اتاپ ايتقاندا, دەپۋتتاردىڭ باستاماسىمەن ازىرلەنگەن جول ءجۇرىسى ماسەلەلەرىنە قاتىستى زاڭ جوباسى ءبىرىنشى وقىلىمدا ماقۇلداندى.
بۇل زاڭ جوباسى مەملەكەت باسشىسىنىڭ ۇلتتىق قوعامدىق سەنىم كەڭەسىنىڭ ەكىنشى وتىرىسىندا جۇرگىزۋشىلەردىڭ كولىك قۇرالىنا قازاقستان رەسپۋبليكاسىندا بەرىلگەن جۇرگىزۋشى كۋالىگى مەن تىركەۋ قۇجاتتارىن وزىمەن بىرگە الىپ جۇرمەگەنى ءۇشىن اكىمشىلىك جاۋاپكەرشىلىگىن الىپ تاستاۋ تۋرالى بەرگەن تاپسىرماسىن ىسكە اسىرۋعا باعىتتالعان. كورسەتىلگەن قۇجاتتار ىشكى ىستەر ورگاندارىنىڭ دەرەكقورىندا بار جانە قاجەت بولعان جاعدايدا پوليتسيا قىزمەتكەرلەرى ولاردىڭ بار-جوعىن دەرەكقورعا قوسىلۋ ارقىلى تەكسەرە الادى.
ءماجىلىس توراعاسى نۇرلان نىعماتۋلين اتاپ وتكەندەي, زاڭ جوباسىندا جۇرگىزۋشى كۋالىگى جانە كولىك قۇرالىن تىركەۋ تۋرالى قۇجاتتى جۇرگىزۋشىنىڭ وزىمەن بىرگە الىپ جۇرۋگە مىندەتتەيتىن نورمالاردى الىپ تاستاۋ كوزدەلدى. نۇرلان نىعماتۋليننىڭ پىكىرىنشە, قازىرگى اقپاراتتىق تەحنولوگيالار كەڭىنەن دامىعان تسيفرلىق كەزەڭدە جۇرگىزۋشىلەردەن ءتيىستى قۇجاتتاردى تالاپ ەتۋ, ول – قاجەتسىز. سەبەبى, پوليتسيا جۇرگىزۋشى مەن ونىڭ كولىك قۇرالى تۋرالى بارلىق قاجەتتى اقپاراتتى جەكە كۋالىك نەگىزىندە ەلەكتروندىق مالىمەتتەر قورىنان تابا الادى.
ايتا كەتۋ كەرەك, تۇزەتۋلەر شەتەلدىك جۇرگىزۋشىلەر مەن شەتەلدىك كولىك قۇرالدارىنا قولدانىلمايدى. سونىمەن قاتار بۇگىن دەپۋتاتتار عىلىم ماسەلەلەرى بويىنشا زاڭ جوباسىن ءبىرىنشى وقىلىمدا ماقۇلدادى. قۇجاتتا ۇلتتىق عىلىمي كەڭەستەرگە كوممەرتسيالاندىرۋ جوبالارىن مەملەكەتتىك بيۋدجەتتەن قارجىلاندىرۋ بولىگىندە فۋنكتسيالار بەرۋ كوزدەلەدى. كونكۋرستىق راسىمدەردىڭ اشىق بولۋى ماقساتىندا ۇلتتىق مەملەكەتتىك عىلىمي-تەحنيكالىق ساراپتاما ورتالىعىنا عىلىمي, عىلىمي-تەحنيكالىق جوبالار مەن باعدارلامالاردىڭ, عىلىمي, عىلىمي-تەحنيكالىق قىزمەت ناتيجەلەرىن كوممەرتسيالاندىرۋ جوبالارىنىڭ سارالانعان ءتىزىمىن قالىپتاستىرۋ جانە ۇلتتىق عىلىمي كەڭەستەرگە جىبەرۋ قاراستىرىلعان.
سونداي-اق عىلىمي, عىلىمي-تەحنيكالىق قىزمەت ناتيجەلەرىن كوممەرتسيالاندىرۋدىڭ ورىندالعان جوبالارىنىڭ ناتيجەلەرىن باعالاۋ جانە ناتيجەلىلىگىنە مونيتورينگتى جۇزەگە اسىرۋ جونىندەگى فۋنكتسيالاردى بەرۋ ۇسىنىلادى.
بۇدان باسقا, عىلىمي, عىلىمي-تەحنيكالىق قىزمەت ناتيجەلەرىن كوممەرتسيالاندىرۋدى گرانتتىق قارجىلاندىرۋعا ارنالعان كونكۋرسقا عىلىمي جانە عىلىمي-تەحنيكالىق قىزمەتتىڭ اككرەديتتەلگەن سۋبەكتىلەرى عانا قاتىسادى دەپ بەلگىلەنەدى. ۇزدىك عىلىمي قىزمەتكەرلەرگە «ۇزدىك عىلىمي قىزمەتكەر» اتاعىن بەرۋ جانە 2000 ايلىق ەسەپتىك كورسەتكىش مولشەرىندە گرانت بەرۋ ارقىلى ولاردى ماتەريالدىق كوتەرمەلەۋ شارالارى كوزدەلىپ وتىر.
سونىمەن قاتار بۇگىنگى وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كاسپي تەڭىزىندە قىزمەتتى جۇزەگە اسىرۋعا بايلانىستى ماسەلەلەر بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى. زاڭ جوباسىنىڭ نەگىزگى ماقساتى – كاسپي تەڭىزىنىڭ قۇقىقتىق مارتەبەسى تۋرالى كونۆەنتسيانىڭ ەرەجەلەرىن ەلىمىزدىڭ بىرقاتار زاڭنامالىق اكتىلەرىنە ەنگىزۋ.
