"بۇگىن ەلىمىزدە انيماتورلاردىڭ دايىندىعىمەن ت. جۇرگەنوۆ اتىنداعى قازاق ۇلتتىق ونەر اكادەمياسى مەن قازاق ۇلتتىق ونەر ۋنيۆەرسيتەتى اينالىسادى (اتالعان جوعارى وقۋ ورىندارىندا 117 بولاشاق انيماتور وقيدى). ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ "انيماتسيالىق ءفيلمنىڭ رەجيسسۋراسى" جانە "سۋرەتشى-انيماتور" ماماندىقتارى بويىنشا وقيتىن ستۋدەنتتەرى ءۇشىن رەسەيلىك "سويۋزمۋلتفيلم" جانە "WizartAnimation" انيماتسيالىق ستۋديالارىندا تاعىلىمدامادان ءوتۋ ماسەلەسى پىسىقتالۋدا", دەدى ەرالى توعجانوۆ.
ەرالى توعجانوۆتىڭ ايتۋىنشا, الداعى ۋاقىتتا "قازاقفيلم" كينوستۋدياسىن جاڭعىرتۋ جوسپارلانۋدا. وسى جۇمىستار اياسىندا كينوستۋديانى زاماناۋي كينو ءتۇسىرۋ جانە مونتاج جابدىقتارىمەن تەحنيكالىق جاراقتاندىرۋ, ارنايى كولىك قۇرالدارىن ساتىپ الۋ, ينجەنەرلىك توراپتار مەن عيماراتتاردى كۇردەلى جوندەۋدەن وتكىزۋ, سونداي-اق ءتۇسىرۋ الاڭىن سالۋ كوزدەلىپ وتىر.
"جاڭعىرتۋ جۇمىستارى كينوستۋديانىڭ انيماتسيالىق بىرلەستىگىن دە قامتيدى. "كينەماتوگرافيا تۋرالى" زاڭنىڭ 9-بابىنا سايكەس كينوتەاترلاردا كورسەتىلەتىن بارلىق فيلمدەر قازاق تىلىندە دۋبلياجدالۋعا, سۋبتيترلەنۋگە نەمەسە كادر سىرتىنداعى اۋدارمامەن قامتاماسىز ەتىلۋى ءتيىس. قازاق تىلىنە اۋدارىلماعان فيلمدەرگە وتاندىق پروكاتقا شىعۋعا رۇقسات بەرىلمەيدى. جالپى دەپۋتتاتىق ساۋالدا سىزدەر اتاپ وتكەن وتاندىق انيماتسيانى دامىتۋ جونىندەگى ۇسىنىستار مەملەكەتتىك تاپسىرىس ارقىلى جاسالاتىن مۋلتفيلمدەردىڭ مازمۇنى مەن ساپاسىن ارتتىرۋ بارىسىندا ەسكەرىلەتىن بولادى", دەدى ۇكىمەت باسشىسىنىڭ ورىنباسارى.
