قازاقستان رەسپۋبليكاسى ورتالىق سايلاۋ كوميسسياسىنىڭ توراعاسى بەرىك يماشەۆ جاقىندا نۇر-سۇلتان قالاسىنا كەلگەن ەقىۇ/دياقب سايلاۋدى بايقاۋ جونىندەگى شەكتەۋلى ميسسياسىنىڭ مۇشەلەرىن قارسى الدى.
ب.يماشەۆ ميسسيا مۇشەلەرىن سايلاۋدىڭ جاريالانعانىنان باستاپ داۋىس بەرۋ كۇنىنە دەيىنگى ناۋقاننىڭ نەگىزگى كەزەڭدەرىمەن قىسقاشا تانىستىردى.
ميسسيانىڭ باسشىسى, ەلشى ياروسلاۆ مارچين دومانسكي قازاقستان تاراپىنا قابىلداعانى ءۇشىن العىسىن ءبىلدىرىپ, ميسسيانىڭ نەگىزگى توبىنىڭ مۇشەلەرىمەن تانىستىردى.
تاراپتار بۇكىل سايلاۋ كەزەڭىندە بەلسەندى ءوزارا ءىس-قيمىل جاساۋ تۋرالى ۋاعدالاستى. كەزدەسۋ سوڭىندا تاراپتار ءداستۇرلى تۇردە قالىپتاسقان ىنتىماقتاستىق پەن ىزگى نيەت قاتىناستارى 2021 جىلى قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارىن سايلاۋ كەزىندە جالعاسىن تاباتىنىنا سەنىم ءبىلدىردى.
بايقاۋشىلار توبى ەل بيلىگىنىڭ قازاقستانداعى پارلامەنتتىك سايلاۋدى باقىلاۋعا شاقىرۋىنان كەيىن كەلگەن. قۇرامىندا 11 ساراپشى بار نەگىزگى توپ نۇر-سۇلتاندا ورنالاسقان. تاعى 24 بايقاۋشى 15 جەلتوقساننان باستاپ كەلە باستايدى, ولار ەلدىڭ بارلىق ايماعىنا جىبەرىلەدى.
ميسسيا سايلاۋدىڭ ەقىۇ مىندەتتەمەلەرىنە جانە دەموكراتيالىق سايلاۋدىڭ باسقا حالىقارالىق مىندەتتەمەلەرى مەن ستاندارتتارىنا, سونداي-اق ۇلتتىق زاڭناماعا سايكەستىگىن باعالايدى. بايقاۋشىلار سايلاۋشىلار مەن كانديداتتاردى تىركەۋدى, ۇگىت-ناسيحات جۇمىستارىن, سايلاۋ اكىمشىلىگى مەن ءتيىستى مەملەكەتتىك ورگانداردىڭ جۇمىسىن, سايلاۋعا قاتىستى زاڭنامانى جانە ونىڭ ورىندالۋىن, سايلاۋعا قاتىستى داۋلاردى شەشۋدى مۇقيات باقىلايتىن بولادى. سونداي-اق ميسسيا ناۋقاننىڭ بۇقارالىق اقپارات قۇرالدارىندا جاريالانۋىن قاداعالايدى.
باقىلاۋ بارىسىندا ميسسيا مەملەكەتتىك ورگانداردىڭ, ساياسي پارتيالاردىڭ, ازاماتتىق قوعامنىڭ, بۇقارالىق اقپارات قۇرالدارىنىڭ جانە حالىقارالىق قوعامداستىقتىڭ وكىلدەرىمەن كەزدەسەدى. ميسسيا داۋىس بەرۋ كۇنى بىرقاتار سايلاۋ ۋچاسكەلەرىنە بارىپ, سايلاۋدى باقىلاۋ بويىنشا ەقىۇ پارلامەنتتىك اسسامبلەياسىنىڭ دەلەگاتسياسىمەن كۇش بىرىكتىرەدى.
سونداي-اق جۇمىس بارىسىندا ارالىق ەسەپ جاريالاۋى شارت. سايلاۋدان كەيىنگى كۇنى ءباسپاسوز كونفەرەنتسياسىندا الدىن الا جانە سوڭعى قورىتىندىلار تۋرالى مالىمدەمە جاسالادى. ال باقىلاۋ قورىتىندىلارى مەن ۇسىنىستار بويىنشا ەسەپ سايلاۋ پروتسەسى اياقتالعاننان كەيىن ەكى ايدان كەيىن جاريالانادى. دەموكراتيالىق ينستيتۋتتار جانە ادام قۇقىقتارى جونىندەگى بيۋرو مەن ميسسيا ەقىۇ-نىڭ نۇر-سۇلتانداعى باعدارلامالار كەڭسەسىنەن بولەك جانە تاۋەلسىز جۇمىس ىستەيتىنىن ايتا كەتكەن ءجون.
