ءيا, كىتاپتى ناسيحاتتاۋ, قوعامنىڭ ينتەللەكتۋالدى الەۋەتى مەن مادەني قۇندىلىقتارىن, وسكەلەڭ ۇرپاقتىڭ رۋحاني-ادامگەرشىلىك ءبىلىمىن ارتتىرۋ, بالالاردىڭ, جاستاردىڭ كوركەم ادەبيەتكە دەگەن قۇشتارلىعىن وياتۋ ماقساتىندا شىمكەنت قالالىق ىشكى ساياسات جانە جاستار ىستەرى جونىندەگى باسقارماسىنىڭ «رۋحاني جاڭعىرۋ» ءبولىمى ۇيىمداستىرعان «KITAP FEST» ءىس-شاراسى كوپ جايتتى اڭعارتتى. ەڭ باستىسى, ءۇشىنشى مەگاپوليستە كىتاپقا, كوركەم ادەبيەتكە سۇرانىستىڭ جوعارى ەكەنىن بايقاتتى. قالا تۇرعىندارىن رۋحاني تۇرعىدا بايىتا ءتۇستى. كىتاپسۇيەر قاۋىمدى بىرىكتىرىپ, اپتاعا سوزىلعان ءىس-شارا قالا تۇرعىندارى مەن قوناقتارىنىڭ كوڭىلىنەن شىقتى. فەستيۆال كەزىندە كورمە ورتالىعىنا 2500-دەن استام وقىرمان جينالدى. العاشقى كۇنى شىمكەنتتىك «جەبە» باسپا ءۇيىنىڭ ەلباسى ن.نازارباەۆقا ارنالعان «كەمەڭگەر. دانا. كوشباسى» كىتابىنىڭ تانىستىرىلىمى ءوتتى. ەلباسىنىڭ سىنىپتاسى روزا تىلەمىسوۆا, ارداگەر جۋرناليست بايدۋللا قونىسبەك تۇڭعىش پرەزيدەنت ەڭبەگىنىڭ, تاۋەلسىزدىك جىلدارىنداعى كورەگەن ساياساتىنىڭ ماڭىزدىلىعىنا توقتالىپ, وي-پىكىرلەرىن ورتاعا سالدى. سونداي-اق ارنايى اشىلعان «مارتەبەلى وقىرمان بۇرىشىندا» وڭىردەگى اقىن-جازۋشىلار وقىرماندارىمەن كەزدەسۋلەر وتكىزدى. سونداي كەزدەسۋلەردىڭ بىرىندە ەلىمىزدىڭ بەدەلدى قالامگەرى, جازۋشى, جۋرناليست مارحابات بايعۇت فەستيۆالدىڭ ءمان-ماڭىزىنا ەرەكشە توقتالىپ, كىتاپ قۇندىلىعىن ناسيحاتتادى. «ۇلتتىق قوعامدىق سەنىم كەڭەسىنىڭ جيىنىندا مەملەكەت باسشىسى قاسىم-جومارت توقاەۆ بۇگىنگى زاماندا كىتاپسىز, سونداي-اق كىتاپحاناسىز ادامنىڭ ويداعىداي دامۋى مۇمكىن ەمەستىگىن ايتقان ەدى. راسىندا كىتاپحانا – وقىرمان مەن كىتاپ اراسىنداعى التىن كوپىر. ادامزات تاريحىنىڭ كەرۋەنىن سۇرىندىرمەي اكەلە جاتقان, شىراعى بيىك, پاراساتتىلىق پەن بىلىمدىلىكتىڭ, بايلىق پەن بىلىكتىلىكتىڭ كيەلى ورداسى», دەدى قالامگەر. ەركىن فورماتتا وتكەن باسقوسۋدا جاستار كوكەيدە جۇرگەن سۇراقتارىن قويىپ, تۇشىمدى جاۋاپ الدى. سونىمەن قاتار فەستيۆالدىڭ ءۇشىنشى كۇنى جازۋشى, جۋرناليست كۇليا ايداربەكوۆانىڭ «قازاق قىزى» كىتابىنىڭ تانىستىرىلىمى ءوتتى. وسىعان دەيىن «اناعا تاعزىم», «اكەگە قۇرمەت» كىتابى ارقىلى كوپشىلىكتىڭ سۇيىسپەنشىلىگىنە بولەنگەن كۇليا سمايىلحانقىزى ۇلتتىق قۇندىلىقتارعا, ءتالىم-تاربيە مەن