قولجازبالار قورى ساقتالعان ينستيتۋتتار مەن مۇراعاتتاردا ساقتالعان قۇندى جادىگەرلەر تسيفرلى جۇيەگە كوشىرىلىپ, ولار زاماناۋي تۇردە ەلەكتروندى كاتالوگتانۋمەن قاتار عىلىمي-دالالىق ەكسپەديتسيالار ناتيجەسىندە جيناقتالعان فولكلورلىق مۇرالار قورىن وڭدەۋ, ساراپتاۋ جۇمىستارى ءساتتى اتقارىلىپتى.
جوبانى ىسكە اسىرۋدىڭ كەلەسى ءبىر باعىتى – «ەجەلگى, ورتاعاسىرلىق كەزەڭدەردىڭ جازباشا ادەبي ەسكەرتكىشتەرىن ازىرلەۋ مەن زەردەلەۋ جانە ەجەلگى ادەبيەت انتولوگياسىن دايىنداۋ» اتتى جوسپار نەگىزىندە قۇرىلىپ, بۇل مىندەتتى ىسكە اسىرۋ ءۇشىن مەملەكەتتىك تاپسىرىس ارقىلى 48 578 ملن تەڭگە قارجى بولىنگەن ەكەن.
ناتيجەسىندە, ەلىمىز كولەمىندەگى عىلىمي-زەرتتەۋ ينستيتۋتتاردىڭ قولجازبا قورلارى مەن مۇراعاتتارىندا ساقتالعان ماتەريالدار عىلىمي ادىسپەن جۇيەلەنىپ, اۋديتوريانىڭ قولجەتىمدىلىگى ءۇشىن «ەجەلگى ادەبيەت انتولوگياسى» اتتى كىتاپتار تسيكلى تسيفرلى فورماتتا تۇردە جارىق كورە باستاعانى قۇپتارلىق.
اتالعان انتولوگيانىڭ العاشقى كىتابى – «يسلامعا دەيىنگى ادەبي ەسكەرتكىشتەر» دەگەن اتپەن 10 000 دانامەن جارىق كورسە, ونىڭ 9 530 داناسى رەسپۋبليكا كىتاپحانالارى مەن جوعارى وقۋ ورىندارىنا تاراتىلىپتى. قالعان 470-ءى شەتەلدىك جانە وتاندىق عالىمدار مەن تانىمال ونەر-ءبىلىم يەلەرىنە سىيعا تارتىلعان ەكەن.
سونداي-اق مىڭجىلدىق مۇرانى جاڭعىرتۋ اياسىندا جاسالىپ جاتقان تاعى ءبىر كەلەلى جوبا – «فولكلورلىق مۋزىكالىق مۇرانى ساقتاۋ مەن جۇيەلەۋ جانە ۇلى دالانىڭ ەجەلگى موتيۆتەرىنىڭ تاڭداۋلى ۇلگىلەرىنىڭ جيناعى» دەپ اتالىپ, بۇنى تولىق ورىنداپ شىعۋ ءۇشىن مەملەكەت تاراپتىنان 85 961 ملن تەڭگە قاراجات كوزدەلىپتى.
ناتيجەسىندە, « ۇلى دالانىڭ ەجەلگى سارىندارى» اتتى كوپ تومدىق انتولوگيانىڭ العاشقى كىتابى قازاق, ورىس جانە اعىلشىن تىلىندە 10 مىڭ دانامەن نوتالىق ماتىندەرى مەن عىلىمي تۇسىنىكتەمەلەرى جيناقتالعان تسيفرلى فورماتتا باسىلىپ شىققانى قۋانتادى.
اتالعان جوبا ءالى دە جالعاسىن تابۋدا. مىسالى, بيىلعى جىلدىڭ العاشقى توقسانىندا مادەنيەت جانە سپورت, ءبىلىم جانە عىلىم مينيسترلىكتەرى, نۇر-سۇلتان, الماتى, شىمكەنت قالالارى جانە بارلىق وبلىس اكىمدىكتەرى بىرلەسىپ وڭىرلىك, رەسپۋبليكالىق جانە حالىقارالىق دەڭگەيدە عىلىمي زەرتتەۋ باعىتى كوزدەلگەن «دالا فولكلورى مەن مۋزىكاسىنىڭ مىڭ جىلى» اتتى جوبانى ىسكە اسىرۋ جونىندەگى ءىس-شارالاردىڭ بىرىڭعاي جوسپارىن بەكىتتى.
بۇل قۇجاتتا ەڭ اۋەلى قازاق ۇلتىنىڭ ماتەريالدىق ەمەس مادەني مۇراسى ۇلتتىق فولكلورىنىڭ ەجەلگى جانە قازىرگى ۇلگىلەرىن ساقتاۋ جانە ونى ناسيحاتتاۋ, ودان كەيىن مادەني ءبىلىم بەرۋ كەڭىستىگىنە نوتالىق فورماتتا ءارتۇرلى حالىق اسپاپتارىندا قازىرگى زاماناۋي ەلەكتروندى نۇسقادا جاندى داۋىستا جازىلعان مۋزىكا جاۋھارلارىن جانداندىرۋ, سونىمەن قاتار حالىقتىڭ تاريحي مۇراسىن ۇرپاق ساناسىنا ءداستۇرلى مۋزىكالىق فولكلور ارقىلى ناسيحاتتاۋ جانە ۇلتتىق مادەني قۇندىلىقتاردى عىلىمي زەرتتەۋ جايلى جوسپارلى مىندەتتەر جۇكتەلگەن ەكەن. بۇل قۇندى قۇجات ۇلت بولاشاعىنا جاسالعان يگى قادام ەكەنى انىق.
