دەنساۋلىق ساقتاۋ مينيسترلىگىنىڭ مالىمەتىنشە قازىرگى ۋاقىتتا كوروناۆيرۋس ينفەكتسياسىنان 14 096 ادام ەم قابىلداۋدى جالعاستىرۋدا. ولاردىڭ اراسىندا 1 010 بالا بار. ستاتسيونارلاردا 3 687 ناۋقاس جاتىر. 10 409 ادام امبۋلاتوريالىق جاعدايدا ەمدەلۋدە. جالپى ناۋقاستاردىڭ اراسىندا 241 ادامنىڭ ءحالى ناشار. سونىڭ ىشىندە 39 ناۋقاستىڭ جاعدايى اسا اۋىر دەپ باعالانۋدا. 33 ناۋقاس وكپەنى جاساندى جەلدەتۋ اپپاراتىندا جاتىر.
دەنساۋلىق ساقتاۋ مينيسترلىگى بۇدان بىلاي تاۋلىكتىك ناتيجەلەر تۋرالى اقپاراتتى ۇزبەي جاريالاپ وتىرادى. بارلىق مالىمەت رەسمي سايتتا جانە ۆەدومستۆونىڭ الەۋمەتتىك جەلىلەردەگى پاراقشالارى ارقىلى تاراتىلادى. اتاپ ايتقاندا, ناۋقاستاردىڭ جالپى سانى جونىندە, قايتىس بولۋ دەرەكتەرى تۋرالى جانە قوعام ءۇشىن ماڭىزدى احۋالدىڭ بارلىعى رەسمي اقپارات تاراتۋ كوزدەرىندە جەدەل جاريالانىپ تۇرادى.
سانيتارلىق-ەپيدەميالىق باقىلاۋ كوميتەتى سايتىندا باس مەملەكەتتىك سانيتار دارىگەرى ەرلان قياسوۆتىڭ جاڭا قاۋلىسى جاريالاندى. جاڭا قاۋلىعا سايكەس, بوساناتىن جۇكتى ايەلگە پەرزەنتحاناعا سەرىكتەسىن ەرتىپ كىرۋگە رۇقسات ەتىلمەك. ول ءۇشىن سەرىكتەس ادامدا ناتيجەسى بەرىلگەن كۇننەن باستاپ 3 تاۋلىكتەن اسپاعان پتر-تەستىنىڭ تەرىس ناتيجەسى بار انىقتاما بولۋى شارت.
«قازاقستان رەسپۋبليكاسىنىڭ مەملەكەتتىك شەكاراسىنداعى وتكىزۋ پۋنكتتەرىندە كوروناۆيرۋس ينفەكتسياسى اۋرۋىنىڭ الدىن الۋ جونىندەگى شارالاردى ودان ءارى كۇشەيتۋ تۋرالى» باس مەملەكەتتىك سانيتارلىق دارىگەرىنىڭ 2020 جىلعى 23 قازانداعى №59 قاۋلىسىنا ءتيىستى وزگەرىستەر ەنگىزىلدى. قازاقستانعا شەتەلدەن اۋە رەيستەرىمەن كەلەتىن ادامدارعا قاتىستى ءىس-شارالاردى مىناداي تارتىپپەن جۇرگىزۋدى قامتاماسىز ەتسىن: ەرتىپ جۇرەتىن ادامداردا قازاقستاننىڭ مەملەكەتتىك شەكاراسىن كەسىپ وتكەن ساتتە ناتيجەسى بەرىلگەن كۇننەن باستاپ 3 تاۋلىكتەن اسپايتىن پتر ادىسىمەن COVID-19-عا تەستىنىڭ تەرىس ناتيجەسى بار انىقتاما بولعان كەزدە 5 جاسقا دەيىنگى بالالاردى, قازاقستان رەسپۋبليكاسىنىڭ ۇكىمەتتىك دەلەگاتسيالارىن; اۆياكومپانيالار ەكيپاجدارىن قوسپاعاندا, بارلىق كەلگەن ادامدار انىقتاما ۇسىنۋعا مىندەتتى. سونداي-اق شەتەلدەن حالىقارالىق جولاۋشىلار اۆيارەيستەرىمەن كەلگەن ادامدارعا قاتىستى شەكتەۋ شارالارى وسى قاۋلىعا 1-قوسىمشاعا سايكەس جۇرگىزىلەدى», دەلىنگەن قۇجاتتا. اتالعان قاۋلى بۇگىن ساعات 00:00-دەن باستاپ كۇشىنە ەنەدى.
دەنساۋلىق ساقتاۋ مينيسترلىگى مەن رەسەيدىڭ تىكەلەي ينۆەستيتسيالار قورى (رفتيق) الەمدە العاشقى تىركەلگەن كوروناۆيرۋسقا قارسى «سپۋتنيك V» ۆاكتسيناسىن تىركەپ, سونداي-اق ونى ءوندىرۋ جانە تاراتۋ ءراسىمىن جۇرگىزۋ ءۇشىن ىنتىماقتاستىق تۋرالى كەلىسىمگە كەلدى. ءتيىستى قۇجاتقا ەلىمىزدىڭ دەنساۋلىق ساقتاۋ ءمينيسترى الەكسەي تسوي مەن رفتيق باس ديرەكتورى كيريلل دميتريەۆ قول قويدى. قازاقستاننىڭ رەتتەۋشى ورگاندارى قاجەتتى راسىمدەردى اياقتاعاننان كەيىن رەسەي تەحنولوگيا ترانسفەرىن جۇرگىزەدى جانە ەل اۋماعىندا «سپۋتنيك V» ۆاكتسيناسىنىڭ كەمىندە 2 ملن دوزاسىن وندىرۋگە ارنالعان سۋبستانتسيانى جەتكىزەدى.
