ايماقتار • 03 جەلتوقسان، 2020

باتىس قازاقستاندا كيىكتەردى قورعاۋ شارالارى كۇشەيتىلدى

7 رەت كورسەتىلدى

باتىس قازاقستان وبلىسىندا جىل سوڭىنا دەيىن جالعاساتىن ءداستۇرلى «كيىك» كەڭ اۋقىمدى تابيعاتتى قورعاۋ اكتسياسى اياسىندا براكونەرلىكپەن كۇرەس شارالارى كۇشەيدى، - دەپ حابارلايدى Egemen.kz

قر ەكولوگيا، گەولوگيا جانە تابيعي رەسۋرستار مينيسترلىگى وسىعان وراي ۇيىمداستىرعان ءباسپاسوز تۋرى بارىسىندا «وحوتزووپروم» مەكەمەسى ينسپەكتورلارىنىڭ جۇمىسى كورسەتىلىپ، قازتالوۆ اۋدانى اۋماعىنداعى جاڭا اۆتونومدى ستانتسيا تانىستىرىلدى.

اتاپ وتەيىك، باتىس قازاقستان وبلىسى ەلىمىزدەگى كيىكتەر پوپۋلياتسياسى ەڭ كوپ شوعىرلانعان ءوڭىر. «وحوتزووپروم» مەكەمەسى ماماندارىنىڭ ايتۋىنشا، 2019 جىلعى ساناق بويىنشا بقو اۋماعىندا 217 مىڭ باس كيىك بولعان. بۇل سان قازىر ەداۋىر ارتقانى بايقالادى. ولاردى ساقتاۋ ماقساتىندا مينيسترلىك جالپى اۋدانى 343040،1 گا «بوكەيوردا» مەملەكەتتىك تابيعي رەزەرۆاتىن، سونداي-اق جالپى اۋدانى 314504،1 گا اششىوزەك مەملەكەتتىك تابيعي قاۋمالىن قۇرۋ ماسەلەسىن پىسىقتاۋدا.

«اكتسيانىڭ باستى ماقساتى - كيىك جانۋارلارىن زاڭسىز اۋلاۋ، ولاردىڭ ءمۇيىزىن، دەريۆاتتارىن زاڭسىز ساقتاۋ جانە تاسىمالداۋدىڭ جولىن كەسۋ. وسى ورايدا قۇزىرلى ورگاندار، اتاپ ايتقاندا ورمان شارۋاشىلىعى جانە جانۋارلاردى قورعاۋ ينسپەكتسياسى، پوليتسيا دەپارتامەنتى، ۇلتتىق قاۋىپسىزدىك كوميتەتىنىڭ شەكارا قىزمەتى بىرلەسىپ موبيلدىك توپتار قۇردى. جالپى، جىل باسىنان بەرى وبلىس اۋماعىندا كيىك اۋلاۋ، دەريۆاتتارىن زاڭسىز ساقتاۋ بويىنشا 37 قىلمىستىق ءىس تىركەلىپ، التاۋىنىڭ سوتتى ءوتتى. 8 ادام 2 جىلدان 6 جىلعا دەيىن باس بوستاندىعىنان ايىرۋ جانە شەكتەۋ جازاسىمەن قىلمىستىق جاۋاپكەرشىلىككە تارتىلدى. سوتپەن 62 ملن 300 مىڭ تەڭگە قاناعاتتاندىرىلدى»،- دەدى اكتسيا جايىندا بقو ورمان شارۋاشىلىعى جانە جانۋارلاردى قورعاۋ ينسپەكتسياسىنىڭ جەتەكشى مامانى ارمان ىزىمعاليەۆ.

«وحوتزووپروم» ءوب» رمقك-نىڭ باتىس قازاقستانداعى وبلىستىق فيليالى كيىكتەردى قورعاۋ جۇمىسىن جۇرگىزەتىن قازتالوۆ اۋدانى اۋماعىندا اۆتونومدى مودۋلدىك ءۇي سالىنعان.

