قوعام • 03 جەلتوقسان، 2020

جوعالىپ بارا جاتقان 129 ماماندىق انىقتالدى

12 رەت كورسەتىلدى

"جاڭا كاسىپتەر اتلاسى" جاڭا 239، ترانسفورماتسيالاناتىن 95 جانە جوعالىپ بارا جاتقان 129 ماماندىقتى انىقتادى، دەپ حابارلايدى Egemen.kz

ەڭبەك جانە حالىقتى الەۋمەتتىك قورعاۋ مينيسترلىگى جاڭا كاسىپتەر مەن قۇزىرەتتەردىڭ اتلاسى ەكونوميكانىڭ نەگىزگى 9 سالاسىن قامتيتىنىن، جاڭا، ترانسفورماتسيالاناتىن، سونداي-اق جويىلىپ بارا جاتقان كاسىپتەر مەن قۇزىرەتتەردى بىرىكتىرەتىنىن حابارلايدى. بۇل ازاماتتارعا ماماندىقتى دۇرىس تاڭداۋعا، وقۋ جوسپارلارىن وزەكتەندىرۋدە كاسىبي باعدار بەرۋگە كومەكتەسەدى.

ەڭبەك نارىعىندا سۇرانىسقا يە "جاڭا كاسىپتەر مەن قۇزىرەتتەردىڭ اتلاسى" جوباسىن ىسكە اسىرۋ ءۇشىن بىلتىر ەڭبەك جانە حالىقتى الەۋمەتتىك قورعاۋ مينيسترلىگى، ءبىلىم جانە عىلىم مينيسترلىگى جانە "ەۋرازيالىق توپ" جشس اراسىندا ءوزارا ىنتىماقتاستىق تۋرالى مەموراندۋم جاسالعان. اتلاستىڭ نەگىزگى ماقساتى – قازىرگى ماماندىقتاردى تالداۋ، وزگەرىپ جانە جويىلىپ بارا جاتقان ماماندىقتاردى ەسكەرە وتىرىپ، وزەكتى بولاتىن نەمەسە تاياۋداعى ونجىلدىقتا پايدا بولاتىن ەڭبەك نارىعىنىڭ بولاشاق ترەندتەرىن، ماماندىقتار مەن داعدىلاردى ايقىنداۋ.

"ەڭبەك مينيسترلىگى دۇنيەجۇزىلىك بانكتىڭ "ەڭبەك داعدىلارىن دامىتۋ جانە جۇمىس ورىندارىن ىنتالاندىرۋ" جوباسى شەڭبەرىندە 8 سالانى (مۇناي-گاز، اۋىل شارۋاشىلىعى، كولىك جانە لوگيستيكا، ماشينا جاساۋ، اقپاراتتىق-كوممۋنيكاتسيالىق تەحنولوگيالار، ەنەرگەتيكا، تۋريزم، قۇرىلىس سالالارى) قامتىدى. ال تاۋ-كەن-مەتاللۋرگيا سالاسىن زەرتتەۋدى "ەۋرازيالىق توپ" جشس ءوز بەتىنشە جۇزەگە اسىردى.

اتلاستى ازىرلەۋ ادىستەمەسى حالىقارالىق تاجىريبەگە جانە ەكونوميكا سالالارىن دامىتۋدىڭ الەمدىك ترەندتەرىنە نەگىزدەلگەن.

ول سالالىق ساراپشىلار رەتىندە ءوندىرىس، مەملەكەتتىك ورگاندار، سالالىق قاۋىمداستىقتار وكىلدەرىنىڭ قاتىسۋىمەن راپيد فورسايت (rapid foresight) تەحنولوگياسى بويىنشا پاندىك تەرەڭ زەردەلەۋمەن بولجامدى سەسسيالار وتكىزۋدى قامتىدى"، دەلىنگەن مينيسترلىكتىڭ حابارلاماسىندا. اۋقىمدى زەرتتەۋلەردىڭ قورىتىندىسى بويىنشا جاڭا 239، ترانسفورماتسيالاناتىن 95 جانە جوعالىپ بارا جاتقان 129 ماماندىق انىقتالعان.

اتلاستا ايقىندالعان جاڭا ماماندىقتار بولاشاقتا جاڭا تەحنولوگيالاردىڭ ەنگىزىلۋىنە سايكەس قانداي قۇزىرەتتەر مەن قىزمەتكەرلەر سۇرانىسقا يە بولاتىنىن تۇسىنۋگە مۇمكىندىك بەرەدى. اتلاستىڭ ناتيجەسىن ىڭعايلى پايدالانۋ ءۇشىن "ەلەكتروندىق ەڭبەك بيرجاسى" پورتالىنىڭ ينتەراكتيۆتى ىشكى مودۋلىندە ەلەكتروندىق سىلتەمە، سونداي-اق IOS جانە ANDROID پلاتفورمالارىنا ارنالعان اتلاستىڭ ءموبيلدى قوسىمشاسى ازىرلەنگەن.

سوڭعى جاڭالىقتار

جىلجىمالى زەرتحانالار جولعا شىقتى

مەديتسينا • بۇگىن، 21:25

بيىل 200 جاڭا مەكتەپ سالىنادى

ءبىلىم • بۇگىن، 14:47

ۇقساس جاڭالىقتار