بەلسەندىلىگى ارتىپ كەلەدى

ساياسات • 03 جەلتوقسان، 2020

بەلسەندىلىگى ارتىپ كەلەدى

8 رەت كورسەتىلدى

ازاماتتىق قوعام تۇعىرناماسىن جۇزەگە اسىرۋدا ەل وڭىرلەرىندە قۇرىلعان ۇكىمەتتىك ەمەس ۇيىمداردىڭ قاتارى جىل سايىن وسە تۇسۋدە. مۇنداعى باستى ۇستانىم ازاماتتىق قوعام مەن مەملەكەت اراسىنداعى بايلانىستاردى تەرەڭدەتۋگە جانە ءوزارا ۇنقاتىسۋلار مەن سەرىكتەستىكتى دامىتۋعا نەگىزدەلگەن. وسى ورايدا ورال وڭىرىندە الەۋمەتتىك، ەكونوميكالىق جانە قوعامدىق مىندەتتەردى جۇزەگە اسىرۋدا ۇەۇ-نىڭ قوسىپ وتىرعان ۇلەسى سۇبەلى دەۋگە بولادى.

تەمىر قۇسايىن

ولاردىڭ سانى سوڭعى ون جىلدىڭ ىشىندە ءتورت ەسە كوبەيگەن. ايتسە دە ازاماتتىق قوعام قىزمەتىنىڭ باستى كورسەتكىشى ساننىڭ كوپتىگىمەن ەمەس، كەرىسىنشە ناقتى جۇمىس ساپاسىن كوتەرە بىلۋىمەن جانە ەل-جۇرتتى تولعاندىرىپ جۇرگەن كوكەيكەستى ماسەلەلەردى شەشۋ كەزىندەگى سىندارلى ءىس-قيمىلىمەن ەرەكشەلەنەتىنىن ەسكەرسەك بۇل تۇرعىدا دا وڭ مىسالدار از ەمەس.

ۇكىمەتتىك ەمەس ۇيىمداردىڭ مەملەكەتتىڭ قولداۋىنا ارقا سۇيەيتىنى تابيعي جايت. بۇل تۇرعىدا اقجايىق ايماعىندا جەرگىلىكتى اتقارۋشى ورگاندار تاراپىنان ازاماتتىق قوعامدى دامىتۋعا باعىتتالعان كەشەندى باعدارلامالاردى قارجىلاندىرۋعا جان-جاقتى كوڭىل بولىنۋدە. قازىرگى كەزدە بۇل باعىتتا بولىنگەن قاراجات مولشەرى 1 ملرد 300 ملن تەڭگەنى قۇرايدى. مۇنىڭ ءوزى ونىڭ كولەمى سوڭعى سەگىز جىلدا ون ەسەگە جۋىق وسكەنىن كورسەتەدى.

وسىلايشا ورال وڭىرىندە سوڭعى جىلدار بەدەرىندە ازاماتتىق قوعامعا جۇكتەلگەن سان الۋان ماسەلەلەردى جەدەل ءارى كاسىبي تۇرعىدا شەشە بىلۋگە قابىلەتتى ۇەۇ قالىپتاستى دەسەك شىندىقتان اۋىتقي قويماسپىز. ونىڭ قاتارىندا وتباسى قۇندىلىقتارىن ساقتاۋ مەن دارىپتەۋ، ايماقتاعى ۋربانيزاتسيا ءۇردىسىن رەتتەۋ، وڭىردەگى ەكولوگيالىق پروبلەمالاردىڭ شەشىمىن ىزدەستىرۋ جانە مۇمكىندىگى شەكتەۋلى جاندارعا الەۋمەتتىك تۇرعىدان قولداۋ كورسەتۋ سەكىلدى سان الۋان جوبالار بار.

ازاماتتىق قوعام ينستيتۋتىنىڭ وكىلدەرى تۇرعىندارعا كورسەتىلەتىن قىزمەتتىڭ ساپاسىن باقىلاۋ مەن ونى بۇدان ءارى جاقسارتۋ جونىندەگى ماسەلەلەرگە دە جەدەل ءۇن قوسىپ وتىر. وسى ورايدا وبلىستا قۇرىلعان ارنايى مونيتورينگتىك توپتىڭ ءرولى جوعارى. ونىڭ قۇرامىنا بىرقاتار ۇەۇ-نىڭ جەتەكشىلەرى، قوعام جاناشىرلارى مەن بەلگىلى بلوگەرلەر جانە ءماسليحات دەپۋتاتتارى ەنگىزىلگەن. وسى شەڭبەردەگى باقىلاۋ ارنالارىنا اباتتاندىرۋ ۇدەرىستەرى، جول قۇرىلىسى، الەۋمەتتىك نىساندار شوعىرى مەن وزگە دە ينفراقۇرىلىمدىق جۇيەلەر كىرەدى. اتالعان ءىس-شارالار كەشەنى بويىنشا «اقجايىق – ادالدىق الاڭى» جوبالىق كەڭسەسى مەن بىرقاتار قوعامدىق كەڭەستەر ىلكىمدى ءىس-قيمىل تانىتىپ ءجۇر. ونىڭ مۇشەلەرىنىڭ ۇشتەن ەكىسىن ۇەۇ مەن باق جانە مەملەكەتتىك ۇيىمداردىڭ وكىلدەرى قۇرايدى.

باتىس قازاقستان وبلىسىنداعى ازاماتتىق اليانس ۇيىمىنىڭ پرەزيدەنتى سۆەتلانا تەنيشەۆا اتقارعان ىستەرىنىڭ جاي-كۇيى تۋرالى: «بۇگىنگى كۇنى ءوڭىردىڭ ازاماتتىق سەكتورى كوكەيكەستى ماسەلەلەردىڭ شەشىمىن تابۋعا قابىلەتتى ازاماتتىق بىرلەستىكتەردىڭ بەرىك جۇيەسىن قۇرايدى. مەملەكەتتىڭ قۋاتتى بولۋى – مىقتى ازاماتتىق قوعامنىڭ قالىپتاسۋىنا دا بايلانىستى ەكەنى انىق. سوڭعى ۋاقىتتا بەلسەندى ازاماتتاردىڭ الەۋەتىن قوعامدى ودان ءارى دامىتۋعا تارتۋ ءىسىنىڭ كوكجيەگى كەڭەيىپ كەلەدى. اليانس قىزمەتىنىڭ باستى ارناسى دا وسىنداي اسقاق مۇراتتارعا نەگىزدەلگەن. بۇل رەتتە رەسپۋبليكالىق ازاماتتىق اليانس قۇرامىنا كىرگەن وڭىردەگى قوعامدىق بىرلەستىكتەردىڭ جەتەكشىلەرى بەلسەندى ءىس-قيمىل تانىتىپ ءجۇر»، دەدى.

مىنە، وسىلايشا ورال وڭىرىندە ۇەۇ بەلسەندىلىگى جىل سايىن ارتىپ كەلەدى.

ورال

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز