فۋتبول • 04 جەلتوقسان، 2020

قىزىققا تولى پرەمەر-ليگا

12 رەت كورسەتىلدى

دۇيسەنبىدە 9 ايعا سوزىلعان فۋتبولدان قازاقستان پرەمەر-ليگاسىنىڭ كەزەكتى ماۋسىمى ءوز مارەسىنە جەتتى. 29-مارتە ۇيىمداستىرىلعان ەل بىرىنشىلىگىن 12 كوماندا باستاعانىمەن، ەكى تۋردان كەيىن پاۆلوداردىڭ «ەرتىس» كلۋبى قارجىلىق قيىندىققا بايلانىستى چەمپيوناتتان شىعىپ قالدى. ءسويتىپ ماۋسىمنىڭ سوڭىنا دەيىن 11 كلۋب جانكۇيەرلەرگە تارتىستى ويىن سىيلاپ، «قازاقستان چەمپيونى» دەگەن اتاققا جانە كەلەر جىلعى ەۋروكۋبوك باسەكەلەرىنە قاتىسۋعا مۇمكىندىك بەرەتىن جولداماعا تالاستى.

 

بيىلعى چەمپيونات پان­دە­مياعا بايلانىستى ەرەكشە جاع­دايدا وتكەنمەن، جانكۇيەرلەر ەسىندە ءبىراز ساقتالاتىنى انىق. ناۋرىزدا ستارت بەرىلگەن ىشكى بىرىنشىلىك ەكى رەت باستالىپ، ەكى رەت كەيىنگە شەگەرىلدى. سونداي-اق وسى جىلعى ماۋسىم ەڭ ۇزاق وينالعان جانە تۇڭعىش رەت ءبىر ايماقتا وتكەن چەمپيونات رەتىندە تاريحتا قالدى. بۇعان دەيىنگى ەڭ كەش چەمپيونات 1999 جىلى اياقتالعان بولاتىن. سول بىرىنشىلىكتىڭ سوڭعى تۋرى 27 قاراشادا وينالعان-دى. ال 2008 جىلعى بىرىنشىلىك 20 قاراشادا مارەسىنە جەتكەن. سونىمەن قاتار قالىپتاسقان جاعدايعا بايلانىس­تى قازاقستان كاسىپقوي فۋتبول ليگاسى جانكۇيەرلەردىڭ ستا­ديون­عا كىرۋىنە رۇقسات بەرگەن جوق.

وسىنداي قيىن جاعدايدا وت­كەن بىرىنشىلىكتە فۋتبول ماماندارى ەلوردانىڭ «استانا» كومانداسى جەتىنشى چەمپيوندىعىن تويلاپ، الماتىنىڭ «قايراتى» مەن بىلتىرعى ماۋسىمنان كەيىن قۇرامىن بىرقاتار مىقتى فۋت­بولشىمەن تولىقتىرعان قوس­تانايدىڭ «توبىلى» كۇمىس جۇل­دەگە تالاسادى دەپ بولجاعان بولاتىن. سونداي-اق ۇزدىك ۇشتىكتىڭ قاتارىنان «ورداباسى» كلۋبى دا ءۇمىتتى سانالعان. بىراق چەمپيونات سوڭىندا كوماندالار ماماندار بولجامىنىڭ كۇل-تالقانىن شىعاردى. ماۋ­سىمدى وتە ءساتتى باستاعان «قاي­رات» ەل چەمپيوناتىنداعى ەڭ باستى قارسىلاستارى – «اس­تا­نانى» ەكى ويىندا دا قاپى قالدىرىپ، ەلوردا كومانداسىنان چەمپيوندىقتى تارتىپ الدى. جالپى «قايراتتىڭ» بۇل چەمپيوندىعى مامانداردىڭ  بولجامىمەن سايكەس كەلمەسە دە، اسا تاڭعالدىرا قويعان جوق. ويتكەنى الماتىلىقتار بيىل چەمپيونعا لايىق ونەر كورسەتتى دەپ ايتۋعا تولىق نەگىز بار. ەكىنشى تۋردا «شاحتەردەن» 1:0 ەسەبىمەن جە­ڭىلگەنىن ەسەپتەمەسەڭىز، چەم­­پيوندىق اتاققا قول جەت­كىز­گەنگە دەيىن بىردە-ءبىر رەت قار­سى­لاستارىنا ەسە جىبەرگەن جوق. تەك سوڭعى ەكى تۋردا عانا ۇپاي الا المادى. ونىڭ وزىندە باس باپكەر الەكسەي شپيلەۆسكي جا­سىل الاڭعا قوسالقى قۇرام مەن اكادەميا تاربيەلەنۋشىلەرىن شىعاردى.

