ساياسات • 04 جەلتوقسان، 2020

مەملەكەتتىك كوميسسيانىڭ مىندەتى ايقىن

40 رەت كورسەتىلدى

ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەت­تىك كوميسسيانىڭ ءبىرىنشى وتىرىسى ءوتتى، دەپ حابارلادى akorda.kz سايتى.

بيىل 24 قاراشادا مەملەكەت باسشىسى قاسىم-جومارت توقاەۆ «ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيا تۋرالى» جارلىققا قول قويعان بولاتىن.

وسىعان وراي كەشە نۇر-سۇلتان قالا­سىندا قازاقستان رەسپۋبليكاسى­نىڭ مەملەكەتتىك حاتشىسى قىرىمبەك كوشەر­باەۆتىڭ توراعالىعىمەن ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ ءبىرىن­شى وتىرىسى ءوتتى.

مەملەكەتتىك كوميسسيا قۇرامىنا پرەزيدەنت اكىمشىلىگى مەن ۇكىمەتىنىڭ وكىلدەرى، پارلامەنت سەناتى مەن ءماجىلىس­تىڭ دەپۋتاتتارى، مۇددەلى مەملەكەتتىك ۇيىمداردىڭ باسشىلارى، قوعامدىق ۇيىمداردىڭ وكىلدەرى مەن ەلىمىزدىڭ عالىم­دارى بار. بارلىعى كوميسسيا قۇرامىنا 49 ادام كىرەدى.

مەملەكەتتىك حاتشى ءوزىنىڭ سويلەگەن سوزىندە مەملەكەتتىك كوميسسيانىڭ باس­تى مىندەتى – كەڭەستىك كەزەڭدەگى ساياسي قۋعىن-سۇرگىن قۇرباندارىنىڭ بارلىق ساناتتارىنا قاتىستى تاريحي ادىلەتتىلىكتى تولىق قالپىنا كەلتىرۋ ەكەنىن اتاپ ءوتتى. ماتەريالدارعا جان-جاقتى ءارى كەشەندى زەردەلەۋ جۇرگىزگەننەن كەيىن، حالىقارالىق تاسىلدەر مەن ستاندارتتار نەگىزىندە تولىقتاي زاڭدى، ال جەكەلەگەن ساناتتارعا قاتىستى – قۋعىن-سۇرگىن قۇرباندارىن ساياسي اقتاۋ جوس­پارلانىپ وتىر.

وتىرىس بارىسىندا مەملەكەت­تىك كو­ميس­­سيانىڭ قىزمەتىن ۇيىمداس­تىرۋدىڭ مىن­دەت­­تەرى مەن نەگىزگى ساتتەرى، ونىڭ 2020-2021 جىل­دارعا ارنالعان جۇمىس جوسپارى، قۋ­عىن-سۇرگىن قۇرباندارىنىڭ ءتۇرلى توپتارىن اقتاۋ جونىندەگى قىزمەتتى ادىسنامالىق قام­تاماسىز ەتۋ ماسەلەلەرى قارالدى. قۋ­عىن-سۇر­گىنگە ۇشىراعان ءارتۇرلى توپتاردى اق­تاۋ با­عىتتارىن پىسىقتاۋ ءۇشىن ارنايى جۇ­مىس توپتارىن قۇرۋ ۇسىنىلدى. 

وتىرىس قورىتىندىلارى بويىنشا مەملەكەتتىك كوميسسيا توراعاسى قىرىم­بەك كوشەرباەۆ مۇددەلى مەم­لەكەتتىك جانە جەرگىلىكتى اتقارۋشى ورگاندارعا مەم­لەكەت­تىك كوميسسيا قىزمەتى ماسەلەلەرى جونىندە بىرقاتار ناقتى تاپسىرما بەردى.

 

سوڭعى جاڭالىقتار

ۇقساس جاڭالىقتار