جىلجىمالى ستانتسيا تۇرعىن جايدان بولەك، شاعىن جانارماي قۇيۋ بەكەتىمەن، كولىككە تەحنيكالىق قىزمەت كورسەتۋ الاڭىمەن جانە وپەراتورلىق بولمەمەن قامتىلعان. بۇل تابيعات قورعاۋشىلارعا ءبىر ورتالىقتان جەدەل ارەكەت ەتىپ، ءتيىمدى جۇمىس ىستەۋگە مۇمكىندىك بەرەدى. پيلوتتىق جوبا باسقا وڭىرلەردە دە جالعاسىن تاپپاق.
«اۆتونومدى ستانتسيا قازتالوۆ ەلدى مەكەنىنەن 50 شاقىرىم قاشىقتىقتا تۇر. بۇرىن ينسپەكتورلار جۇك كولىگىندە قونىپ جۇمىس ىستەيتىن. جاقىندا تولىق پايدالانۋعا بەرىلەتىن مودۋلدىك ۇيدە جاتىن ورىندارى، جۋىناتىن بولمە، اسحانا مەن جۇمىس ورىندارى بار. WI-FI ورناتىلادى. ەلەكتر ەنەرگياسى ءۇي توبەسىندەگى كۇن باتارەيالارى ارقىلى الىنادى. ينسپەكتورلارىمىزعا اشىق دالادا وسىنداي ورتالىقتان جۇمىس ىستەگەن وتە ىڭعايلى»،- دەدى بۇل تۋرالى «وحوتزووپروم» ءوب» رمقك باتىس قازاقستان وبلىستىق فيليالى ديرەكتورىنىڭ مىندەتىن اتقارۋشى ارمان قوجاحمەتوۆ.

«كيىك» اكتسياسى باتىس قازاقستاننان بولەك، اقمولا، اقتوبە، اتىراۋ، جامبىل، شىعىس قازاقستان، قاراعاندى، قوستاناي، قىزىلوردا، ماڭعىستاۋ، پاۆلودار جانە سولتۇستىك قازاقستان وبلىستارىنىڭ اۋماعىندا وتكىزىلەدى. وعان «وحوتزووپروم ءوب» رمقك-نىڭ جانۋارلار دۇنيەسىن قورعاۋ قىزمەتىنەن 224 ينسپەكتور، 68 بىرلىك جول تالعامايتىن اۆتوماشينالار ، 37 بىرلىك كۋنگ، 23 بىرلىك قاردا جۇرگىش، 2 بىرلىك «بەرلوگا» ۆاگونشالارى ء(ووف، ءبوف) جۇمىلدىرىلدى.

ەسكە سالايىق، 2019 جىلى مەملەكەت باسشىسىنىڭ تاپسىرماسىمەن قازاقستاندا براكونەرلىككە قارسى جازا كۇشەيتىلگەن. بۇرىن براكونەرلىك قىلمىسى دالەلدەنگەن ادامنىڭ مۇلكى تاركىلەنىپ، 7 جىلعا دەيىن باس بوستاندىعىنان ايىرىلسا، قازىر جازا مەرزىمى 10 جىلعا دەيىن ارتتى. مەملەكەتتىك ينسپەكتورلار مەن قورىقشىعا قاتىستى ومىرگە قول سۇعۋشىلىق جانە كۇش قولدانعانى ءۇشىن 20 جىلعا دەيىن باس بوستاندىعىنان ايىرۋ نە مۇلكى تاركىلەنىپ، ءومىر بويىنا باس بوستاندىعىنان ايىرۋ كوزدەلگەن.

سونىمەن قاتار، مەملەكەتتىك ينسپەكتور مەن قورىقشىعا قاتىستى زورلىق-زومبىلىق كورسەتكەنى ءۇشىن جاڭا باپ بويىنشا ادام 12 جىلعا دەيىن باس بوستاندىعىنان ايىرىلۋى مۇمكىن.

سوڭعى جاڭالىقتار

بيىل 200 جاڭا مەكتەپ سالىنادى

ءبىلىم • بۇگىن، 14:47

ۇقساس جاڭالىقتار