قازاقستان حالىق پارتياسىنىڭ ءتىزىمىن تىركەۋ بويىنشا بايانداما جاساعان وسك مۇشەسى اسىلبەك سماعۇلوۆ پارتيا قۇجاتتارىن 29 قاراشادا تاپسىرعانىن مالىمدەدى. تىزىمگە 114 كانديدات كىرگەن. بۇل رەتتە ورتالىق سايلاۋ كوميسسياسىنا ازامات گ.قايىرجانوۆتىڭ ءوز كانديداتۋراسىن پارتيالىق تىزىمنەن قايتارىپ الۋ تۋرالى ءوتىنىشى كەلىپ ءتۇستى. «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ 90-بابىنا سايكەس پارتيالىق تىزىمگە ەنگىزىلگەن ادام ورتالىق سايلاۋ كوميسسياسىنا بۇل تۋرالى جازباشا ءوتىنىش بەرە وتىرىپ, ءوزىنىڭ كانديداتۋراسىن پارتيالىق تىزىمنەن كەرى قايتارىپ الا الادى. مۇنداي جاعدايلاردا وسك پارتيالىق تىزىمگە ەنگىزىلگەن ادامدى شىعارىپ تاستاۋ تۋرالى شەشىم قابىلدايدى. وسىلايشا قازاقستان حالىق پارتياسىنىڭ تىزىمىندە 113 ادام بار. ونىڭ ىشىندە 41-ءى ايەل جانە 29 جاسقا تولماعان ۇمىتكەرلەر, ولار تىزىمگە ەنگىزىلگەندەردىڭ جالپى سانىنىڭ 36,2 پايىزىن قۇرايدى.
«قازاقستان حالىق پارتياسى» قوعامدىق بىرلەستىگىنىڭ ءماجىلىس دەپۋتاتى بولىپ سايلانۋ ءۇشىن پارتيالىق تىزىمگە ەنگىزگەن ادامدارىنىڭ كونستيتۋتسيا مەن سايلاۋ تۋرالى زاڭ تالاپتارىنا سايكەستىگىنە ۋاكىلەتتى ورگاندار ۇسىنعان مالىمەتتەر نەگىزىندە ورتالىق سايلاۋ كوميسسياسى تەكسەرۋ جۇرگىزىپ, بارلىق تالاپتارعا ساي ەكەنىن انىقتادى. وسىعان بايلانىستى, وسك مۇشەلەرى «قازاقستان رەسپۋبليكاسى پارلامەنتى ءماجىلىسى دەپۋتاتتارىنىڭ سايلاۋىندا «قازاقستان حالىق پارتياسى» قوعامدىق بىرلەستىگىنىڭ پارتيالىق ءتىزىمىن تىركەۋ تۋرالى» قاۋلى قابىلدادى.
وتىرىستىڭ ەكىنشى ماسەلەسى بويىنشا وسك مۇشەسى اناستاسيا ششەگورتسوۆا بايانداما جاسادى. ول 2020 جىلعى 22 قازاندا سايلاۋدى حالىقارالىق باقىلاۋ ينستيتۋتى اشىلعان ساتتەن بەرى قازاقستان رەسپۋبليكاسى ورتالىق سايلاۋ كوميسسياسىنىڭ 2 وتىرىسى وتكىزىلىپ, 39 بايقاۋشى اككرەديتتەلگەنىن حابارلادى. ونىڭ ىشىندە تمد پارلامەنتارالىق اسسامبلەياسىنان 29 بايقاۋشى, تمد بايقاۋشىلار ميسسياسى قۇرامىنان 6 بايقاۋشى, يسلام ىنتىماقتاستىعى ۇيىمىنان
4 بايقاۋشى تىركەلگەن.
اككرەديتتەۋگە ۇسىنىستاردىڭ كەلىپ تۇسۋىنە قاراي بايقاۋشىلار بويىنشا دەرەكتەر ۇنەمى جاڭارتىلىپ وتىرادى. ماسەلەن, 2020 جىلعى 7 جەلتوقسانداعى جاعداي بويىنشا ورتالىق سايلاۋ كوميسسياسىنا سىرتقى ىستەر مينيسترلىگىنەن اككرەديتتەۋگە ەقىۇ دياقب-دان 12 بايقاۋشىنىڭ جانە 5 شەت مەملەكەتتەن 11 بايقاۋشىنىڭ كانديداتۋرالارى ۇسىنىلدى.
ونىڭ ىشىندە يوردانيا مەملەكەتىنەن 3 بايقاۋشى, قىرعىز رەسپۋبليكاسىنان, مالديۆ رەسپۋبليكاسىنان, مولدوۆا رەسپۋبليكاسىنان, تۇرىك رەسپۋبليكاسىنان 2 بايقاۋشىدان بار.
وسىلايشا 2020 جىلدىڭ 7 جەلتوقسانىنا دەيىن بارلىعى 62 حالىقارالىق بايقاۋشى اككرەديتتەلدى. سايلاۋ تۋرالى كونستيتۋتسيالىق زاڭعا سايكەس شەت مەملەكەتتەر مەن حالىقارالىق ۇيىمداردىڭ بايقاۋشىلارىن اككرەديتتەۋ داۋىس بەرۋ كۇنىنە بەس كۇن قالعاندا جەرگىلىكتى ۋاقىت بويىنشا ساعات 18.00-دە, ياعني 2021 جىلدىڭ 4 قاڭتارىندا ساعات 18.00-دە اياقتالادى.
وتىرىسقا ساياسي پارتيالاردىڭ, باس پروكۋراتۋرانىڭ, ادىلەت, ىشكى ىستەر جانە قارجى مينيسترلىكتەرىنىڭ وكىلدەرى, اۋماقتىق سايلاۋ كوميسسيالارى, باق وكىلدەرى قاتىستى.
