ۋكراينا ميليتسياسى 30 قاراشا كۇنى تۇندە كيەۆتەگى تاۋەلسىزدىك الاڭىندا ميتينگىگە شىققاندار ۇستىنەن 12 قىلمىستىق ءىس قوزعاپ ۇلگەردى. بۇل تۋرالى يتار-تاسس حابارلادى.
«بەس ءوندىرىس بۇزاقىلىققا قاتىستى, ۇشەۋى – قارسىلىق كورسەتكەندەرگە, ەكەۋى – زورلىق جاساعاندارعا بىرەۋى قوعامدىق ورىندى نەمەسە قارۋ-جاراقتى باسىپ الۋعا قاتىستى باپتار بويىنشا قوزعالدى. جالپى, ميليتسيا دەنساۋلىقتارى مەن ومىرلەرىنە قاۋىپ تونگەننەن كەيىن ارنايى قۇرال قولدانۋعا ءماجبۇر بولدى», - دەيدى ۋكراينا ىشكى ىستەر مينيسترلىگى باس باسقارماسى باستىعىنىڭ مىندەتىن اتقارۋشى ۆالەري كورياك. ول ءسوز ورايىندا بۇل ىستەردىڭ تەرگەۋگە جىبەرىلگەنىن ءمالىم ەتتى.
ۋكراينا ىشكى ىستەر مينيسترلىگى مايدان تاۋەلسىزدىك الاڭىندا بولعان وقيعالاردى زەرتتەيتىن جۇمىس توبىن قۇردى. ول سونىمەن بىرگە قىزمەتتىك لاۋازىمدارىن اسىرا پايدالانعان ميليتسيا قىزمەتكەرلەرىن دە تەكسەرەتىن بولادى.
باقىتبەك كەنەش ۇلى.
دەرەككوز: يتار-تاسس
