75 ۆولونتەردىڭ مەديتسينالىق كومەگى
م.وسپانوۆ اتىنداعى باتىس قازاقستان مەملەكەتتىك مەديتسينا ۋنيۆەرسيتەتىندە «مەديك-ۆولونتەرلەر» كلۋبى بار. اتالعان توپ 2011 جىلدان بەرى جۇمىس ىستەيدى. ءوزىنىڭ اتى ايتىپ تۇرعانداي, دەنساۋلىعى سىر بەرگەندەرگە مەديتسينالىق كومەك كورسەتەدى, اۋرۋدىڭ الدىن الۋعا باعىتتالعان شارالار ۇيىمداستىرادى.
– ءبىز نەگىزىنەن مەديتسينالىق جاردەمگە كۇش سالامىز. مەكتەپتەر مەن كوللەدجدەردە جۇقپالى, ونكولوگيالىق اۋرۋلارعا قارسى ءتۇسىندىرۋ جۇمىستارىن جۇرگىزىپ, قالاي ساقتانۋ كەرەكتىگىن ايتامىز. سونداي-اق كوپشىلىك جەرلەردە ادام اعزاسىنداعى قانت مولشەرىن انىقتاپ, قان قىسىمىن ولشەيمىز. اپتاسىنا ەكى رەت وبلىستىق ورتالىق اۋرۋحاناعا بارىپ, ارنايى كەزەكشىلىكپەن سونداعى مەدبيكەلەردىڭ «قولىن ۇزارتامىز». مىسالى, قاڭتار-ناۋرىز ايلارىندا مەديتسينالىق مەكەمەلەرگە بارىپ تۇردىق, – دەيدى «مەديك-ۆولونتەرلەر» كلۋبىنىڭ جەتەكشىسى باقتيار بايماحان.
ونىڭ سوزىنشە, ەلىمىزدە توتەنشە جاعداي جاريالانعاندا دا ۆولونتەرلەردىڭ ارقايسىسى قولدا بار قاراجاتىن قوسىپ, ماتەريالدىق جاعىنان قيىندىققا تاپ بولعان 4-5 وتباسىعا ازىق-ت ۇلىك تاراتقان. بۇل توپتا قازىرگى تاڭدا 75 ستۋدەنت بار.
العاشقى مەديتسينالىق كومەكتى قالاي جاساۋ كەرەك, كۇيزەلىستى قايتكەندە جەڭۋگە بولادى دەگەن كۇندەلىكتى ومىردە قاجەتتى كەڭەستەر بەرەتىن كلۋب ەندى ناۋقاس بالالارعا اقىسىز ماسساج جاساۋدى جوسپارلاپ وتىر. ويتكەنى ءتۋابىتتى دەرتكە دۋشار بولعان سابيلەردىڭ سانى, وكىنىشكە قاراي, ەلىمىزدە از ەمەس...
قايىرىمدىلىق اكتسيالارىن وتكىزەدى
سالاماتتى ءومىر سالتىن ءارى قايىرىمدىلىق جاساۋدى ناسيحاتتايتىن «Ansar volunteer» توبىن اقتوبەلىكتەردىڭ ءبىرازى بىلەدى. ولار وبلىستاعى ەرىكتى جاستار اراسىندا شاعىن فۋتبولدان تۋرنير وتكىزىپ, كوماندالاردىڭ سايىسقا قاتىسۋ جارناسىنان تۇسكەن اقشانى يگى ىسكە جۇمسايدى. ماسەلەن, سونداي ويىننىڭ بىرىنەن جينالعان 200 مىڭ تەڭگەنى ۆولونتەرلەر 4 وتباسىعا ءبولىپ بەردى. ال توتەنشە جاعداي كەزىندە الەۋمەتتىك جەلىلەر ارقىلى, دەمەۋشىلەردىڭ ارقاسىندا 260 مىڭ تەڭگە جيناپ, 29 مۇقتاج وتباسىعا ازىق-ت ۇلىك تاراتتى. قاسيەتتى رامازان ايىندا 100 مىڭ تەڭگە جينالىپ, كوپ بالالى, الەۋمەتتىك جاعدايى تومەن 15 اناعا ازىق-ت ۇلىك سەبەتى بەرىلدى. وعان قوسا تۇرعىنداردىڭ قاۋىپسىزدىگى ءۇشىن ۆولونتەرلەر 200-دەن استام مەديتسينالىق بەتپەردە تىگىپ, جۇرتشىلىققا ۇلەستىرگەن. «Ansar volunteer» توبىنىڭ جەتەكشىسى مەيرامبەك شەكەرناەۆ يگى ىستەر تۋرالى وي-پىكىرىن تومەندەگىشە ساباقتادى:
– قازىرگى تاڭدا قۇرامىمىزدا 40-قا جۋىق ۆولونتەر بار. جاستاردىڭ تەك قايىرىمدىلىقپەن اينالىسپاي, رۋحاني دامۋى ءۇشىن ساقتاعان بايىشەۆ اتىنداعى وبلىستىق كىتاپحانامەن بىرلەسىپ, «كوۆوركينگ» ورتالىعىندا ءار جەكسەنبى سايىن ءتۇرلى شارالاردىڭ وتۋىنە مۇرىندىق بولىپ ءجۇرمىز. اتاپ ايتساق, «كينوtime» شاراسىندا تاربيەلىك مازمۇنى تەرەڭ وتاندىق فيلمدەردى ناسيحاتتاساق, «وقىرمان ويىندا» زامانداستارىمىزدىڭ كىتاپ وقۋعا دەگەن ىنتاسىن وياتىپ, ءوزارا پىكىر الىسامىز. «كەيىپكەرمەن سۇحبات» ايدارىندا جاستاردى ومىردە وزىندىك ورنىن تاپقان بىلىكتى ماماندارمەن كەزدەستىرسەك, ۋاقىتتى ءتيىمدى پايدالانىپ, ادامدارمەن دۇرىس قارىم-قاتىناس قۇرۋى ءۇشىن پسيحولوگيالىق سەمينار-ترەنينگتەر وتكىزەمىز. بۇنىڭ ءبارى قاتارلاستارىمىزدىڭ اراسىندا زور قىزىعۋشىلىق تۋعىزدى.
بىلتىر اقتوبە قالاسىنىڭ 150 جىلدىعىنا «150 جىلدىققا –150 ءتۇپ اعاش» اكتسياسىن باستاپ, 25 جاس كوشەت وتىرعىزدىق. ەستافەتانى باسقا كلۋبتارعا جولدادىق, – دەيدى.
ايتا كەتەيىك, اتالعان كلۋب وتكەن جىلدىڭ 1 ناۋرىزىندا «اڭسار» اقپاراتتىق تالداۋ ورتالىعىنىڭ جانىنان قۇرىلعان.
P.S. «كەلىسىپ پىشكەن تون كەلتە بولماس». بىرىگىپ, ءبىر ءۇيدىڭ بالالارىنداي تاتۋ بولعاندا عانا كەز كەلگەن شارۋانىڭ شىرايى شىعادى. ءبىز اڭگىمەگە تارتقان جاس ۆولونتەرلەردىڭ دە ايتارى سول.
ايبەك تاسقاليەۆ,
جۋرناليست
اقتوبە
