كەلىسىمگە سايكەس, تاراپتار مينەرالدىق رەسۋرستار, ايماقتىق گەولوگيا سالالارىندا جانە گەولوگيالىق كارتالار ازىرلەۋ بويىنشا ءوزارا ەكونوميكالىق قاتىناستى كۇشەيتپەك. بۇدان بولەك, ەكى ەلدىڭ مەملەكەتتىك جانە جەكەمەنشىك ۇيىمدارى, گەولوگيالىق بارلاۋمەن اينالىساتىن كومپانيالارى اراسىنداعى بايلانىس رەتتەلەدى.
سونىمەن قاتار, تاراپتار ءتۇرلى پايدالى قازبالار كەن ورىندارىن ىزدەۋ جانە باعالاۋ ءۇشىن بىرگە گەولوگيالىق, گەوفيزيكالىق زەرتتەۋلەر جۇرگىزەدى. بۇعان جەر استى سۋلارىن تابۋ, ءتۇرلى ماسشتابتاعى گەولوگيالىق تۇسىرىلىمدەر جاساۋ, مينەرالدىق شيكىزاتتىڭ كەن ورىندارىن تابۋعا باعىتتالعان گەوحيميالىق, گەوفيزيكالىق زەرتتەۋ ادىستەرىن قولدانۋ بويىنشا دا جۇمىستار كىرەدى.
ماعزۇم مىرزاعاليەۆتىڭ سوزىنشە, مەموراندۋم قازاقستان مەن رەسەيدىڭ گەولوگيا سالاسىن دامىتۋعا كەڭ مۇمكىندىكتەر اشىپ, گەولوگيالىق كومپانيالار اراسىندا ۇزاق مەرزىمدى قارىم-قاتىناس ورناتۋعا ىقپال ەتەدى.
«قول قويىلعان قۇجات قوس ەلدىڭ گەولوگيا سالاسىنداعى بىرلەسە ارەكەت ەتۋ پوتەنتسيالىن ۇلعايتا تۇسەدى. بۇل باعىتتاعى شارالار كونسوليداتسياسى زەرتتەۋلەردىڭ تيىمدىلىگىن ارتتىرىپ, گەولوگيا سالاسىندا جاڭا مۇمكىندىكتەر اشاتىنىنا سەنىمدىمىن»,- دەپ اتاپ ءوتتى قازاقستاننىڭ ەكولوگيا ءمينيسترى.