جاستاردىڭ بىلىمگە دەگەن قۇشتارلىعىنا تەرەڭىنەن توقتالدى. سونداي-اق تاريحشى مومبەك ابداكىم ۇلى, بەلگىلى اقىن, عالىم, اۋدارماشى اباي قالشابەك, جازۋشى, دراماتۋرگ سايا قاسىمبەك ءوز شىعارمالارىنداعى قىزىقتى ەپيزودتارىمەن ءبولىسىپ, وقىرمانىمەن اشىق ديالوگ قۇردى. قۋات داۋرەن ۇلى, داۋرەن ايمانبەت, سۇندەت سەيىتوۆ, ارايلىم مۇراتاليەۆا, اقبوتا بەيبىتبەك, تاڭشولپان يمانتاي سىندى جاس اقىن-جازۋشىلاردىڭ وقىرماندارمەن كەزدەسۋى دە قىزىقتى ءوتتى. ال ءوڭىردىڭ ارحيۆ ۇجىمى «مايدانگەرلەر ۇرپاعى جانە ەستەلىكتەر» كەزدەسۋىن ۇيىمداستىردى. كىتاپ فەستيۆالىنىڭ تاعى ءبىر ەرەكشەلىگى, كىتاپحانالار بالالارعا ارناپ قويىلىم قويىپ, كىشكەنتاي وقىرماندارىن قۋانتتى.
نۇر-سۇلتان, الماتى, قاراعاندى, شىمكەنت قالالارىنىڭ باسپا ۇيلەرى, كىتاپ دۇكەندەرى, كىتاپحانالارى وقىرمانمەن اشىق ديالوگ قۇرىپ, پىكىرلەسۋ الاڭشاسىندا كەزدەسۋلەر وتكىزدى, ءوز ونىمدەرىمەن تانىستىردى. «قازاق ۋنيۆەرسيتەتى», «فوليانت», «كنيجنىي كلۋب», «جەبە», «قىزمەت گازەتى», «شۇعىلا كىتاپ», «قاسىم» باسپا ۇيلەرى, «ەرۋديت», «قازىنا» كىتاپ دۇكەندەرى مەن شىمكەنت قالاسىنىڭ كىتاپحانالارى اپتا بويى قالا تۇرعىندارىنا قۇندى مالىمەتتەر بەردى. مىسالى, قاراعاندى قالاسىندا اشىلعان «قاسىم» باسپاسى قازاق كلاسسيكاسىنىڭ جاۋھارلارىن كىتاپ ەتىپ شىعارا باستاعان. «ناتيجە» كومپانياسى قازاق جانە شەتەل كوركەم ادەبيەتىن شىعارۋدا. شەتەلدىك اۆتورلاردىڭ شىعارمالارىن قازاق تىلىنە اۋدارىپ باساتىن باسپاحانادان بۇگىنگە دەيىن 14 سەريالى كوركەم ادەبيەت, كلاسسيكا, روماندار جارىققا شىعىپتى. سونىمەن بىرگە عىلىمعا قىزىعۋشىلار ءۇشىن كىتاپ كورمەسىندە «قازاق ۋنيۆەرسيتەتى» باسپاسىنان شىققان ابايتانۋدىڭ 47 تومدىعى مەن ءال-فارابي بابامىزعا ارنالعان ادەبي, عىلىمي كىتاپتارى دا ۇسىنىلدى. ال نۇر-سۇلتاننان ات تەرلەتىپ كەلگەن «فوليانت» باسپا ءۇيى قازاق كلاسسيكتەرى, بالالار ادەبيەتى, ەنتسيكلوپەديالار ۇسىندى. ونىڭ ىشىندە «مەن نەگە قورقامىن؟», «مەن نەگە باقىتتى بولامىن» دەگەن وقۋشىلارعا ارنالعان كىتاپتار, تاربيەلىك ماڭىزى زور «قونجىقتىڭ حيكايالارى» سياقتى ءتورت سەريالى كىتاپ, جوعارى سىنىپ وقۋشىلارىنا «ۆەپپي», «شاتاق قىزدىڭ شاتپاق كۇندەلىگى», «قاباعى تۇنجىر بالاقاي», «توم سويەردىڭ باسىنان كەشكەندەرى», «بەرريدىڭ باسىنان كەشكەندەرى» سياقتى شىعارمالار بار.