ءبىر قىزىعى، بىلتىرعى چەم­پيوناتتىڭ سوڭعى تۋرىندا ا.شپيلەۆسكي ءباسپاسوز ءماس­لي­حاتىندا كەلەسى جىلى جان­كۇيەرلەردىڭ ءۇمىتىن اقتاپ، چەمپيون اتانامىز دەپ ۋادە بەرىپ، بيىل سول ۋادەسىنىڭ ۇدەسىنەن شىقتى. 

ال ماۋسىمنىڭ باسى مەن ورتا تۇسىندا ءبىر جەڭىپ، ءبىر جەڭىلىپ الا-قۇلا ويعان «توبىل» سوڭعى التى تۋردىڭ بەسەۋىندە ءتاۋىر ويىن كورسەتىپ، اراعا 12 جىل سالىپ كۇمىس جۇلدەگە قول جەتكىزدى. قوستانايلىقتار ەڭ كەيىنگى كۇمىس جۇلدەسىن 2008 جىل­عى ماۋ­سىمدا جەڭىپ العان بولاتىن. سوڭعى تۋرلاردا جەڭىسكە جەتكەن «توبىل» كەلەسى جىلى دا ەۋروكۋبوك ويىندارىندا باق سىنايتىن بولدى.

تۇيە بويىنا سەنىپ جىلدان قۇر قالىپتى دەگەندەي، ەل بىرىنشىلىگىنىڭ التى دۇركىن چەمپيوندارى «استانا» ءوز اتاقتارىنا سەنىپ، التىن جۇلدەدەن دە، كۇمىس جۇلدەدەن قۇر قالدى. شىمكەنتتىڭ «ورداباسى» كلۋبى سوڭعى تۋرلاردا ساتسىزدىككە ۇشىراماعاندا، «استانانى» ءۇشىنشى ورىننان دا ىعىستىرىپ جىبەرۋى مۇمكىن ەدى. ايتەۋىر، اۋپىرىمدەپ ءجۇرىپ قولا جۇلدە مەن ەۋروكۋبوك جولداماسىن قورجىنىنا سالدى. جالپى بيىل «استانا» ءۇشىن وتە ءساتسىز ماۋسىم بولدى. ماۋسىمداعى سۇرەڭسىز ويىنىن ايتپاعاننىڭ وزىندە، ءبىر ماۋسىمدا ءۇش باپكەر اۋىستىرىپ ۇلگەردى.

بيۋدجەتى جاعىنان «استا­نامەن» شامالاس بولعان «ور­داباسى» كلۋبى ءۇشىن دە بۇل ماۋسىم ءساتسىز ءوتتى. بىلتىر عانا قولا جۇلدەنى يەلەنگەن شىمكەنتتىكتەر بيىل سول جەتىستىگىن قايتالاۋ بىلاي تۇرسىن، سوڭعى ەۋروكۋبوك جولداماسىن بەرەتىن ءتورتىنشى ورىننان دا تىس قالىپ، چەمپيوناتتى بەسىنشى ورىنمەن قو­رىتىندىلادى. 2019 جىلعى بى­رىنشىلىكتە شىمكەنتتىكتەردى ورگە سۇيرەگەن جواو پاۋلو بي­ىل دا كومانداسىن العا قاراي جەتەلەگەنىمەن، ءبىر ءوزىنىڭ شاماسى جەتپەدى. بىلتىرعى پرەمەر-ليگادا 31 ماتچتا 15 گول سوققان پاۋلو بيىل 22 ويىندا 12 گول سوعىپ، چەمپيوناتتىڭ ۇزدىك سۇرمەرگەنى اتاندى.