قۇجاتتا «بالىق اۋلاۋ ايماعى», «بالىق اۋلاۋ ايماعىنىڭ رەجيمى» دەگەن ۇعىمدار ەنگىزىلگەن. سونداي-اق بالىق اۋلاۋ ايماعىندا سۋ بيولوگيالىق رەسۋرستارىنا كاسىپشىلىك جۇرگىزۋگە قازاقستان رەسپۋبليكاسىنىڭ ايرىقشا قۇقىقتارىنىڭ ساقتالۋىن باقىلاۋ جونىندەگى مەملەكەتتىك ورگانداردىڭ قۇزىرەتى جانە ولاردىڭ ءوزارا ءىس-قيمىل جاساۋ ءتارتىبى بەكىتىلەدى. كونۆەنتسيانىڭ ەرەجەلەرىن ەسكەرە وتىرىپ, قولدانىستاعى «اۋماقتىق سۋلار ەنىنىڭ ەسەبى ءۇشىن باستاپقى سىزىق», «اۋماقتىق سۋلار», «قازاقستان رەسپۋبليكاسىنىڭ شەكارالىق كەڭىستىگى» دەگەن ۇعىمدارعا وزگەرىستەر ەنگىزىلۋدە. ءماجىلىس ءبىرىنشى وقىلىمدا «جەر قويناۋى جانە جەر قويناۋىن پايدالانۋ تۋرالى» قازاقستان رەسپۋبليكاسىنىڭ كودەكسىنە ۋران ءوندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ماقۇلدادى. زاڭ جوباسىندا ۋران ءوندىرۋ كەزەڭىن ۇزارتۋ ءراسىمىن جەتىلدىرۋ; جەر قويناۋىن پايدالانۋشىلارعا ۋران ءوندىرۋ كەزەڭىندە گەولوگيالىق قۇرىلىمداردى جانە ۋران كەن ورنى قورلارىن ناقتىلاۋ ماقساتىندا ءوندىرۋ ۋچاسكەسىن جەتە زەرتتەۋدى (جەتە بارلاۋدى) جۇرگىزۋ مۇمكىندىگىن بەرۋ قاراستىرىلعان.
سونداي-اق ۋران ءوندىرۋدىڭ تاجىريبەلىك-ونەركاسىپتىك جوبالارىنا قويىلاتىن تالاپتار, ۋران ءوندىرۋ سالاسىنداعى جوبالاۋ قۇجاتتارىنا مەملەكەتتىك ساراپتاما جۇرگىزۋ تەتىگىن ايقىنداۋ كوزدەلگەن.
زاڭ جوباسىمەن جۇمىس ىستەۋ بارىسىندا جۇمىس توبىنىڭ مۇشەلەرى جوبالاۋ قۇجاتتارىنا جانە يگەرۋ تالداۋلارىنا تاۋەلسىز ساراپتاما ۇيىمداستىرۋ جانە جۇرگىزۋ شىعىندارىن وتەۋگە, ۋران كەن ورنى قورلارى كولەمىنىڭ ءوسىمى باستاپقى كولەمنەن 30 جانە ودان دا كوپ پايىزعا ارتقان جاعدايدا, جەر قويناۋىن پايدالانۋشىنىڭ ءوڭىردىڭ الەۋمەتتىك-ەكونوميكالىق دامۋىنا باعىتتالعان جوبانى ىسكە اسىرۋ جونىندەگى قوسىمشا مىندەتتەمەلەرىنە قاتىستى تۇزەتۋلەر ەنگىزدى. جالپى وتىرىستا پالاتا «نوتاريات تۋرالى»دەپۋتاتتىق زاڭ جوبانى جانە قازاقستان مەن بىرىككەن اراب امىرلىكتەرى ەلشىلىكتەرىنىڭ قاجەتتىلىكتەرىنە استانا قالاسىندا جانە ءابۋ دابي قالاسىندا جەر ۋچاسكەلەرىن وتەۋسىز پايدالانۋعا ءوزارا بەرۋ تۋرالى كەلىسىمدى راتيفيكاتسيالاۋ تۋرالى زاڭ جوباسىن ماقۇلدادى. بۇگىنگى وتىرىستا دەپۋتاتتار ەكىنشى وقىلىمدا «ماقتا سالاسىن دامىتۋ تۋرالى» قازاقستان رەسپۋبليكاسى زاڭىنىڭ كۇشى جويىلدى دەپ تانۋ جانە قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر ەنگىزۋ تۋرالى» جانە ۆەتەريناريا ماسەلەلەرىنە قاتىستى زاڭ جوبالارىن ماقۇلدادى.
سونداي-اق, ءماجىلىس بۇگىن مەملەكەتارالىق ستاندارتتاۋ جونىندەگى قۇجاتتاردى تاراتۋ جانە ەۋرازيالىق ەكونوميكالىق وداق شەڭبەرىندە باعالى مەتالدارمەن جانە اسىل تاستارمەن وپەراتسيالاردى جۇزەگە اسىرۋ ەرەكشەلىكتەرى تۋرالى كەلىسىمدى راتيفيكاتسيالاۋ تۋرالى زاڭ جوبالارىن جۇمىسقا الدى. وتىرىس سوڭىندا ءماجىلىس دەپۋتاتتارى ن.اشىمبەتوۆ, ش.حاحازوۆ, د. ەسپاەۆا جانە ا. پەرۋاشەۆ مەملەكەتتىك ورگانداردىڭ باسشىلارىنا دەپۋتاتتىق ساۋالدار جولدادى.
