پرەزيدەنت • 02 جەلتوقسان، 2020

پرەزيدەنت: قازاقستان اشىق ءارى ادىلەتتى سايلاۋ وتكىزۋگە دايىن

40 رەت كورسەتىلدى

رەسەي فەدەراتسياسىنىڭ توراعالىعىمەن ۆيدەوكونفەرەنتسيا فورماتىندا ءوتىپ جاتقان ۇجىمدىق قاۋىپسىزدىك كەڭەسىنىڭ سەسسياسىندا مەملەكەت باسشىسى قاسىم-جومارت توقاەۆ اشىق ءارى ادىلەتتى سايلاۋ وتەتىنىن مالىمدەدى، دەپ حابارلايدى Egemen.kz

"COVID-19 پاندەمياسى الەمدىك ساياسات پەن ەكونوميكانى شاتقاياقتاتىپ جىبەردى. جاعدايدى ساۋدا سوعىستارىنا ۇلاسقان ءوزارا سانكتسيالار مەن شەكتەۋلەر ءتىپتى ۋشىقتىرىپ تۇر. ەكسترەميزم، تەرروريزم، ەسىرتكى ساۋداسى، كيبەرقاۋىپسىزدىك پەن زاڭسىز كوشى-قون سالاسىنداعى جاھاندىق تەگەۋرىندەردىڭ ارتىپ بارا جاتقانى دا الاڭداتادى. وسىنداي جاعدايدا بەيبىتشىلىكتى نىعايتىپ، ايماقتاعى قاۋىپسىزدىك پەن تۇراقتىلىقتى قامتاماسىز ەتۋ جولىنداعى مەملەكەتارالىق مەحانيزم رەتىندەگى ءبىزدىڭ ۇيىمنىڭ ءرولى ايتارلىقتاي ارتا تۇسەدى. وسى مۇمكىندىكتى پايدالانا وتىرىپ، پاندەميانى ەڭسەرۋگە ءۇن قوسقانىڭىز ءۇشىن قۇرمەتتى ۆلاديمير ۆلاديميروۆيچ (رف پرەزيدەنتى پۋتينگە) سىزگە العىسىمدى ايتقىم كەلەدى. تاياۋ ارادا قازاقستاندا رەسەيلىك ۆاكتسينانى ازىرلەيتىن زاۋىت سالىنادى"، دەدى پرەزيدەنت.

سونداي-اق مەملەكەت باسشىسى سەسسياعا قاتىسۋشىلارعا قازاقستاندا ەلەكتورالدى كەزەڭ باستالىپ جاتقانىن ايتىپ ءوتتى.

"2021 جىلعى 11 قاڭتاردا پارلامەنتتىڭ تومەنگى پالاتاسى مەن جەرگىلىكتى وكىلدىك ورگاندارىنىڭ سايلاۋى وتەدى. سايلاۋ كونستيتۋتسيالىق مەرزىمدە بولادى. پارتيالاردىڭ بارىنە دايارلانۋعا جەتكىلىكتى ۋاقىت بەرىلدى. بيىل ءبىز تەڭدەسسىز دەموكراتيالىق رەفورمالار پاكەتىن قابىلدادىق. ولار كوپپارتيالىلىقتى جانە پارتيالىق باسەكەلەستىكتى دامىتۋعا، ازاماتتىق بەلسەندىلىكتى ارتتىرۋعا باعىتتالعان. اتاپ ايتقاندا زاڭنامالىق دەڭگەيدە پارلامەنتتىك وپپوزيتسيا ينستيتۋتى بەكىتىلىپ، پارتيالىق تىزىمگە جاستار مەن ايەلدەردىڭ ۇلەسى ءۇشىن 30 پايىزدىق كۆوتا ءبولىندى. ءبىز اشىق ءارى ادىلەتتى سايلاۋ وتكىزۋگە نيەتتىمىز. سەرىكتەستەرىمىزدىڭ قولداۋى مەن وسى ەلدەردىڭ باقىلاۋشىلارىن كۇتەمىز"، دەدى مەملەكەت باسشىسى.

سوڭعى جاڭالىقتار

الەم كۋبوگى وتەدى

سپورت • كەشە

ۇقساس جاڭالىقتار