قوعام • 04 جەلتوقسان، 2020

اقتوتى رايىمقۇلوۆا مەملەكەتتىك رامىزدەردى پايدالانۋ قاعيدالارىنا ەنگىزىلگەن وزگەرىستەر جايلى ايتتى

11 رەت كورسەتىلدى

بۇگىن قازاقستان رەسپۋبليكاسىنىڭ مادەنيەت جانە سپورت ءمينيسترى اقتوتى رايىمقۇلوۆا پرەزيدەنت جانىنداعى ورتالىق كوممۋنيكاتسيالار قىزمەتىندە ونلاين بريفينگ وتكىزدى، دەپ حابارلايدى Egemen.kz.

مينيستر مەملەكەت باسشىسىنىڭ تاپسىرماسىنا ساي قازاقستان رەسپۋبليكاسى ۇكىمەتىنىڭ وسى جىلى 27 قاراشاداعى № 801 قاۋلىسىمەن مەملەكەتتىك تۋدى، ەلتاڭبانى جانە گيمندى پايدالانۋ (ورناتۋ، ورنالاستىرۋ) قاعيدالارىنا ەنگىزىلگەن وزگەرىستەر جايلى ايتتى.

پرەزيدەنت قاسىم-جومارت توقاەۆ 27 قازاندا مەملەكەتتىك رامىزدەردى پايدالانۋعا ارنالعان قولدانىستاعى زاڭنىڭ قاعيدالارىن قايتا قاراۋ تۋرالى تاپسىرما بەرگەن ەدى.

اقتوتى رايىمقۇلوۆا وزگەرتۋلەر ەنگىزىلگەننەن كەيىن ازاماتتارىمىز ءۇشىن ەندى مەملەكەتتىك تۋدى پايدالانۋ اياسى زاڭناما تۇرعىسىنان كەڭەيگەنىن جەتكىزدى.

«بىرىنشىدەن، تۋدى جەكە جانە زاڭدى تۇلعالار كەز كەلگەن عيماراتتا، ونىڭ ىشىندە بالكوندا، سالتاناتتى ءىس-شارا وتەتىن ورىندا پاتريوتتىق سەزىمىن، وتانداستارىن قولداۋ ماقساتىندا پايدالانا (ورناتۋ، ورنالاستىرۋعا) الادى.

ەكىنشىدەن، جەكە تۇلعالار ەنگىزىلگەن وزگەرىسكە سايكەس مەملەكەتتىك تۋدى كەز كەلگەن عيماراتتا ء(بىر نەمەسە كوپ قاباتتى) ەكستەرەرلى نۇسقادا ورنالاستىرۋ كەزىندە عيماراتتىڭ ساۋلەت ەرەكشەلىگىنە قاراماستان پايدالانا الادى.

ۇشىنشىدەن، بۇدان بىلاي جەكە تۇلعا عيماراتتا ورنالاسقان مەملەكەتتىك تۋدى تۇندە جارىق قۇرالدارىن قولدانباي پايدالانا الادى. تاۋلىكتىڭ قاراڭعى ۋاقىتىندا جارىقتاندىرۋ تالابى زاڭدى تۇلعا مەن مەملەكەتتىك ورگاندارعا عانا قاتىستى قولدانىلادى.

جالپى جوعارىدا كورسەتىلگەن وزگەرتۋلەر تۋىمىزدىڭ قولدانىلۋ اياسىن ەداۋىر كەڭەيتەدى. ونىڭ قوعامداعى پاتريوتيزم رۋحىن نىعايتۋعا باعىتتالعان سيمۆولدىق كاپيتالىن جاڭاشا ۇعىنۋعا مۇمكىندىك بەرەدى»،-دەدى مينيستر.

سونىمەن قاتار مينيستر ەلىمىزدە وتكىزىلىپ كەلە جاتقان «مەنىڭ تۋىم، مەنىڭ وتانىم!» اكتسياسى جايلى دا ايتتى. 

«مەملەكەتتىك رامىزدەر، ۆەدومستۆولىق جانە ولارعا تەڭەستىرىلگەن وزگە دە ناگرادا گەرالديكاسى ماسەلەلەرى جونىندەگى رەسپۋبليكالىق كوميسسياسىنىڭ وتكەن جىلى 23 قازانداعى حاتتاماسىنا سايكەس نۇر-سۇلتان، الماتى، شىمكەنت قالاسى مەن بارلىق وبلىس اكىمدىگى جىل سايىن «مەنىڭ تۋىم، مەنىڭ وتانىم!» اكتسياسىن وتكىزىپ كەلەدى. بۇل اكتسيانىڭ ماقساتى تۇرعىندار اراسىندا مەملەكەتتىك رامىزدەردى دارىپتەۋ جانە پاتريوتيزمگە تاربيەلەۋ»،-دەدى اقتوتى رايىمقۇلوۆا.

سوڭعى جاڭالىقتار

دوللار ارزانداپ جاتىر

ەكونوميكا • بۇگىن، 11:37

قالادا قار بورايدى...

ايماقتار • بۇگىن، 10:47

ۇقساس جاڭالىقتار