«پرەزيدەنت قاسىم-جومارت توقاەۆ رەسەي پرەزيدەنتى ۆلاديمير پۋتينمەن قازاقستاندا «سپۋتنيك V» ۆاكتسيناسىن شىعاراتىن زاۋىت سالۋ تۋرالى كەلىستى. بۇل كەلىسىم ەكىجاقتى قارىم-قاتىناسقا سەرپىن بەرەدى, سونداي-اق كوروناۆيرۋس ينفەكتسياسى پاندەمياسىمەن تەزىرەك كۇرەسۋگە مۇمكىندىك تۋادى دەپ سەنەمىن», دەدى ا.تسوي.
مامانداردىڭ ايتۋىنشا, قازاقستان اۋماعىندا «سپۋت-
نيك V» ۆاكتسيناسىن شىعارۋ لوگيستيكالىق شىعىنداردى ازايتۋعا جانە قىسقا مەرزىمدە ۆاكتسينانى مەديتسينالىق مەكەمەلەرگە جەتكىزۋگە مۇمكىندىك بەرەدى.
«رفتيق پەن قازاقستان اراسىنداعى كەلىسىمنىڭ ناتيجەسىندە, حالىققا ادامنىڭ ادەنوۆيرۋستىق ۆەكتورلارىنىڭ تەكسەرىلگەن جانە جاقسى زەرتتەلگەن پلاتفورماسىندا قۇرىلعان تيىمدىلىگى 91%-دان اساتىن كوروناۆيرۋسقا قارسى ۆاكتسينا قولجەتىمدى بولادى. سونىمەن قاتار ەكى ەل اراسىندا تەحنولوگيالىق, عىلىمي جانە مەديتسينالىق تاجىريبە الماسۋ كەڭەيەدى», دەدى رفتيق باس ديرەكتورى ك.دميتريەۆ.
قازىرگى ۋاقىتتا بەلارۋس, ءباا, ۆەنەسۋەلادا جانە بىرقاتار باسقا ەلدە «سپۋتنيك V» ۆاكتسيناسىنىڭ III كلينيكالىق زەرتتەۋ فازاسى, سونداي-اق ءۇندىستاندا II-III فازاسى ماقۇلداندى. 50-دەن اسا ەلدەن 1,2 ملرد-تان اسا دوزا ساتىپ الۋ تۋرالى ءوتىنىم ءتۇستى. شەتەلدىك نارىققا ارنالعان ۆاكتسينانى رفتيق حالىقارالىق سەرىكتەستەرى ءۇندىستان, برازيليا, قىتاي, وڭتۇستىك كورەيا جانە تاعى ءتورت ەل شىعارادى.
ەستەرىڭىزگە سالا كەتەيىك, 24 قاراشادا ن.ف.گامالەي اتىنداعى ەمۇعو مەن رفتيق راندوميزاتسيالانعان پلاتسەبو-باقىلاناتىن كلينيكالىق تىركەۋدەن كەيىنگى كوروناۆيرۋسقا قارسى «سپۋتنيك V» ۆاكتسيناسى 40 مىڭ ەرىكتىنىڭ قاتىسۋىمەن زەرتتەۋدىڭ III كەزەڭىنىڭ ەكىنشى ارالىق تالداۋىنىڭ وڭ ناتيجەلەرىن جاريالادى. زەرتتەۋدىڭ ارالىق ناتيجەلەرى تاعى ءبىر رەت ادامنىڭ ادەنوۆيرۋستىق ۆەكتورلارىنىڭ جاقسى زەرتتەلگەن پلاتفورماسىندا قۇرىلعان الەمدەگى العاشقى تىركەلگەن كوروناۆيرۋسقا قارسى ۆاكتسينا «سپۋتنيك V» ۆاكتسيناسىنىڭ جوعارى تيىمدىلىگىن كورسەتتى. تيىمدىلىكتى باعالاۋ ۆاكتسينانىڭ ءبىرىنشى ينەكتسياسىن (ەكىنشى ينەكتسيانى العاننان كەيىنگى 7-كۇن) نەمەسە كلينيكالىق زەرتتەۋ حاتتاماسىنا سايكەس ەكىنشى باقىلاۋ نۇكتەسىنە جەتكەندە پلاتسەبو العاننان كەيىنگى 28-كۇنى 18 794 ەرىكتى اراسىندا جۇزەگە اسىرىلدى. تالداۋ قورىتىندىسى بويىنشا «سپۋتنيك V» تيىمدىلىگى 91,4%-دى قۇرادى.
وتكەن اپتاداعى مالىمەت بويىنشا ەلىمىزدە كوروناۆيرۋس ينفەكتسياسىنان قايتىس بولعان 44 جاعداي تىركەلدى. دالىرەك ايتساق, شىعىس قازاقستان وبلىسىندا – 11, الماتى قالاسى – 8, نۇر-سۇلتان قالاسىندا – 6, باتىس قازاقستان وبلىسىندا – 6, سولتۇستىك قازاقستان وبلىسىندا – 5, اقمولا وبلىسىندا – 2, اتىراۋ وبلىسىندا – 2, الماتى وبلىسىندا – 1, قوستاناي وبلىسىندا – 1, ماڭعىستاۋ وبلىسىندا – 1, شىمكەنت قالاسىندا 1 ادام ىندەتتىڭ كەسىرىنەن كوز جۇمدى. قازاقستاندا COVID-19-دىڭ سالدارىنان بارلىعى 2 034 ادام قايتىس بولدى.