2013 جىلى ەۋروپا فۋتبولىن ءدۇر سىلكىندىرىپ، ەۋروپا ليگاسىنىڭ توپتىق كەزەڭىندە ونەر كورسەتكەن قاراعاندىنىڭ «شاحتەرى» كەيىنگى جىلدارى سۇرەڭسىز ويىن كورسەتىپ كەلگەن-ءدى. ارىگە بارماي-اق كەيىنگى ەكى جىلداعى كورسەتكىشىن ايتار بول­­ساق، «كەنشىلەر» كومانداسى 2018 جىلعى ماۋسىمدى 8-ورىنمەن اياقتاسا، 2019 جىلى 9-ورىندى قاناعات تۇتقان بولاتىن. بىلتىرعى ماۋسىمنىڭ سوڭىندا «شاحتەر» فۋتبول كلۋبىنىڭ باسشىلىعىندا وزگەرىس بولىپ، كوماندانىڭ اتقارۋشى ديرەكتورى رەتىندە ەرلان ورازاەۆ ت­ا­عايىندالدى. ءبىر جىلدىڭ ىشىندە جاڭا كوماندا جاساقتاپ شى­­عارعان ورازاەۆ ءا دەگەننەن-اق «كەنشىلەردى» ەۋروكۋبوكقا شىعاردى. بيىل پاندەمياعا بايلانىستى فۋتبولدان قازاقستان كۋبوگى وتكىزىلمەگەن سوڭ، ەۋرو­كۋبوكتىڭ سوڭعى جولداماسى ەل بى­رىنشىلىگىندە ءتورتىنشى ورىن العان كومانداعا بەرىلدى.

سونداي-اق ەل بىرىنشىلىگىندە ەڭ ناشار ويىن كورسەتىپ، 11-ورىن يەلەنگەن «وقجەتپەس» كەلەسى جىلدان باستاپ ءبىرىنشى ليگادا ونەر كورسەتەتىن بولدى. ال بىلتىر تومەنگى ليگاعا ءتۇسىپ قالعان «اقتوبە» مەن «اتىراۋ» بيىل پرەمەر-ليگاعا قايتا ورالدى.

بيىلعى بىرىنشىلىكتىڭ بىر­قاتار ستاتيستيكالىق مالى­مەت­تەرىن نا­زار­لارىڭىزعا ۇسىن­ساق: بيىل­عى ماۋسىم قازاقستان چەم­پيو­ناتىنىڭ تاريحىنداعى ەڭ از گول سوعىلعان چەمپيوناتتىڭ ءبىرى بولدى. 11 كوماندانىڭ شابۋىل­شىلارى 22 تۋردا 274 گول سوقتى.

چەمپيون اتانعان «قايرات» كومانداسى قارسىلاستارىنىڭ قاقپاسىنا 48 گول سوعىپ، ەڭ ۇزدىك ناتيجەنى تىركەدى. ال «توبىل» كومانداسى ءوز قاقپاسىنا ەڭ از گول وت­كىزگەن (16) كوماندا اتاندى.

بيىلعى ماۋسىمدا جواو پاۋلو («ورداباسى») 2000 جىلدان كەيىن قازاقستان چەمپيوناتىندا ۇزدىك شابۋىلشى اتانعان ەكىنشى برازيليالىق فۋتبولشى اتاندى. بۇعان دەيىن 2000 جىلى «ەرتىستىڭ» شابۋىلشىسى نيلتون مەندەس 21 گول سوققان بولاتىن. ال قازاقستاندىق فۋت­بولشىلار اراسىنان ابات ايىم­بەتوۆ («قايرات») 10 گول سوعىپ، ەكىنشى جىل قاتارىنان ۇزدىكتەر قاتارىنان كورىندى.

سوڭعى جاڭالىقتار

دوللار ارزانداپ جاتىر

ەكونوميكا • بۇگىن، 11:37

قالادا قار بورايدى...

ايماقتار • بۇگىن، 10:47

ۇقساس جاڭالىقتار