«ماسكەۋدىڭ 70 ەمحاناسىندا COVID-19-عا قارسى ۆاكتسينا ەگۋ باستالدى. ۆيرۋس جۇقتىرۋى مۇمكىن دەگەن توپتاعى ازاماتتار وزدەرىنىڭ كاسىبي قىزمەتىنە بايلانىستى كۇنىنە جۇزدەگەن اداممەن بايلانىستا بولادى. قازىرگى ۋاقىتتا ۆاكتسينا مەنشىك نىسانىنا قاراماستان مەديتسينالىق جانە ءبىلىم بەرۋ مەكەمەلەرىنىڭ, سونداي-اق قالالىق الەۋمەتتىك ۇيىمداردىڭ بارلىق قىزمەتكەرلەرىنە سالىنىپ جاتىر» دەپ حابارلاعان قالالىق كوروناۆيرۋس جاعدايىن باقىلاۋ جونىندەگى جەدەل شتابتىڭ وكىلدەرى.
تۇرعىندارعا بۇل جاڭالىقتى سمس-حابارلاما ارقىلى تاراتقان. ۆاكتسينا العىسى كەلگەندەر ارنايى پورتالدا تىركەلۋى كەرەك. ەكپە جاساۋعا بولاتىن كابينەتتەر كۇن سايىن ساعات 08:00-دەن 20:00-گە دەيىن جۇمىس ىستەيدى. ماسكەۋ ەمحانالارىنا تىركەلگەن 18 جاستان 60 جاسقا دەيىنگى ادامدار كوروناۆيرۋسقا قارسى ۆاكتسينا الا الادى. الايدا بۇل 60 جاستان اسقان ادامدار ءۇشىن مۇمكىن بولماي تۇر.
ۆاكتسينا الۋدىڭ دا بەلگىلى شارتتارى بار. ەكپە العىسى كەلگەندەردىڭ سوزىلمالى اۋرۋلارى بولماۋى كەرەك نەمەسە سوڭعى ەكى اپتادا جرۆي-مەن اۋىرماعان بولۋلارى شارت. سونداي-اق تۇماۋعا نەمەسە باسقا دا ىندەتتەرگە قارسى العان سوڭعى ۆاكتسينادان كەم دەگەندە 30 كۇن ءوتۋى كەرەك. جۇكتى جانە بالا ەمىزەتىن ايەلدەر دە ۆاكتسينا الا المايدى.
