ايماقتار • 05 جەلتوقسان، 2020

"سونار-2020" جارىسىنىڭ باس بايگەسىن اتىراۋلىق بۇركىتشى يەلەندى

182 رەت كورسەتىلدى

جەتىسۋ جەرىندە يت جۇگىرتىپ، قۇس سالعان ساياشىلىقتىڭ جۇلگەسى ۇزىلگەن ەمەس. اسىرەسە، قۇسبەگىلىك ونەرىنىڭ ءباسى بيىك. ونىڭ ءبىر مىسالىن وبلىستا جىل سايىن وتكىزىلەتىن «سونار» ساياتشىلار جارىسىنىڭ دەڭگەيىنەن كورۋگە بولادى. بيىل دا بۇل ءداستۇرلى جارىس ەڭبەكشىقازاق اۋدانىندا ۇيىمداستىرىلدى، دەپ حابارلايدى Egemen.kz.

«سايات» ۇلتتىق سپورت تۇرلەرى باعدارلاماسى اياسىندا وتكەن «سونار-2020» جارىسىنا ەلىمىزدىڭ ءار ايماعىنان ساياتشىلار كەلدى. وكىنشىكە قاراي، پاندەميا شەكتەۋلەرىنە بايلانىستى ساياتشىلاردىڭ سانى قىسقارىپ، جارىس تالاپتارىنا دا وزگەرىستەر ەنگەن ەكەن. بيىل وڭىردەن كەلەتىن قۇسبەگىلەردىڭ سانى 5 ادامنان اسپاۋى شارت بولعان. ادەتتەگىدەي ساياتشىلىققا قىزىعاتىن جانكۇيەرلەردىڭ دە جارىس ايماعىنا كەلۋىنە شەكتەۋ قويىلىپتى. دەگەنمەن، تۇرگەن تاۋىنىڭ جوتاسىنانا ەستىلگەن قىران قۇستىڭ قيقۋى ساياتشىلاردىڭ دەلەبەسىن قوزدىردى.

- الماتى وبلىسى «سونار» جارىسىن وتكىزۋدى داستۇرگە اينالدىرعانىن جۇرت بىلەدى. ءبىز جىل سايىن قۇس باپتاپ، تازى جاراتقان ساياتشىلاردىڭ باسىن قوسىپ كەلەمىز. بىلتىرعى «سونار» ۇلتتىق سپورتتى دارىپتەۋ ماقساتىندا اۋقىمىن كەڭەيتىپ، حالىقارالىق دەڭگەيدە وتكەن بولاتىن. بيىل قالىپتاسقان كارانتين جاعدايىنا بايلانىستى جارىس تالاپتارىنا شەكتەۋ قويىلدى. ساقتىق شاراسىن كۇشەيتە وتىرىپ، قاتىسۋعا ىنتا بىلدىرگەن ايماقتاردىڭ قۇسبەگىلەرىن تورگە وزدىردىق. بابى كەلىسكەن جەتپىسكە جۋىق قۇستىڭ ەپتىلىگى مەن قارىمىن سىنادىق. ءارى بيىل تازىلاردىڭ جارىسىنا بولەك جۇلدە تىگىپ، بايگە بەردىك، - دەيدى وبلىستىق دەنە شىنىقتىرۋ جانە سپورت باسقارماسىنىڭ باسشىسى نۇرباقىت تەڭىزباەۆ.

ال «سونار-2020» ساياتشىلار جارىسىنىڭ باس بايگەسىن اتىراۋلىق ساياتشىلار قانجىعاعا بايلادى. «نارىن» نىسپىلى بۇركىت وسى جولى باسقا قىرانداردان دارالانىپ، يەسىنە 1 ملن تەڭگە جۇلدە اپەردى.

- «نارىننىڭ» بيىل التىنشى تۇلەۋى. سايات سايىسىنان جۇلدەسىز قايتقان كەزىمىز جوق. ءبىر مارتە الەم چەمپيوناتىنان، بىرنەشە دۇركىن ەل چەمپيوناتىنان بايگە الدىق. ءوزىم بۇركىت باپتاۋدى بالا كەزىمنەن سەرىك ەتتىم. بۇل – اتادان بالاعا ميراس بولاتىن ونەر عوي. ماعان بۇل ءۇردىس اكەمنەن قوندى. ءوزىم دە ەندى وسى ءداستۇردى جالعاستىرىپ، ساياتشىلىقتى الەم حالىقتارىنىڭ الدىندا دارىپتەۋگە بارىمدى سالىپ ءجۇرمىن، - دەيدى اتىراۋ وبلىسىنىڭ اتىنان جارىسقا قاتىسقان جۇلدەگەر قۇسبەگى ارمان ابدىكارىم ۇلى.

سوڭعى جاڭالىقتار

ۇقساس جاڭالىقتار