قوعام • 04 جەلتوقسان، 2020

"تاريحقا تولى تارباعاتاي" الماناعىنىڭ 5-تومى جارىق كوردى

50 رەت كورسەتىلدى

الماتىدا "تاريحقا تولى تارباعاتاي" الماناعىنىڭ 5-تومى جارىق كوردى. ASSYLTAS قوعامدىق قورىنىڭ ۇيىتقى بولۋىمەن قولعا الىنعان رۋحاني ەڭبەكتىڭ تۇساۋكەسەر ءراسىمى ۇلتتىق كىتاپحانادا ءوتتى، دەپ حابارلايدى Egemen.kz.

– بۇل كىتاپتىڭ العاشقى تومدارىنىڭ بىرىنە كەزىندە مەن دە العىسوز جازعان ەدىم. تۇرسىن تاستەكەەۆتەي ابزال ازاماتتىڭ تۇياعى دۋلات باۋىرىمىز قولعا العان مىنا باستاما مەنى قاتتى قۋانتتى. پاراقتاپ وتىرىپ قانشاما يگى دۇنيە بار ەكەنىن بايقاپ وتىردىم. ءبىز ءالى دە بولسا كەيبىر تاريحي دەرەكتەر مەن شىندىقتارعا ءالى دە تەرەڭ بويلاي الماي ءجۇرمىز. سونداي ولقىلىقتاردىڭ ورنىن تولتىراتىن كىتاپ – «تاريحقا تولى تارباعاتاي» دەپ بىلەمىن، – دەدى كەشتى اشىپ بەرگەن قازاقستان جازۋشىلار وداعىنىڭ توراعاسى، اقىن ۇلىقبەك ەسداۋلەت.

         كىتاپتىڭ قۇراستىرۋشىسى ەردەن ورالبايدىڭ ايتۋىنشا، مۇندا بىرنەشە اۆتوردىڭ دۇنيەلەرى توپتاستىرىلعان.

         – نەگىزگى 12 ايدار بار. سونىڭ اياسىندا كەلىپ تۇسكەن ەڭبەكتەردى سارالاپ كىتاپقا ەنگىزەمىز. ارقايسىسى ءبىر-ءبىرىن تولىقتىرىپ تۇرعان، اسا ماڭىزدى تۋىندىلار. بۇل تومعا ارناپ بۇكىل شىعىس قازاقستان وبلىسىنان ماتەريالدار جينادىق. بۇيىرتسا، كەلەسى 6-تومىن شىعارۋ دا ويدا بار. 2021 جىلدىڭ باسىنان باستاپ تاريحشى، ادەبيەتشى، باسقا دا بىلىكتى ماماندارعا حات جولداپ، كەلىپ تۇسكەن ەڭبەكتەر نەگىزىندە شىعارىلىمدى دايىندايمىز. 22 ناۋرىزعا دەيىن ەڭبەكتەر قابىلدانادى. جالپى، كىتاپتى قۇراستىرىپ شىعۋعا 4-5 ايداي ۋاقىت كەتتى، – دەيدى ەردەن ورالباي.

تۇساۋكەسەر ءراسىمى بارىسىندا «TAS GROUP» كومپانيالار توبىنىڭ دۋلات تاستەكەەۆ كىتاپقا وراي لەبىزىن ءبىلدىردى.

– قازاقستاننىڭ بۇكىل اۋماعىندا ولكەتانۋ عىلىمىن جانداندىرىپ، ەكو ءتۋريزمدى دامىتۋ – ءبىزدىڭ ارمانىمىز. تۋعان ولكە جايلى جاستارعا ءبىلىم بەرەتىن، ناسيحاتتايتىن، سول ارقىلى وتانعا دەگەن سۇيىسپەنشىلىكتى ارتتىرىپ، ەل تاريحىنا دەگەن قۇرمەتىن اسقاقتاتاتىن وسىنداي ۇلتتىق جوبالار كوبەيە تۇسسە ەكەن دەيمىن. ايتا كەتۋ كەرەك، «تارباعاتاي» تەك تاۋدىڭ نەمەسە اۋداننىڭ اتاۋى ەمەس، قازىرگى قىتاي تەرريتورياسىنان باستالىپ شىڭعىستاۋعا دەيىن سوزىلىپ جاتقان، حالىق قونىستانعان ءوڭىردىڭ اتاۋى. سوندىقتان كىتاپتىڭ جاستار ءۇشىن، جالپى قازاق ءۇشىن ماڭىزى ايرىقشا. وسى ەڭبەكتىڭ جارىق كورۋىنە ۇلەس قوسقان بارشا جاندارعا العىسىمىز شەكسىز، – دەدى مەتسەنات.  

ەسكە سالايىق، بۇعان دەيىن 2016-2019 جىلدار ارالىعىندا تارباعاتاي ولكەسىنىڭ ەنتسيكلوپەدياسىنا اينالعان «تاريحقا تولى تارباعاتاي» الماناعىنىڭ ءتورت تومى جارىققا شىققان ەدى.  

سوڭعى جاڭالىقتار

بيىل 200 جاڭا مەكتەپ سالىنادى

ءبىلىم • بۇگىن، 14:47

ۇقساس جاڭالىقتار