فەستيۆال اياسىندا ۇيىمداستىرىلعان «بالالارعا بازارلىق» اكتسياسى دا جاقسى ناتيجە كورسەتتى. التىن ساندىققا زيالى قاۋىمنان باستاپ, قاراپايىم تۇرعىندارعا دەيىن ەڭ ازى ءبىر كىتاپتان سالدى. جينالعان 350 كىتاپتى شىمكەنتتىڭ ەرىكتى جاستارى كىتاپ الۋعا مۇمكىندىگى از وتباسىلارىنا تارتۋ ەتەدى. رۋحانيات الەمىندەگى ايتۋلى ءىس-شارانىڭ جابىلۋىنا قاتىسقان قالا اكىمىنىڭ ءبىرىنشى ورىنباسارى شىڭعىس مۇقان كوپشىلىكتى, بالالار مەن جاستاردى بىلىممەن سۋسىنداتىپ, رۋحاني ءنار بەرەتىن كىتاپ مەرەكەسىنە بەلسەنە اتسالىسقاندارعا العىسىن جەتكىزدى. «ادامنىڭ از قامتىلۋى, ومىردە قيىنشىلىق كورۋى, باقىتسىزدىققا تاپ بولۋى, ونىڭ ءبارى كوپ وقىماعاندىقتان. كوپ وقىعان, رۋحاني باي ادام ءومىر ءسۇرۋدى ۇيرەنەدى. الەۋمەتتىك قيىندىق كورمەيدى. رۋحاني كەمەلدىككە كەنەلەدى. سيقىرلى ساندىقتاعى كىتاپتار بالالاردىڭ بولاشاعىنا وڭ ىقپال ەتەدى دەپ ويلايمىن. بارلىق قاتىسۋشىلارعا قالا اكىمىنىڭ اتىنان العىس ايتقىم كەلەدى. وسى كورمەگە قاتىسۋعا رەسپۋبليكامىزدىڭ تۇكپىر-تۇكپىرىنەن كەلگەن باسپا ۇيلەرى مەن كىتاپحانالاردىڭ بارلىعى كەلۋشىلەرگە كىتاپتىڭ قۇدىرەتىن تاعى ءبىر پاش ەتتى. حالىقارالىق «الاش» سىيلىعىنىڭ لاۋرەاتى مارحابات بايعۇت باستاعان بەلگىلى قالامگەرلەرمەن وتكەن ءار كەزدەسۋ تاعلىمدى, ءتالىمدى بولدى», دەدى شىڭعىس جۇمابەك ۇلى.
فەستيۆالدىڭ جابىلۋ سالتاناتىندا اپتا بويى بەلسەنە قاتىسقان بارشا كىتاپحانا مەن باسپا ۇيلەرى, كىتاپ دۇكەندەرىنىڭ ۇجىمى قالا اكىمىنىڭ العىس حاتىمەن ماراپاتتالدى.
شىمكەنت
