ايماقتار • 05 جەلتوقسان، 2020

تالدىقورعان تۇرعىندارىن وتاندىق جاڭا اۆتوبۋستار تاسىمالدايدى

21 رەت كورسەتىلدى

تالدىقورعان قالاسىنىڭ اۆتوپاركتەرى جاڭارتىلىپ، قالا تۇرعىندارىنا اقپان ايىنان باستاپ وتاندىق جاڭا اۆتوبۋستار قىزمەت كورسەتەدى. مۇنداعى باستى ماقسات – تالدىقورعاندىقتاردىڭ جايلى، كەڭ، ەكولوگيالىق تازا  قوعامدىق  كولىكتەرمەن ءجۇرۋىن قامتاماسىز ەتۋ. بۇل تۋرالى بۇگىن وبلىس اكىمى اماندىق باتالوۆتىڭ قاتىسۋىمەن اۆتوبۋستاردى تەستىلەۋدەن وتكىزۋ بارىسىندا ايتىلدى، دەپ حابارلايدى Egemen.kz الماتى وبلىسى اكىمىنىڭ ءباسپاسوز قىزمەتىنە سىلتەمە جاساپ.

وبلىس اكىمى بىرەر جىل بۇرىن تالدىقورعانداعى توزىعى جەتكەن قوعامدىق كولىكتەردى جاڭارتاتىن ۋاقىت كەلگەنىن، بۇل رەتتە وتاندىق اۆتوبۋستاردىڭ مۇمكىندىكتەرىن زەردەلەپ كورۋ كەرەكتىگىن ايتقان بولاتىن. وسى تاپسىرماعا سايكەس  «سارىارقااۆتوپروم» جشس-مەن كەلىسىم جاسالىپ، جەرگىلىكتى بيۋدجەتتەن «جەتىسۋ» اكك ارقىلى 55 جاڭا اۆتوبۋس ساتىپ الىنباق. ولار قارجىلىق، زاڭدىق تۇرعىدان بارلىق تالاپتارعا ساي كەلەتىن قالانىڭ بىرنەشە اۆتوپاركتەرىنە 7 جىلعا ليزينگىگە بەرىلەدى.

جاڭا اۆتوبۋستى «سارىارقااۆتوپروم» زاۋىتىنىڭ وكىلى الەكساندر تسوي تانىستىردى. اۆتوبۋستىڭ كىرەبەرىس باسپالداعىندا مۇمكىندىگى شەكتەۋلى جاندار ءۇشىن پاندۋس قاراستىرىلعان، ال اۆتوبۋس ىشىندە قولارباعا ارنالعان ورىن بار. اۆتوبۋستىڭ ورىندىقتارى جايلى، ءىشى كەڭ، ارنايى بەينەكامەرالار ورناتىلعان. ەكولوگيالىق جاعىنان تازا، ياعني اۆتوبۋس گازبەن جۇرەدى.  كولىكتىڭ بارلىق مۇمكىندىكتەرىمەن تانىسقان وبلىس باسشىسى ا.باتالوۆ ۇزىندىعى 10،3 م بولاتىن ۇلكەن اۆتوبۋستاردى قالانىڭ نەگىزگى كوشەلەرىنە جۇرگىزۋ كەرەكتىگىن ايتتى، سەبەبى ىندەت كەزىندە ادامدار ءبىر-بىرىنەن الشاق تۇرعانى ءجون. ال ونداي مۇمكىندىك جاساۋ ءۇشىن اۆتوبۋستاردىڭ ءىشى وسىنداي كەڭ بولۋى ءتيىس. ال ودان كىشى اۆتوبۋستار قوسالقى كوشەلەردىڭ باعىتىندا جۇرەدى.

ء"بىز سىزدەرگە وسىنداي جاڭا اۆتوبۋستاردى 7 جىلعا ليزينگىگە الىپ بەرەمىز. بۇل يگىلىكتى سىزدەر ءۇشىن ەمەس، ءبىرىنشى كەزەكتە قالا تۇرعىندارى ءۇشىن جاساپ جاتىرمىز. ال اۆتوپارككە كولىكتەردىڭ ءىشىن تازا قالپىندا ساقتاپ، كۇتىپ ۇستاۋ مىندەتى جۇكتەلەدى. جۇرگىزۋشىنىڭ جاۋاپتىلىعىنان باستاپ كوندۋكتورلاردىڭ كيىمىنە دەيىن بىرىڭعاي، جوعارى تالاپقا ساي بولۋى كەرەك. ءبىزدىڭ تالدىقورعان باسقا قالالاردان كەم ەمەس، سوندىقتان ءبىز قىزمەت كورسەتۋدىڭ جاڭا دەڭگەيىنە شىعۋىمىز كەرەك"، - دەدى ا. باتالوۆ.

اتاپ وتسەك، تالدىقورعاندا قازىر 26 باعىتتا 196 اۆتوبۋس قاتىنايدى. ولاردىڭ كوپشىلىگىنىڭ بازاسى ەسكىرگەن. سوندىقتان «اقنار»، «جان ەل»، «سايمان»، «تاكسوپارك»، «ترانستال» سياقتى جولاۋشى تاسىمالىمەن اينالىساتىن مەكەمەلەردىڭ اۆتوپاركتەرى ءۇشىن ساتىپ الىناتىن «سارىارقااۆتوپروم» جشس-نىڭ 55 جايلى جاڭا اۆتوبۋسى قوعامدىق كولىك قاتىناسىن جاقسارتۋعا مۇمكىندىك بەرەدى دەپ كۇتىلۋدە.  بۇل مەمەكەلەرگە قوعامدىق كولىكتەر 7 جىلعا ليزينگىگە بەرىلەدى. الىناتىن اۆتوبۋستاردىڭ 25-ءى – Yutong ماركالى، 27-ءسى – پاز ماركالى اۆتوبۋس.

سوڭعى جاڭالىقتار

دوللار ارزانداپ جاتىر

ەكونوميكا • بۇگىن، 11:37

قالادا قار بورايدى...

ايماقتار • بۇگىن، 10:47

ۇقساس جاڭالىقتار